၁. မဉ္ဇိဋ္ဌကဝိမာနဝဏ္ဏနာ

မဉ္ဇိဋ္ဌကဝဂ္ဂေ မဉ္ဇိဋ္ဌကေ ဝိမာနသ္မိန္တိ မဉ္ဇိဋ္ဌကဝိမာနံ. တဿ ကာ ဥပ္ပတ္တိ? ဘဂဝါ သာဝတ္ထိယံ ဝိဟရတိ ဇေတဝနေ. တတ္ထ အညတရော ဥပါသကော ဘဂဝန္တံ နိမန္တေတွာ အနန္တရဝိမာနေ ဝုတ္တနယေနေဝ မဏ္ဍပံ သဇ္ဇေတွာ တတ္ထ နိသိန္နံ သတ္ထာရံ ပူဇေတွာ ဒါနံ ဒေတိ. တေန စ သမယေန အညတရာ ကုလဒါသီ အန္ဓဝနေ သုပုပ္ဖိတံ သာလရုက္ခံ ဒိသွာ တတ္ထ ပုပ္ဖါနိ ဂဟေတွာ ဟီရေဟိ အာဝုဏိတွာ ဝဋံသကေ ကတွာ ပုန ဗဟူနိ မုတ္တပုပ္ဖါနိ အဂ္ဂပုပ္ဖါနိ စ ဂဟေတွာ နဂရံ ပဝိဋ္ဌာ. တသ္မိံ မဏ္ဍပေ ယုဂန္ဓရပဗ္ဗတကုစ္ဆိံ ဩဘာသယမာနံ ဗာလသူရိယံ ဝိယ ဆဗ္ဗဏ္ဏဗုဒ္ဓရံသိယော ဝိဿဇ္ဇေတွာ နိသိန္နံ၊ ဘဂဝန္တံ ဒိသွာ ပသန္နစိတ္တာ တေဟိ ပုပ္ဖေဟိ ပူဇေန္တီ ဝဋံသကာနိ အာသနဿ သမန္တတော ဌပေတွာ ဣတရာနိ စ ပုပ္ဖါနိ ဩကိရိတွာ သက္ကစ္စံ ဝန္ဒိတွာ တိက္ခတ္တုံ ပဒက္ခိဏံ ကတွာ အဂမာသိ. သာ အပရဘာဂေ ကာလံ ကတွာ တာဝတိံသဘဝနေ နိဗ္ဗတ္တိ၊ တတ္ထ တဿာ ရတ္တဖလိကမယံ ဝိမာနံ၊ တဿ စ ပုရတော သုဝဏ္ဏဝါလုကာသန္ထတဘူမိဘာဂံ မဟန္တံ သာလဝနံ ပါတုရဟောသိ. သာ ယဒါ ဝိမာနတော နိက္ခမိတွာ သာလဝနံ ပဝိသတိ၊ တဒါ သာလသာခါ ဩနမိတွာ တဿာ ဥပရိ ကုသုမာနိ ဩကိရန္တိ. တံ အာယသ္မာ မဟာမောဂ္ဂလ္လာနော ဟေဋ္ဌာ ဝုတ္တနယေန ဥပဂန္တွာ ဣမာဟိ ဂါထာဟိ ကတကမ္မံ ပုစ္ဆိ –

၆၈၉. ‘‘မဉ္ဇိဋ္ဌကေ ဝိမာနသ္မိံ၊ သောဏ္ဏဝါလုကသန္ထတေ၊

ပဉ္စင်္ဂိကေန တူရိယေန၊ ရမသိ သုပ္ပဝါဒိတေ.

၆၉၀. ‘‘တမှာ ဝိမာနာ ဩရုယှ၊ နိမ္မိတာ ရတနာမယာ၊

ဩဂါဟသိ သာလဝနံ၊ ပုပ္ဖိတံ သဗ္ဗကာလိကံ.

၆၉၁. ‘‘ယဿ ယဿေဝ သာလဿ၊ မူလေ တိဋ္ဌသိ ဒေဝတေ၊

သော သော မုဉ္စတိ ပုပ္ဖါနိ၊ ဩနမိတွာ ဒုမုတ္တမော.

၆၉၂. ‘‘ဝါတေရိတံ သာလဝနံ၊ အာဓုတံ ဒိဇသေဝိတံ၊

ဝါတိ ဂန္ဓော ဒိသာ သဗ္ဗာ၊ ရုက္ခော မဉ္ဇူသကော ယထာ.

၆၉၃. ‘‘ဃာယသေ တံ သုစိဂန္ဓံ၊ ရူပံ ပဿသိ အမာနုသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၈၉. တတ္ထ မဉ္ဇိဋ္ဌကေ ဝိမာနသ္မိန္တိ ရတ္တဖလိကမယေ ဝိမာနေ. သိန္ဒုဝါရကဏဝီရမကုလသဒိသဝဏ္ဏဉှိ ‘‘မဉ္ဇိဋ္ဌက’’န္တိ ဝုစ္စတိ. သောဏ္ဏဝါလုကသန္ထတေတိ သမန္တတော ဝိပ္ပကိဏ္ဏာဟိ သုဝဏ္ဏဝါလုကာဟိ သန္ထတဘူမိဘာဂေ. ရမသိ သုပ္ပဝါဒိတေတိ သုဋ္ဌု ပဝါဒိတေန ပဉ္စင်္ဂိကေန တူရိယေန အဘိရမသိ.

၆၉၀. နိမိတ္တာ ရတနာမယာတိ တဝ သုစရိတသိပ္ပိနာ အဘိနိမ္မိတာ ရတနမယာ ဝိမာနာ. ဩဂါဟသီတိ ပဝိသသိ. သဗ္ဗကာလိကန္တိ သဗ္ဗကာလေ သုခံ သဗ္ဗဥတုသပ္ပါယံ၊ သဗ္ဗကာလေ ပုပ္ဖနကံ ဝါ.

၆၉၂. ဝါတေရိတန္တိ ယထာ ပုပ္ဖါနိ ဩကိရန္တိ၊ ဧဝံ ဝါတေန ဤရိတံ စလိတံ. အာဓုတန္တိ မန္ဒေန မာလုတေန သဏိကသဏိကံ ဝိဓူပယမာနံ. ဒိဇသေဝိတန္တိ မယူရကောကိလာဒိသကုဏသံဃေဟိ ဥပသေဝိတံ.

ဧဝံ ထေရေန ပုဋ္ဌာ သာ ဒေဝတာ ဣမာဟိ ဂါထာဟိ ဗျာကာသိ –

၆၉၄. ‘‘အဟံ မနုဿေသု မနုဿဘူတာ၊ ဒါသီ အယိရကုလေ အဟုံ၊

ဗုဒ္ဓံ နိသိန္နံ ဒိသွာန၊ သာလပုပ္ဖေဟိ ဩကိရိံ.

၆၉၅. ‘‘ဝဋံသကဉ္စ သုကတံ၊ သာလပုပ္ဖမယံ အဟံ၊

ဗုဒ္ဓဿ ဥပနာမေသိံ၊ ပသန္နာ သေဟိ ပါဏိဘိ.

၆၉၆. ‘‘တာဟံ ကမ္မံ ကရိတွာန၊ ကုသလံ ဗုဒ္ဓဝဏ္ဏိတံ၊

အပေတသောကာ သုခိတာ၊ သမ္ပမောဒါမနာမယာ’’တိ.

၆၉၄-၅. တတ္ထ အယိရကုလေတိ အယျကုလေ၊ သာမိကဂေဟေတိ အတ္ထော. အဟုန္တိ အဟောသိံ. ဩကိရိန္တိ ပုပ္ဖေဟိ ဝိပ္ပကိရိံ. ဥပနာမေသိန္တိ ပူဇာဝသေန ဥပနာမေသိံ. သေသံ ဝုတ္တနယမေဝ.

အထာယသ္မာ မဟာမောဂ္ဂလ္လာနော သပရိဝါရာယ တဿာ ဒေဝတာယ ဓမ္မံ ဒေသေတွာ မနုဿလောကံ အာဂန္တွာ ဘဂဝတော တမတ္ထံ နိဝေဒေသိ. ဘဂဝါ တံ အဋ္ဌုပ္ပတ္တိံ ကတွာ သမ္ပတ္တမဟာဇနဿ ဓမ္မံ ဒေသေသိ. ဒေသနာ သဒေဝကဿ လောကဿ သာတ္ထိကာ အဟောသီတိ.

မဉ္ဇိဋ္ဌကဝိမာနဝဏ္ဏနာ နိဋ္ဌိတာ.