၃. နာဂဝိမာနဝဏ္ဏနာ

အလင်္ကတာ မဏိကဉ္စနာစိတန္တိ နာဂဝိမာနံ. တဿ ကာ ဥပ္ပတ္တိ? ဘဂဝါ ဗာရာဏသိယံ ဝိဟရတိ ဣသိပတနေ မိဂဒါယေ. တေန သမယေန ဗာရာဏသိဝါသိနီ ဧကာ ဥပါသိကာ သဒ္ဓါ ပသန္နာ သီလာစာရသမ္ပန္နာ ဘဂဝန္တံ ဥဒ္ဒိဿ ဝတ္ထယုဂံ ဝါယာပေတွာ သုပရိဓောတံ ကာရာပေတွာ ဥပသင်္ကမိတွာ ဘဂဝတော ပါဒမူလေ ဌပေတွာ ဧဝမာဟ ‘‘ပဋိဂ္ဂဏှာတု၊ ဘန္တေ ဘဂဝါ၊ ဣမံ ဝတ္ထယုဂံ အနုကမ္ပံ ဥပါဒါယ ယံ မမ အဿ ဒီဃရတ္တံ ဟိတာယ သုခါယာ’’တိ. ဘဂဝါ တံ ပဋိဂ္ဂဟေတွာ တဿာ ဥပနိဿယသမ္ပတ္တိံ ဒိသွာ ဓမ္မံ ဒေသေသိ၊ သာ ဒေသနာဝသာနေ သောတာပတ္တိဖလေ ပတိဋ္ဌဟိတွာ ဘဂဝန္တံ ဝန္ဒိတွာ ပဒက္ခိဏံ ကတွာ ဂေဟံ အဂမာသိ. သာ န စိရဿေဝ ကာလံ ကတွာ တာဝတိံသေသု ဥပ္ပန္နာ သက္ကဿ ဒေဝရာဇဿ ပိယာ အဟောသိ ဝလ္လဘာ ယသုတ္တရာ နာမ နာမေန. တဿာ ပုညာနုဘာဝေန ဟေမဇာလသဉ္ဆန္နော ကုဉ္ဇရဝရော နိဗ္ဗတ္တိ၊ တဿ စ ခန္ဓေ မဏိမယော မဏ္ဍပေါ၊ မဇ္ဈေ သုပညတ္တရတနပလ္လင်္ကော နိဗ္ဗတ္တိ၊ ဒွီသု ဒန္တေသု စဿ ကမလကုဝလယုဇ္ဇလာ ရမဏီယာ ဒွေ ပေါက္ခရဏိယော ပါတုရဟေသုံ. တတ္ထ ပဒုမကဏ္ဏိကာသု ဌိတာ ဒေဝဓီတာ ပဂ္ဂဟိတပဉ္စင်္ဂိကတူရိယာ နစ္စန္တိ စေဝ ဂါယန္တိ စ.

သတ္ထာ ဗာရာဏသိယံ ယထာဘိရန္တံ ဝိဟရိတွာ ယေန သာဝတ္ထိ တေန စာရိကံ ပက္ကာမိ. အနုပုဗ္ဗေန သာဝတ္ထိံ ပတွာ တတြ သုဒံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ သာ ဒေဝတာ အတ္တနာ အနုဘုယျမာနံ ဒိဗ္ဗသမ္ပတ္တိံ ဩလောကေတွာ တဿာ ကာရဏံ ဥပဓာရေန္တီ ‘‘သတ္ထု ဝတ္ထယုဂဒါနကာရဏ’’န္တိ ဉတွာ သဉ္ဇာတသောမနဿာ ဘဂဝတိ ပသာဒဗဟုမာနာ ဝန္ဒိတုကာမာ အဘိက္ကန္တာယ ရတ္တိယာ ဟတ္ထိက္ခန္ဓဝရဂတာ အာကာသေန အာဂန္တွာ တတော ဩတရိတွာ ဘဂဝန္တံ ဝန္ဒိတွာ အဉ္ဇလိံ ပဂ္ဂယှ ဧကမန္တံ အဋ္ဌာသိ. တံ အာယသ္မာ ဝင်္ဂီသော ဘဂဝတော အနုညာယ ဣမာဟိ ဂါထာဟိ ပုစ္ဆိ –

၇၀၅. ‘‘အလင်္ကတာ မဏိကဉ္စနာစိတံ၊ သောဝဏ္ဏဇာလစိတံ မဟန္တံ၊

အဘိရုယှ ဂဇဝရံ သုကပ္ပိတံ၊ ဣဓာဂမာ ဝေဟာယသံ အန္တလိက္ခေ.

၇၀၆. ‘‘နာဂဿ ဒန္တေသု ဒုဝေသု နိမ္မိတာ၊ အစ္ဆောဒကာ ပဒုမိနိယော သုဖုလ္လာ၊

ပဒုမေသု စ တူရိယဂဏာ ပဘိဇ္ဇရေ၊ ဣမာ စ နစ္စန္တိ မနောဟရာယော.

၇၀၇. ‘‘ဒေဝိဒ္ဓိပတ္တာသိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၇၀၅. တတ္ထ အလင်္ကတာတိ သဗ္ဗာဘရဏဝိဘူသိတာ. မဏိကဉ္စနာစိတန္တိ တေဟိ ဒိဗ္ဗမာနေဟိ မဏိသုဝဏ္ဏေဟိ အာစိတံ. သောဝဏ္ဏဇာလစိတန္တိ ဟေမဇာလသဉ္ဆန္နံ. မဟန္တန္တိ ဝိပုလံ. သုကပ္ပိတန္တိ ဂမနသန္နာဟဝသေန သုဋ္ဌု သန္နဒ္ဓံ. ဝေဟာယသန္တိ ဝေဟာယသဘူတေ ဟတ္ထိပိဋ္ဌေ. အန္တလိက္ခေတိ အာကာသေ၊ ‘‘အလင်္ကတမဏိကဉ္စနာစိတ’’န္တိပိ ပါဌော. အယဉှေတ္ထ သင်္ခေပတ္ထော – ဒေဝတေ၊ တွံ သဗ္ဗာလင်္ကာရေဟိ အလင်္ကတာ အလင်္ကတမဏိကဉ္စနာစိတံ၊ အတိဝိယ ဒိဗ္ဗမာနေဟိ မဏီဟိ ကဉ္စနေဟိ စ အလင်္ကရဏဝသေန ခစိတံ၊ ဟေမဇာလေဟိ ကုမ္ဘာလင်္ကာရာဒိဘေဒေဟိ ဟတ္ထာလင်္ကာရေဟိ စိတံ အာမုတ္တံ မဟန္တံ အတိဝိယ ဗြဟန္တံ ဥတ္တမံ ဂဇံ အာရုယှ ဟတ္ထိပိဋ္ဌိယာ နိသိန္နာ အာကာသေနေဝ ဣဓ အမှာကံ သန္တိကံ အာဂတာတိ.

၇၀၆. နာဂဿ ဒန္တေသု ဒုဝေသု နိမ္မိတာတိ ဧရာဝဏဿ ဝိယ နာဂရာဇဿ ဣမဿ ဒွီသု ဒန္တေသု ဒွေ ပေါက္ခရဏိယော သုစရိတသိပ္ပိနာ သုဋ္ဌု ဝိရစိတာ. တူရိယဂဏာတိ ပဉ္စင်္ဂိကတူရိယသမူဟာ. ပဘိဇ္ဇရေတိ ဒွါဒသန္နံ လယဘေဒါနံ ဝသေန ပဘေဒံ ဂစ္ဆန္တိ. ‘‘ပဝဇ္ဇရေ’’တိ စ ပဌန္တိ၊ ပကာရေဟိ ဝါဒီယန္တီတိ အတ္ထော.

ဧဝံ ထေရေန ပုဋ္ဌာ ဒေဝတာ ဣမာဟိ ဂါထာဟိ ဝိဿဇ္ဇေသိ –

၇၀၈. ‘‘ဗာရာဏသိယံ ဥပသင်္ကမိတွာ၊ ဗုဒ္ဓဿဟံ ဝတ္ထယုဂံ အဒါသိံ၊

ပါဒါနိ ဝန္ဒိတွာ ဆမာ နိသီဒိံ၊ ဝိတ္တာ စဟံ အဉ္ဇလိကံ အကာသိံ.

၇၀၉. ‘‘ဗုဒ္ဓေါ စ မေ ကဉ္စနသန္နိဘတ္တစော၊ အဒေသယိ သမုဒယဒုက္ခနိစ္စတံ၊

အသင်္ခတံ ဒုက္ခနိရောဓသဿတံ၊ မဂ္ဂံ အဒေသယိ ယတော ဝိဇာနိသံ.

၇၁၀. ‘‘အပ္ပါယုကီ ကာလကတာ တတော စုတာ၊ ဥပပန္နာ တိဒသဂဏံ ယသဿိနီ၊

သက္ကဿဟံ အညတရာ ပဇာပတိ၊ ယသုတ္တရာ နာမ ဒိသာသု ဝိဿုတာ’’တိ.

၇၀၈-၉. တတ္ထ ဆမာတိ ဘူမိယံ. ဘုမ္မတ္ထေ ဟိ ဣဒံ ပစ္စတ္တဝစနံ. ဝိတ္တာတိ တုဋ္ဌာ. ယတောတိ ယတော သတ္ထု သာမုက္ကံသိကဓမ္မဒေသနတော. ဝိဇာနိသန္တိ စတ္တာရိ အရိယသစ္စာနိ ပဋိဝိဇ္ဈိံ.

၇၁၀. အပ္ပါယုကီတိ ‘‘ဤဒိသံ နာမ ဥဠာရံ ပုညံ ကတွာ န တယာ ဧတသ္မိံ ဒုက္ခဗဟုလေ မနုဿတ္တဘာဝေ ဧဝံ ဌာတဗ္ဗ’’န္တိ သဉ္ဇာတာဘိသန္ဓိနာ ဝိယ ပရိက္ခယံ ဂတေန ကမ္မုနာ အပ္ပါယုကာ သမာနာ. အညတရာ ပဇာပတီတိ သောဠသသဟဿာနံ မဟေသီနံ အညတရာ. ဒိသာသု ဝိဿုတာတိ ဒွီသု ဒေဝလောကေသု သဗ္ဗဒိသာသု ပါကဋာ ပညာတာ. သေသံ ဝုတ္တနယမေဝ.

နာဂဝိမာနဝဏ္ဏနာ နိဋ္ဌိတာ.