၄. ကက္ကဋကရသဒါယကဝိမာနဝဏ္ဏနာ

ဥစ္စမိဒံ မဏိထူဏံ ဝိမာနန္တိ ကက္ကဋကရသဒါယကဝိမာနံ. တဿ ကာ ဥပ္ပတ္တိ? ဘဂဝါ ရာဇဂဟေ ဝိဟရတိ ဝေဠုဝနေ. တေန သမယေန အညတရော ဘိက္ခု အာရဒ္ဓဝိပဿကော ကဏ္ဏသူလေန ပီဠိတော အကလ္လသရီရတာယ ဝိပဿနံ ဥဿုက္ကာပေတုံ နာသက္ခိ၊ ဝေဇ္ဇေဟိ ဝုတ္တဝိဓိနာ ဘေသဇ္ဇေ ကတေပိ ရောဂေါ န ဝူပသမိ. သော ဘဂဝတော ဧတမတ္ထံ အာရောစေသိ. အထဿ ဘဂဝါ ‘‘ကက္ကဋကရသဘောဇနံ သပ္ပါယ’’န္တိ ဉတွာ အာဟ ‘‘ဂစ္ဆ တွံ ဘိက္ခု မဂဓခေတ္တေ ပိဏ္ဍာယ စရာဟီ’’တိ.

သော ဘိက္ခု ‘‘ဒီဃဒဿိနာ အဒ္ဓါ ကိဉ္စိ ဒိဋ္ဌံ ဘဝိဿတီ’’တိ စိန္တေတွာ ‘‘သာဓု ဘန္တေ’’တိ ဘဂဝတော ပဋိဿုဏိတွာ ဘဂဝန္တံ ဝန္ဒိတွာ ပတ္တစီဝရမာဒါယ မဂဓခေတ္တံ ဂန္တွာ အညတရဿ ခေတ္တပါလဿ ကုဋိယာ ဒွါရေ ပိဏ္ဍာယ အဋ္ဌာသိ. သော စ ခေတ္တပါလော ကက္ကဋကရသံ သမ္ပာဒေတွာ ဘတ္တဉ္စ ပစိတွာ ‘‘ထောကံ ဝိဿမိတွာ ဘုဉ္ဇိဿာမီ’’တိ နိသိန္နော ထေရံ ဒိသွာ ပတ္တံ ဂဟေတွာ ကုဋိကာယံ နိသီဒါပေတွာ ကက္ကဋကရသဘတ္တံ အဒါသိ. ထေရဿ တံ ဘတ္တံ ထောကံ ဘုတ္တဿယေဝ ကဏ္ဏသူလံ ပဋိပ္ပဿမ္ဘိ၊ ဃဋသတေန နှာတော ဝိယ အဟောသိ. သော သပ္ပါယာဟာရဝသေန စိတ္တဖာသုကံ လဘိတွာ ဝိပဿနာဝသေန စိတ္တံ အဘိနိန္နာမေန္တော အပရိယောသိတေယေဝ ဘောဇနေ အနဝသေသတော အာသဝေ ခေပေတွာ အရဟတ္တေ ပတိဋ္ဌာယ ခေတ္တပါလံ အာဟ ‘‘ဥပါသက၊ တဝ ပိဏ္ဍပါတဘောဇနေန မယှံ ရောဂေါ ဝူပသန္တော၊ ကာယစိတ္တံ ကလ္လံ ဇာတံ၊ တွမ္ပိ ဣမဿ ပုညဿ ဖလေန ဝိဂတကာယစိတ္တဒုက္ခော ဘဝိဿသီ’’တိ ဝတွာ အနုမောဒနံ ကတွာ ပက္ကာမိ.

ခေတ္တပါလော အပရေန သမယေန ကာလံ ကတွာ တာဝတိံသဘဝနေ ဒွါဒသယောဇနိကေ မဏိထမ္ဘေ ကနကဝိမာနေ သတ္တသတကူဋာဂါရပဋိမဏ္ဍိတေ ဝေဠုရိယမယဂဗ္ဘေ နိဗ္ဗတ္တိ၊ ဒွါရေ စဿ ယထူပစိတကမ္မသံသူစကော မုတ္တာသိက္ကာဂတော သုဝဏ္ဏကက္ကဋကော ဩလမ္ဗမာနော အဋ္ဌာသိ. အထာယသ္မာ မဟာမောဂ္ဂလ္လာနော ပုဗ္ဗေ ဝုတ္တနယေန တတ္ထ ဂတော တံ ဒိသွာ ဣမာဟိ ဂါထာဟိ ပုစ္ဆိ –

၉၁၀. ‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ၊

ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ.

၉၁၁. ‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ၊

ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ.

၉၁၂. ‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ၊

ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ.

၉၁၃. ‘‘ပုစ္ဆာမိ တံ ဒေဝ မဟာနုဘာဝ၊ မနုဿဘူတော ကိမကာသိ ပုညံ၊

ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

သောပိဿ ဗျာကာသိ၊ တံ ဒဿေတုံ –

၉၁၄. ‘‘သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော၊

ပဉှံ ပုဋ္ဌော ဝိယာကာသိ၊ ယဿ ကမ္မဿိဒံ ဖလ’’န္တိ. – ဝုတ္တံ၊

၉၁၅. ‘‘သတိသမုပ္ပါဒကရော၊ ဒွါရေ ကက္ကဋကော ဌိတော၊

နိဋ္ဌိတော ဇာတရူပဿ၊ သောဘတိ ဒသပါဒကော.

၉၁၆. ‘‘တေန မေတာဒိသော ဝဏ္ဏော၊ တေန မေ ဣဓ မိဇ္ဈတိ၊

ဥပ္ပဇ္ဇန္တိ စ မေ ဘောဂါ၊ ယေ ကေစိ မနသော ပိယာ.

၉၁၇. ‘‘အက္ခာမိ တေ ဘိက္ခု မဟာနုဘာဝ၊ မနုဿဘူတော ယမကာသိ ပုညံ၊

တေနမှိ ဧဝံ ဇလိတာနုဘာဝေါ၊ ဝဏ္ဏော စ မေ သဗ္ဗဒိသာ ပဘာသတီ’’တိ.

၉၁၀. တတ္ထ ဥစ္စန္တိ အစ္စုဂ္ဂတံ. မဏိထူဏန္တိ ပဒုမရာဂါဒိမဏိမယထမ္ဘံ. သမန္တတောတိ စတူသုပိ ပဿေသု. ရုစကတ္ထတာတိ တဿံ တဿံ ဘူမိယံ သုဝဏ္ဏဖလကေဟိ အတ္ထတာ.

၉၁၁. ပိဝသိ ခါဒသိ စာတိ ကာလေန ကာလံ ဥပယုဇ္ဇမာနံ ဂန္ဓပါနံ သုဓာဘောဇနဉ္စ သန္ဓာယ ဝဒတိ. ပဝဒန္တီတိ ပဝဇ္ဇန္တိ. ဒိဗ္ဗာ ရသာ ကာမဂုဏေတ္ထ ပဉ္စာတိ ဒိဗ္ဗာ ရသာ အနပ္ပကာ ပဉ္စ ကာမဂုဏာ ဧတ္ထ ဧတသ္မိံ တဝ ဝိမာနေ သံဝိဇ္ဇန္တီတိ အတ္ထော. သုဝဏ္ဏဆန္နာတိ ဟေမာဘရဏဝိဘူသိတာ.

၉၁၅. သတိသမုပ္ပါဒကရောတိ သတုပ္ပါဒကရော၊ ယေန ပုညကမ္မေန အယံ ဒိဗ္ဗသမ္ပတ္တိ မယာ လဒ္ဓါ၊ တတ္ထ သတုပ္ပါဒဿ ကာရကော၊ ‘‘ကက္ကဋကရသဒါနေန အယံ တယာ သမ္ပတ္တိ လဒ္ဓါ’’တိ ဧဝံ သတုပ္ပါဒံ ကရောန္တောတိ အတ္ထော. နိဋ္ဌိတော ဇာတရူပဿာတိ ဇာတရူပေန သိဒ္ဓေါ ဇာတရူပမယော. ဧကမေကသ္မိံ ပဿေ ပဉ္စ ပဉ္စ ကတွာ ဒသ ပါဒါ ဧတဿာတိ ဒသပါဒကော ဒွါရေ ကက္ကဋကော ဌိတော သောဘတိ. သော ဧဝ မမ ပုညကမ္မံ တာဒိသာနံ မဟေသီနံ ဝိဘာဝေတိ၊ န ဧတ္ထ မယာ ဝတ္တဗ္ဗံ အတ္ထီတိ အဓိပ္ပါယော. တေနာဟ ‘‘တေန မေတာဒိသော ဝဏ္ဏော’’တိအာဒိ. သေသံ ဝုတ္တနယမေဝ.

ကက္ကဋကရသဒါယကဝိမာနဝဏ္ဏနာ နိဋ္ဌိတာ.