၉. ပီတဝိမာနဝဏ္ဏနာ

ပီတဝတ္ထေ ပီတဓဇေတိ ပီတဝိမာနံ. တဿ ကာ ဥပ္ပတ္တိ? ဘဂဝတိ ပရိနိဗ္ဗုတေ ရညာ အဇာတသတ္တုနာ အတ္တနာ ပဋိလဒ္ဓါ ဘဂဝတော သရီရဓာတုယော ဂဟေတွာ ထူပေ စ မဟေ စ ကတေ ရာဇဂဟဝါသိနီ အညတရာ ဥပါသိကာ ပါတောဝ ကတသရီရပဋိဇဂ္ဂနာ ‘‘သတ္ထု ထူပံ ပူဇေဿာမီ’’တိ ယထာလဒ္ဓါနိ စတ္တာရိ ကောသာတကီပုပ္ဖါနိ ဂဟေတွာ သဒ္ဓါဝေဂေန သမုဿာဟိတမာနသာ မဂ္ဂပရိဿယံ အနုပဓာရေတွာဝ ထူပါဘိမုခီ ဂစ္ဆတိ. အထ နံ တရုဏဝစ္ဆာ ဂါဝီ အဘိဓာဝန္တီ ဝေဂေန အာပတိတွာ သိင်္ဂေန ပဟရိတွာ ဇီဝိတက္ခယံ ပါပေသိ. သာ တာဝဒေဝ တာဝတိံသဘဝနေ နိဗ္ဗတ္တန္တီ သက္ကဿ ဒေဝရညော ဥယျာနကီဠာယ ဂစ္ဆန္တဿ ပရိဝါရဘူတာနံ အဍ္ဎတိယာနံ နာဋကကောဋီနံ မဇ္ဈေ အတ္တနော သရီရပဘာယ တာ သဗ္ဗာ အဘိဘဝန္တီ သဟ ရထေန ပါတုရဟောသိ. တံ ဒိသွာ သက္ကော ဒေဝရာဇာ ဝိမှိတစိတ္တော အစ္ဆရိယဗ္ဘုတဇာတော ‘‘ကီဒိသေန နု ခေါ ဩဠာရိကေန ကမ္မုနာ အယံ ဧဒိသိံ သုမဟတိံ ဒေဝိဒ္ဓိမုပါဂတာ’’တိ တံ ဣမာဟိ ဂါထာဟိ ပုစ္ဆိ –

၇၉၅. ‘‘ပီတဝတ္ထေ ပီတဓဇေ၊ ပီတာလင်္ကာရဘူသိတေ၊

ပီတစန္ဒနလိတ္တင်္ဂေ၊ ပီတဥပ္ပလမာလိနီ.

၇၉၆. ‘‘ပီတပါသာဒသယနေ၊ ပီတာသနေ ပီတဘာဇနေ၊

ပီတဆတ္တေ ပီတရထေ၊ ပီတဿေ ပီတဗီဇနေ.

၇၉၇. ‘‘ကိံ ကမ္မမကရီ ဘဒ္ဒေ၊ ပုဗ္ဗေ မာနုသကေ ဘဝေ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

သာပိဿ ဣမာဟိ ဂါထာဟိ ဗျာကာသိ –

၇၉၈. ‘‘ကောသာတကီ နာမ လတတ္ထိ ဘန္တေ၊ တိတ္တိကာ အနဘိစ္ဆိတာ၊

တဿာ စတ္တာရိ ပုပ္ဖါနိ၊ ထူပံ အဘိဟရိံ အဟံ.

၇၉၉. ‘‘သတ္ထု သရီရမုဒ္ဒိဿ၊ ဝိပ္ပသန္နေန စေတသာ၊

နာဿ မဂ္ဂံ အဝေက္ခိဿံ၊ န တဂ္ဂမနသာ သတီ.

၈၀၀. ‘‘တတော မံ အဝဓီ ဂါဝီ၊ ထူပံ အပတ္တမာနသံ၊

တဉ္စာဟံ အဘိသဉ္စေယျံ၊ ဘိယျော နူန ဣတော သိယာ.

၈၀၁. ‘‘တေန ကမ္မေန ဒေဝိန္ဒ၊ မဃဝါ ဒေဝကုဉ္ဇရ၊

ပဟာယ မာနုသံ ဒေဟံ၊ တဝ သဟဗျမာဂတာ’’တိ.

၇၉၅-၆. တတ္ထ ပီတစန္ဒနလိတ္တင်္ဂေတိ သုဝဏ္ဏဝဏ္ဏေန စန္ဒနေန အနုလိတ္တသရီရေ. ပီတပါသာဒသယနေတိ သဗ္ဗသောဝဏ္ဏမယေန ပါသာဒေန သုဝဏ္ဏပရိက္ခိတ္တေဟိ သယနေဟိ စ သမန္နာဂတေ. ဧဝံ သဗ္ဗတ္ထ ဟေဋ္ဌာ ဥပရိ စ ပီတသဒ္ဒေန သုဝဏ္ဏမေဝ ဂဟိတန္တိ ဒဋ္ဌဗ္ဗံ.

၇၉၈. လတတ္ထီတိ လတာ အတ္ထိ. ဘန္တေတိ သက္ကံ ဒေဝရာဇာနံ ဂါရဝေန အာလပတိ. အနဘိစ္ဆိတာတိ န အဘိကင်္ခိတာ.

၇၉၉. သရီရန္တိ သရီရဘူတံ ဓာတုံ. အဝယဝေ စာယံ သမုဒါယဝေါဟာရော ယထာ ‘‘ပဋော ဍဍ္ဎော၊ သမုဒ္ဒေါ ဒိဋ္ဌော’’တိ စ. အဿာတိ ဂေါရူပဿ. မဂ္ဂန္တိ အာဂမနမဂ္ဂံ. န အဝေက္ခိဿန္တိ န ဩလောကယိံ. ကသ္မာ? န တဂ္ဂမနသာ သတီတိ၊ တဿံ ဂါဝိယံ ဂတမနာ ဌပိတမနာ န ဟောန္တီ၊ အညဒတ္ထု ဘဂဝတော ထူပဂတမနာ ဧဝ သမာနာတိ အတ္ထော. ‘‘တဒင်္ဂမနသာ သတီ’’တိ စ ပါဌော၊ တဒင်္ဂေ တဿ ဘဂဝတော ဓာတုယာ အင်္ဂေ မနော ဧတိဿာတိ တဒင်္ဂမနသာ. ဧဝံဘူတာ အဟံ တဒါ တဿာ မဂ္ဂံ နာဝေက္ခိဿန္တိ ဒဿေတိ.

၈၀၀. ထူပံ အပတ္တမာနသန္တိ ထူပံ စေတိယံ အသမ္ပတ္တအဇ္ဈာသယံ၊ မနသိ ဘဝေါတိ ဟိ မာနသော၊ အဇ္ဈာသယော မနောရထော. ‘‘ထူပံ ဥပဂန္တွာ ပုပ္ဖေဟိ ပူဇေဿာမီ’’တိ ဥပ္ပန္နမနောရထဿ အသမ္ပုဏ္ဏတာယ ဧဝံ ဝုတ္တံ. ထူပံ စေတိယံ ပန ပုပ္ဖေဟိ ပူဇနစိတ္တံ သိဒ္ဓမေဝ၊ ယေန သာ ဒေဝလောကေ ဥပ္ပန္န. တဉ္စာဟံ အဘိသဉ္စေယျန္တိ တဉ္စေ အဟံ အဘိသဉ္စိနေယျံ၊ ပုပ္ဖပူဇနေန ဟိ ပုညံ အဟံ ထူပံ အဘိဂန္တွာ ယထာဓိပ္ပါယံ ပူဇနေန သမ္မဒေဝ စိနေယျံ ဥပစိနေယျန္တိ အတ္ထော. ဘိယျော နူန ဣတော သိယာတိ ဣတော ယထာလဒ္ဓသမ္ပတ္တိတောပိ ဘိယျော ဥပရိ ဥတ္တရိတရာ သမ္ပတ္တိ သိယာတိ မညေတိ အတ္ထော.

၈၀၁. မဃဝါ ဒေဝကုဉ္ဇရာတိ အာလပနံ. တတ္ထ ဒေဝကုဉ္ဇရာတိ သဗ္ဗဗလပရက္ကမာဒိဝိသေသေဟိ ဒေဝေသု ကုဉ္ဇရသဒိသော. သဟဗျန္တိ သဟဘာဝံ.

၈၀၂. ‘‘ဣဒံ သုတွာ တိဒသာဓိပတိ၊ မဃဝါ ဒေဝကုဉ္ဇရော၊

တာဝတိံသေ ပသာဒေန္တော၊ မာတလိံ ဧတဒဗြဝီ’’တိ. –

ဣဒံ ဓမ္မသင်္ဂါဟကဝစနံ. တတော သက္ကော မာတလိပမုခဿ ဒေဝဂဏဿ ဣမာဟိ ဂါထာဟိ ဓမ္မံ ဒေသေသိ –

၈၀၃. ‘‘ပဿ မာတလိ အစ္ဆေရံ၊ စိတ္တံ ကမ္မဖလံ ဣဒံ၊

အပ္ပကမ္ပိ ကတံ ဒေယျံ၊ ပုညံ ဟောတိ မဟပ္ဖလံ.

၈၀၄. ‘‘နတ္ထိ စိတ္တေ ပသန္နမှိ၊ အပ္ပကာ နာမ ဒက္ခိဏာ၊

တထာဂတေ ဝါ သမ္ဗုဒ္ဓေ၊ အထ ဝါ တဿ သာဝကေ.

၈၀၅. ‘‘ဧဟိ မာတလိ အမှေပိ၊ ဘိယျော ဘိယျော မဟေမသေ၊

တထာဂတဿ ဓာတုယော၊ သုခေါ ပုညာနမုစ္စယော.

၈၀၆. ‘‘တိဋ္ဌန္တေ နိဗ္ဗုတေ စာပိ၊ သမေ စိတ္တေ သမံ ဖလံ၊

စေတောပဏိဓိဟေတုဟိ၊ သတ္တာ ဂစ္ဆန္တိ သုဂ္ဂတိံ.

၈၀၇. ‘‘ဗဟူနံ ဝတ အတ္ထာယ၊ ဥပ္ပဇ္ဇန္တိ တထာဂတာ၊

ယတ္ထ ကာရံ ကရိတွာန၊ သဂ္ဂံ ဂစ္ဆန္တိ ဒါယကာ’’တိ.

၈၀၂. တတ္ထ ပသာဒေန္တောတိ ပသန္နေ ကရောန္တော၊ ရတနတ္တယေ သဒ္ဓံ ဥပ္ပါဒေန္တောတိ အတ္ထော.

၈၀၃. စိတ္တန္တိ ဝိစိတ္တံ အစိန္တေယျံ. ကမ္မဖလန္တိ ဒေယျဓမ္မဿ အနုဠာရတ္တေပိ ခေတ္တသမ္ပတ္တိယာ စ စိတ္တသမ္ပတ္တိယာ စ ဥဠာရဿ ပုညကမ္မဿ ဖလံ ပဿာတိ ယောဇနာ. အပ္ပကမ္ပိ ကတံ ဒေယျံ၊ ပုညံ ဟောတိ မဟပ္ဖလန္တိ ဧတ္ထ ကတန္တိ ကာရဝသေန သက္ကာရဝသေန အာယတနေ ဝိနိယုတ္တံ. ဒေယျန္တိ ဒါတဗ္ဗဝတ္ထုံ. ပုညန္တိ တထာပဝတ္တံ ပုညကမ္မံ.

၈၀၄. ဣဒါနိ ယတ္ထ အပ္ပကမ္ပိ ကတံ ပုညံ မဟပ္ဖလံ ဟောတိ၊ တံ ပါကဋံ ကတွာ ဒဿေန္တော ‘‘နတ္ထိ စိတ္တေ ပသန္နမှီ’’တိ ဂါထမာဟ. တံ သုဝိညေယျမေဝ.

၈၀၅-၆. အမှေပီတိ မယမ္ပိ. မဟေမသေတိ မဟာမသေ ပူဇာမသေ. စေတောပဏိဓိဟေတု ဟီတိ အတ္တနော စိတ္တဿ သမ္မဒေဝ ဌပနနိမိတ္တံ၊ အတ္တသမ္မာပဏိဓာနေနာတိ အတ္ထော. တေနာဟ ဘဂဝါ –

‘‘န တံ မာတာပိတာ ကယိရာ၊ အညေ ဝါပိ စ ဉာတကာ၊

သမ္မာ ပဏိဟိတံ စိတ္တံ၊ သေယျသော နံ တတော ကရေ’’တိ. (ဓ. ပ. ၄၃)၊

ဧဝဉ္စ ပန ဝတွာ သက္ကော ဒေဝါနမိန္ဒော ဥယျာနကီဠာယ ဥဿာဟံ ပဋိပ္ပဿမ္ဘေတွာ တတောဝ ပဋိနိဝတ္တိတွာ အတ္တနာ အဘိဏှံ ပူဇနေယျဋ္ဌာနဘူတေ စူဠာမဏိစေတိယေ သတ္တာဟံ ပူဇံ အကာသိ. အထ အပရေန သမယေန ဒေဝစာရိကံ ဂတဿ အာယသ္မတော နာရဒတ္ထေရဿ တံ ပဝတ္တိံ ဂါထာဟေဝ ကထေသိ၊ ထေရော ဓမ္မသင်္ဂါဟကာနံ အာရောစေသိ၊ တေ တထာ နံ သင်္ဂဟံ အာရောပေသုန္တိ.

ပီတဝိမာနဝဏ္ဏနာ နိဋ္ဌိတာ.