၅. စုန္ဒသုတ္တဝဏ္ဏနာ

၇၅. ပဉ္စမေ မလ္လေသူတိ ဧဝံနာမကေ ဇနပဒေ. မဟတာ ဘိက္ခုသံဃေနာတိ ဂုဏမဟတ္တသင်္ချာမဟတ္တေဟိ မဟတာ. သော ဟိ ဘိက္ခုသံဃော သီလာဒိဂုဏဝိသေသယောဂေနပိ မဟာ တတ္ထ သဗ္ဗပစ္ဆိမကဿ သောတာပန္နဘာဝတော၊ သင်္ချာမဟတ္တေနပိ မဟာ အပရိစ္ဆိန္နဂဏနတ္တာ. အာယုသင်္ခါရောဿဇ္ဇနတော ပဋ္ဌာယ ဟိ အာဂတာဂတာ ဘိက္ခူ န ပက္ကမိံသု. စုန္ဒဿာတိ ဧဝံနာမကဿ. ကမ္မာရပုတ္တဿာတိ သုဝဏ္ဏကာရပုတ္တဿ. သော ကိရ အဍ္ဎော မဟာကုဋုမ္ဗိကော ဘဂဝတော ပဌမဒဿနေနေဝ သောတာပန္နော ဟုတွာ အတ္တနော အမ္ဗဝနေ သတ္ထုဝသနာနုစ္ဆဝိကံ ဂန္ဓကုဋိံ၊ ဘိက္ခုသံဃဿ စ ရတ္တိဋ္ဌာနဒိဝါဋ္ဌာနဥပဋ္ဌာနသာလာကုဋိမဏ္ဍပစင်္ကမနာဒိကေ စ သမ္ပာဒေတွာ ပါကာရပရိက္ခိတ္တံ ဒွါရကောဋ္ဌကယုတ္တံ ဝိဟာရံ ကတွာ ဗုဒ္ဓပ္ပမုခဿ သံဃဿ နိယျာဒေသိ. တံ သန္ဓာယ ဝုတ္တံ – ‘‘တတြ သုဒံ ဘဂဝါ ပါဝါယံ ဝိဟရတိ စုန္ဒဿ ကမ္မာရပုတ္တဿ အမ္ဗဝနေ’’တိ.

ပဋိယာဒါပေတွာတိ သမ္ပာဒေတွာ. ‘‘သူကရမဒ္ဒဝန္တိ သူကရဿ မုဒုသိနိဒ္ဓံ ပဝတ္တမံသ’’န္တိ မဟာအဋ္ဌကထာယံ ဝုတ္တံ. ကေစိ ပန ‘‘သူကရမဒ္ဒဝန္တိ န သူကရမံသံ၊ သူကရေဟိ မဒ္ဒိတဝံသကဠီရော’’တိ ဝဒန္တိ. အညေ ‘‘သူကရေဟိ မဒ္ဒိတပ္ပဒေသေ ဇာတံ အဟိဆတ္တက’’န္တိ. အပရေ ပန ‘‘သူကရမဒ္ဒဝံ နာမ ဧကံ ရသာယန’’န္တိ ဘဏိံသု. တဉှိ စုန္ဒော ကမ္မာရပုတ္တော ‘‘အဇ္ဇ ဘဂဝါ ပရိနိဗ္ဗာယိဿတီ’’တိ သုတွာ ‘‘အပ္ပေဝ နာမ နံ ပရိဘုဉ္ဇိတွာ စိရတရံ တိဋ္ဌေယျာ’’တိ သတ္ထု စိရဇီဝိတုကမျတာယ အဒါသီတိ ဝဒန္တိ.

တေန မံ ပရိဝိသာတိ တေန မမံ ဘောဇေဟိ. ကသ္မာ ဘဂဝါ ဧဝမာဟ? ပရာနုဒ္ဒယတာယ. တဉ္စ ကာရဏံ ပါဠိယံ ဝုတ္တမေဝ. တေန အဘိဟဋဘိက္ခာယ ပရေသံ အပရိဘောဂါရဟတော စ တထာ ဝတ္တုံ ဝဋ္ဋတီတိ ဒဿိတံ ဟောတိ. တသ္မိံ ကိရ သူကရမဒ္ဒဝေ ဒွိသဟဿဒီပပရိဝါရေသု စတူသု မဟာဒီပေသု ဒေဝတာ ဩဇံ ပက္ခိပိံသု. တသ္မာ တံ အညော ကောစိ သမ္မာ ဇီရာပေတုံ န သက္ကောတိ၊ တမတ္ထံ ပကာသေန္တော သတ္ထာ ပရူပဝါဒမောစနတ္ထံ ‘‘နာဟံ တံ၊ စုန္ဒ၊ ပဿာမီ’’တိအာဒိနာ သီဟနာဒံ နဒိ. ယေ ဟိ ပရေ ဥပဝဒေယျုံ ‘‘အတ္တနာ ပရိဘုတ္တာဝသေသံ နေဝ ဘိက္ခူနံ၊ န အညေသံ မနုဿာနံ အဒါသိ၊ အာဝါဋေ နိခဏာပေတွာ ဝိနာသေသီ’’တိ၊ ‘‘တေသံ ဝစနောကာသော မာ ဟောတူ’’တိ ပရူပဝါဒမောစနတ္ထံ သီဟနာဒံ နဒိ.

တတ္ထ သဒေဝကေတိအာဒီသု သဟ ဒေဝေဟီတိ သဒေဝကော၊ သဟ မာရေနာတိ သမာရကော၊ သဟ ဗြဟ္မုနာတိ သဗြဟ္မကော၊ သဟ သမဏဗြာဟ္မဏေဟီတိ သဿမဏဗြာဟ္မဏီ၊ ပဇာတတ္တာ ပဇာ၊ သဟ ဒေဝမနုဿေဟီတိ သဒေဝမနုဿာ. တသ္မိံ သဒေဝကေ လောကေ။ပေ။ သဒေဝမနုဿာယ. တတ္ထ သဒေဝကဝစနေန ပဉ္စကာမာဝစရဒေဝဂ္ဂဟဏံ၊ သမာရကဝစနေန ဆဋ္ဌကာမာဝစရဒေဝဂ္ဂဟဏံ၊ သဗြဟ္မကဝစနေန ဗြဟ္မကာယိကာဒိဗြဟ္မဂ္ဂဟဏံ၊ သဿမဏဗြာဟ္မဏီဝစနေန သာသနဿ ပစ္စတ္ထိကပစ္စာမိတ္တသမဏဗြာဟ္မဏဂ္ဂဟဏံ သမိတပါပဗာဟိတပါပသမဏဗြာဟ္မဏဂ္ဂဟဏဉ္စ၊ ပဇာဝစနေန သတ္တလောကဂ္ဂဟဏံ၊ သဒေဝမနုဿဝစနေန သမ္မုတိဒေဝအဝသေသမနုဿဂ္ဂဟဏံ. ဧဝမေတ္ထ တီဟိ ပဒေဟိ ဩကာသလောကဝသေန၊ ဒွီဟိ ပဇာဝသေန သတ္တလောကော ဂဟိတောတိ ဝေဒိတဗ္ဗော. အပရော နယော – သဒေဝကဝစနေန အရူပါဝစရလောကော ဂဟိတော၊ သမာရကဝစနေန ဆကာမာဝစရဒေဝလောကော၊ သဗြဟ္မကဝစနေန ရူပီ ဗြဟ္မလောကော၊ သဿမဏဗြာဟ္မဏဝစနေန စတုပရိသဝသေန သမ္မုတိဒေဝေဟိ သဟ မနုဿလောကော၊ အဝသေသသတ္တလောကော ဝါ ဂဟိတောတိ ဝေဒိတဗ္ဗော.

ဘုတ္တာဝိဿာတိ ဘုတ္တဝတော. ခရောတိ ဖရုသော. အာဗာဓောတိ ဝိသဘာဂရောဂေါ. ပဗာဠှာတိ ဗလဝတိယော. မာရဏန္တိကာတိ မရဏန္တာ မရဏသမီပပါပနသမတ္ထာ. သတော သမ္ပဇာနော အဓိဝါသေသီတိ သတိံ ဥပဋ္ဌိတံ ကတွာ ဉာဏေန ပရိစ္ဆိန္ဒိတွာ အဓိဝါသေသိ. အဝိဟညမာနောတိ ဝေဒနာနုဝတ္တနဝသေန အသလ္လက္ခိတဓမ္မော ဝိယ အပရာပရံ ပရိဝတ္တနံ အကရောန္တော အပီဠိယမာနော အဒုက္ခိယမာနော ဝိယ အဓိဝါသေသိ. ဘဂဝတော ဟိ ဝေဠုဝဂါမကေယေဝ တာ ဝေဒနာ ဥပ္ပန္နာ၊ သမာပတ္တိဗလေန ပန ဝိက္ခမ္ဘိတာ ယာဝ ပရိနိဗ္ဗာနဒိဝသာ န ဥပ္ပဇ္ဇိံသု ဒိဝသေ ဒိဝသေ သမာပတ္တီဟိ ပဋိပဏာမနတော. တံ ဒိဝသံ ပန ပရိနိဗ္ဗာယိတုကာမော ‘‘ကောဋိသဟဿဟတ္ထီနံ ဗလံ ဓာရေန္တာနံ ဝဇိရသင်္ဃာတသမာနကာယာနံ အပရိမိတကာလံ ဥပစိတပုညသမ္ဘာရာနမ္ပိ ဘဝေ သတိ ဧဝရူပါ ဝေဒနာ ပဝတ္တန္တိ၊ ကိမင်္ဂံ ပန အညေသ’’န္တိ သတ္တာနံ သံဝေဂဇနနတ္ထံ သမာပတ္တိံ န သမာပဇ္ဇိ၊ တေန ဝေဒနာ ခရာ ဝတ္တိံသု. အာယာမာတိ ဧဟိ ယာမ.

စုန္ဒဿ ဘတ္တံ ဘုဉ္ဇိတွာတိအာဒိကာ အပရဘာဂေ ဓမ္မသင်္ဂါဟကေဟိ ဌပိတာ ဂါထာ. တတ္ထ ဘုတ္တဿ စ သူကရမဒ္ဒဝေနာတိ ဘုတ္တဿ ဥဒပါဒိ၊ န ပန ဘုတ္တပစ္စယာ. ယဒိ ဟိ အဘုတ္တဿ ဥပ္ပဇ္ဇိဿာ၊ အတိခရော အဘဝိဿာ၊ သိနိဒ္ဓဘောဇနံ ပန ဘုတ္တတ္တာ တနုကာ ဝေဒနာ အဟောသိ၊ တေနေဝ ပဒသာ ဂန္တုံ အသက္ခိ. ဧတေန ယွာယံ ‘‘ယဿ တံ ပရိဘုတ္တံ သမ္မာ ပရိဏာမံ ဂစ္ဆေယျ အညတြ တထာဂတဿာ’’တိ သီဟနာဒေါ နဒိတော၊ တဿ သာတ္ထကတာ ဒဿိတာ. ဗုဒ္ဓါနဉှိ အဋ္ဌာနေ ဂဇ္ဇိတံ နာမ နတ္ထိ. ယသ္မာ တံ ပရိဘုတ္တံ ဘဂဝတော န ကိဉ္စိ ဝိကာရံ ဥပ္ပါဒေသိ၊ ကမ္မေန ပန လဒ္ဓေါကာသေန ဥပ္ပါဒိယမာနံ ဝိကာရံ အပ္ပမတ္တတာယ ဥပသမေန္တော သရီရေ ဗလံ ဥပ္ပါဒေသိ၊ ယေန ယထာ ဝက္ခမာနံ တိဝိဓံ ပယောဇနံ သမ္ပာဒေသိ၊ တသ္မာ သမ္မဒေဝ တံ ပရိဏာမံ ဂတံ၊ မာရဏန္တိကတ္တာ ပန ဝေဒနာနံ အဝိညာတံ အပါကဋံ အဟောသီတိ. ဝိရိစ္စမာနောတိ အဘိဏှံ ပဝတ္တလောဟိတဝိရေစနောဝ သမာနော. အဝေါစာတိ အတ္တနာ ဣစ္ဆိတဋ္ဌာနေ ပရိနိဗ္ဗာနတ္ထာယ ဧဝမာဟ.

ကသ္မာ ပန ဘဂဝါ ဧဝံ ရောဂေ ဥပ္ပန္နေ ကုသိနာရံ အဂမာသိ၊ ကိံ အညတ္ထ န သက္ကာ ပရိနိဗ္ဗာယိတုန္တိ? ပရိနိဗ္ဗာယိတုံ နာမ န ကတ္ထစိ န သက္ကာ၊ ဧဝံ ပန စိန္တေသိ – မယိ ကုသိနာရံ ဂတေ မဟာသုဒဿနသုတ္တဒေသနာယ (ဒီ. နိ. ၂.၂၄၁) အဋ္ဌုပ္ပတ္တိ ဘဝိဿတိ၊ တာယ ယာ ဒေဝလောကေ အနုဘဝိတဗ္ဗသဒိသာ သမ္ပတ္တိ မနုဿလောကေ မယာ အနုဘူတာ၊ တံ ဒွီဟိ ဘာဏဝါရေဟိ ပဋိမဏ္ဍေတွာ ဒေသေဿာမိ၊ တံ သုတွာ ဗဟူ ဇနာ ကုသလံ ကတ္တဗ္ဗံ မညိဿန္တိ. သုဘဒ္ဒေါပိ ကတ္ထ မံ ဥပသင်္ကမိတွာ ပဉှံ ပုစ္ဆိတွာ ဝိဿဇ္ဇနပရိယောသာနေ သရဏေသု ပတိဋ္ဌာယ ပဗ္ဗဇိတွာ လဒ္ဓူပသမ္ပဒေါ ကမ္မဋ္ဌာနံ ဘာဝေတွာ မယိ ဓရန္တေယေဝ အရဟတ္တံ ပတွာ ပစ္ဆိမသာဝကော နာမ ဘဝိဿတိ. အညတ္ထ မယိ ပရိနိဗ္ဗုတေ ဓာတုနိမိတ္တံ မဟာကလဟော ဘဝိဿတိ၊ လောဟိတံ နဒီ ဝိယ သန္ဒိဿတိ. ကုသိနာရာယံ ပန ပရိနိဗ္ဗုတေ ဒေါဏဗြာဟ္မဏော တံ ဝိဝါဒံ ဝူပသမေတွာ ဓာတုယော ဝိဘဇိတွာ ဒဿတီတိ ဣမာနိ တီဏိ ကာရဏာနိ ပဿန္တော ဘဂဝါ မဟတာ ဥဿာဟေန ကုသိနာရံ အဂမာသိ.

ဣင်္ဃာတိ စောဒနတ္ထေ နိပါတော. ကိလန္တောသ္မီတိ ပရိဿန္တော အသ္မိ. တေန ယထာဝုတ္တဝေဒနာနံ ဗလဝဘာဝံ ဧဝ ဒဿေတိ. ဘဂဝါ ဟိ အတ္တနော အာနုဘာဝေန တဒါ ပဒသာ အဂမာသိ၊ အညေသံ ပန ယထာ ပဒုဒ္ဓါရမ္ပိ ကာတုံ န သက္ကာ၊ တထာ ဝေဒနာ တိခိဏာ ခရာ ကဋုကာ ဝတ္တိံသု. တေနေဝါဟ ‘‘နိသီဒိဿာမီ’’တိ.

ဣဒါနီတိ အဓုနာ. လုဠိတန္တိ မဒ္ဒိတံ ဝိယ အာကုလံ. အာဝိလန္တိ အာလုလံ. အစ္ဆောဒကာတိ တနုပသန္နသလိလာ. သာတောဒကာတိ မဓုရတောယာ. သီတောဒကာတိ သီတလဇလာ. သေတောဒကာတိ နိက္ကဒ္ဒမာ. ဥဒကဉှိ သဘာဝတော သေတဝဏ္ဏံ၊ ဘူမိဝသေန ကဒ္ဒမာဝိလတာယ စ အညာဒိသံ ဟောတိ၊ ကကုဓာပိ နဒီ ဝိမလဝါလိကာ သမောကိဏ္ဏာ သေတဝဏ္ဏာ သန္ဒတိ. တေန ဝုတ္တံ ‘‘သေတောဒကာ’’တိ. သုပတိတ္ထာတိ သုန္ဒရတိတ္ထာ. ရမဏီယာတိ မနောဟရဘူမိဘာဂတာယ ရမိတဗ္ဗာ ယထာဝုတ္တဥဒကသမ္ပတ္တိယာ စ မနောရမာ.

ကိလန္တောသ္မိ စုန္ဒက၊ နိပဇ္ဇိဿာမီတိ တထာဂတဿ ဟိ –

‘‘ကာဠာဝကဉ္စ ဂင်္ဂေယျံ၊ ပဏ္ဍရံ တမ္ဗပိင်္ဂလံ၊

ဂန္ဓမင်္ဂလဟေမဉ္စ၊ ဥပေါသထဆဒ္ဒန္တိမေ ဒသာ’’တိ. –

ဧဝံ ဝုတ္တေသု ဒသသု ဟတ္ထိကုလေသု ကာဠာဝကသင်္ခါတာနံ ယံ ဒသန္နံ ပကတိဟတ္ထီနံ ဗလံ၊ တံ ဧကဿ ဂင်္ဂေယျဿာတိ ဧဝံ ဒသဂုဏိတာယ ဂဏနာယ ပကတိဟတ္ထီနံ ကောဋိသဟဿဗလပ္ပမာဏံ သရီရဗလံ. တံ သဗ္ဗမ္ပိ တသ္မိံ ဒိဝသေ ပစ္ဆာဘတ္တတော ပဋ္ဌာယ စင်္ဂဝါရေ ပက္ခိတ္တဥဒကံ ဝိယ ပရိက္ခယံ ဂတံ. ပါဝါယ တိဂါဝုတေ ကုသိနာရာ. ဧတသ္မိံ အန္တရေ ပဉ္စဝီသတိယာ ဌာနေသု နိသီဒိတွာ မဟန္တံ ဥဿာဟံ ကတွာ အာဂစ္ဆန္တော သူရိယတ္ထင်္ဂမနဝေလာယ ဘဂဝါ ကုသိနာရံ ပါပုဏီတိ ဧဝံ ‘‘ရောဂေါ နာမ သဗ္ဗံ အာရောဂျံ မဒ္ဒန္တော အာဂစ္ဆတီ’’တိ ဣမမတ္ထံ ဒဿေန္တော သဒေဝကဿ လောကဿ သံဝေဂကရံ ဝါစံ ဘာသန္တော ‘‘ကိလန္တောသ္မိ၊ စုန္ဒက၊ နိပဇ္ဇိဿာမီ’’တိ အာဟ.

သီဟသေယျန္တိ ဧတ္ထ ကာမဘောဂီသေယျာ ပေတသေယျာ တထာဂတသေယျာ သီဟသေယျာတိ စတဿော သေယျာ. တတ္ထ ‘‘ယေဘုယျေန၊ ဘိက္ခဝေ၊ ကာမဘောဂီ ဝါမေန ပဿေန သေယျံ ကပ္ပေန္တီ’’တိ (အ. နိ. ၄.၂၄၆) အယံ ကာမဘောဂီသေယျာ. ‘‘ယေဘုယျေန၊ ဘိက္ခဝေ၊ ပေတာ ဥတ္တာနာ သေန္တီ’’တိ (အ. နိ. ၄.၂၄၆) အယံ ပေတသေယျာ. စတုတ္ထဇ္ဈာနံ တထာဂတသေယျာ. ‘‘သီဟော၊ ဘိက္ခဝေ၊ မိဂရာဇာ ဒက္ခိဏေန ပဿေန သေယျံ ကပ္ပေတီ’’တိ (အ. နိ. ၄.၂၄၆) အယံ သီဟသေယျာ. အယဉှိ တေဇုဿဒဣရိယာပထတ္တာ ဥတ္တမသေယျာ နာမ. တေန ဝုတ္တံ – ‘‘ဒက္ခိဏေန ပဿေန သီဟသေယျံ ကပ္ပေသီ’’တိ. ပါဒေ ပါဒန္တိ ဒက္ခိဏပါဒေ ဝါမပါဒံ. အစ္စာဓာယာတိ အတိအာဓာယ၊ ဂေါပ္ဖကံ အတိက္ကမ္မ ဌပေတွာ. ဂေါပ္ဖကေန ဟိ ဂေါပ္ဖကေ၊ ဇာဏုနာ ဇာဏုမှိ သင်္ဃဋ္ဋိယမာနေ အဘိဏှံ ဝေဒနာ ဥပ္ပဇ္ဇန္တိ၊ သေယျာ ဖာသုကာ န ဟောတိ. ယထာ ပန န သင်္ဃဋ္ဋေတိ၊ ဧဝံ အတိက္ကမ္မ ဌပိတေ ဝေဒနာ နုပ္ပဇ္ဇန္တိ၊ သေယျာ ဖာသုကာ ဟောတိ. တသ္မာ ဧဝံ နိပဇ္ဇိ.

ဂန္တွာန ဗုဒ္ဓေါတိ ဣမာ ဂါထာ အပရဘာဂေ ဓမ္မသင်္ဂါဟကေဟိ ဌပိတာ. တတ္ထ နဒိကန္တိ နဒိံ. အပ္ပဋိမောဓ လောကေတိ အပ္ပဋိမော ဣဓ ဣမသ္မိံ သဒေဝကေ လောကေ. နှတွာ စ ပိဝိတွာ စုဒတာရီတိ ဂတ္တာနံ သီတိကရဏဝသေန နှတွာ စ ပါနီယံ ပိဝိတွာ စ နဒိတော ဥတ္တရိ. တဒါ ကိရ ဘဂဝတိ နှာယန္တေ အန္တောနဒိယံ မစ္ဆကစ္ဆပါ၊ ဥဒကံ၊ ဥဘောသု တီရေသု ဝနသဏ္ဍော၊ သဗ္ဗော စ သော ဘူမိဘာဂေါတိ သဗ္ဗံ သုဝဏ္ဏဝဏ္ဏမေဝ အဟောသိ. ပုရက္ခတောတိ ဂုဏဝိသိဋ္ဌသတ္တုတ္တမဂရုဘာဝတော သဒေဝကေန လောကေန ပူဇာသမ္မာနဝသေန ပုရက္ခတော. ဘိက္ခုဂဏဿ မဇ္ဈေတိ ဘိက္ခုသံဃဿ မဇ္ဈေ. တဒါ ဘိက္ခူ ဘဂဝတော ဝေဒနာနံ အဓိမတ္တဘာဝံ ဝိဒိတွာ အာသန္နာ ဟုတွာ သမန္တတော ပရိဝါရေတွာဝ ဂစ္ဆန္တိ. သတ္ထာတိ ဒိဋ္ဌဓမ္မိကသမ္ပရာယိကပရမတ္ထေဟိ သတ္တာနံ အနုသာသနတော သတ္ထာ. ပဝတ္တာ ဘဂဝါ ဣဓ ဓမ္မေတိ ဘာဂျဝန္တတာဒီဟိ ဘဂဝါ ဣဓ သီလာဒိသာသနဓမ္မေ ပဝတ္တာ၊ ဓမ္မေ ဝါ စတုရာသီတိဓမ္မက္ခန္ဓသဟဿာနိ ပဝတ္တာ ပဝတ္တေတာ. အမ္ဗဝနန္တိ တဿာ ဧဝ နဒိယာ တီရေ အမ္ဗဝနံ. အာမန္တယိ စုန္ဒကန္တိ တသ္မိံ ကိရ ခဏေ အာယသ္မာ အာနန္ဒော ဥဒကသာဋိကံ ပီဠေန္တော ဩဟီယိ၊ စုန္ဒကတ္ထေရော သမီပေ အဟောသိ. တသ္မာ တံ ဘဂဝါ အာမန္တယိ. ပမုခေ နိသီဒီတိ ဝတ္တသီသေန သတ္ထု ပုရတော နိသီဒိ ‘‘ကိံ နု ခေါ သတ္ထာ အာဏာပေတီ’’တိ. ဧတ္တာဝတာ ဓမ္မဘဏ္ဍာဂါရိကော အနုပ္ပတ္တော. ဧဝံ အနုပ္ပတ္တံ အထ ခေါ ဘဂဝါ အာယသ္မန္တံ အာနန္ဒံ အာမန္တေသိ.

ဥပဒဟေယျာတိ ဥပ္ပါဒေယျ၊ ဝိပ္ပဋိသာရဿ ဥပ္ပါဒကော ကောစိ ပုရိသော သိယာ အပိ ဘဝေယျ. အလာဘာတိ ယေ အညေသံ ဒါနံ ဒဒန္တာနံ ဒါနာနိသံသသင်္ခါတာ လာဘာ ဟောန္တိ၊ တေ အလာဘာ. ဒုလ္လဒ္ဓန္တိ ပုညဝိသေသေန လဒ္ဓမ္ပိ မနုဿတ္တံ ဒုလ္လဒ္ဓံ. ယဿ တေတိ ယဿ တဝ. ဥတ္တဏ္ဍုလံ ဝါ အတိကိလိန္နံ ဝါ ကော တံ ဇာနာတိ၊ ကီဒိသမ္ပိ ပစ္ဆိမံ ပိဏ္ဍပါတံ ဘုဉ္ဇိတွာ တထာဂတော ပရိနိဗ္ဗုတော၊ အဒ္ဓါ တေန ယံ ဝါ တံ ဝါ ဒိန္နံ ဘဝိဿတီတိ. လာဘာတိ ဒိဋ္ဌဓမ္မိကသမ္ပရာယိကာ ဒါနာနိသံသသင်္ခါတာ လာဘာ. သုလဒ္ဓန္တိ တုယှံ မနုဿတ္တံ သုလဒ္ဓံ. သမ္မုခါတိ သမ္မုခတော၊ န အနုဿဝေန န ပရမ္ပရာယာတိ အတ္ထော. မေတန္တိ မေ ဧတံ မယာ ဧတံ. ဒွေမေတိ ဒွေ ဣမေ. သမသမဖလာတိ သဗ္ဗာကာရေန သမာနဖလာ.

နနု စ ယံ သုဇာတာယ ဒိန္နံ ပိဏ္ဍပါတံ ဘုဉ္ဇိတွာ တထာဂတော အဘိသမ္ဗုဒ္ဓေါ၊ တံ ကိလေသာနံ အပ္ပဟီနကာလေ ဒါနံ၊ ဣဒံ ပန စုန္ဒဿ ဒါနံ ခီဏာသဝကာလေ၊ ကသ္မာ ဧတာနိ သမဖလာနီတိ? ပရိနိဗ္ဗာနသမတာယ သမာပတ္တိသမတာယ အနုဿရဏသမတာယ စ. ဘဂဝါ ဟိ သုဇာတာယ ဒိန္နံ ပိဏ္ဍပါတံ ဘုဉ္ဇိတွာ သဥပါဒိသေသာယ နိဗ္ဗာနဓာတုယာ ပရိနိဗ္ဗုတော၊ စုန္ဒေန ဒိန္နံ ဘုဉ္ဇိတွာ အနုပါဒိသေသာယ နိဗ္ဗာနဓာတုယာ ပရိနိဗ္ဗုတောတိ ဧဝံ ပရိနိဗ္ဗာနသမတာယပိ သမဖလာနိ. အဘိသမ္ဗုဇ္ဈနဒိဝသေ စ အဂ္ဂမဂ္ဂဿ ဟေတုဘူတာ စတုဝီသတိကောဋိသတသဟဿသင်္ခါ သမာပတ္တိယော သမာပဇ္ဇိ၊ ပရိနိဗ္ဗာနဒိဝသေပိ သဗ္ဗာ တာ သမာပဇ္ဇိ. ဧဝံ သမာပတ္တိသမတာယပိ သမဖလာနိ. ဝုတ္တဉှေတံ ဘဂဝတာ –

‘‘ယဿ စေတံ ပိဏ္ဍပါတံ ပရိဘုဉ္ဇိတွာ အနုတ္တရံ အပ္ပမာဏံ စေတောသမာဓိံ ဥပသမ္ပဇ္ဇ ဝိဟရတိ၊ အပ္ပမာဏော တဿ ပုညာဘိသန္ဒော ကုသလာဘိသန္ဒော’’တိအာဒိ. –

သုဇာတာ စ အပရဘာဂေ အဿောသိ ‘‘န ကိရ သာ ရုက္ခဒေဝတာ၊ ဗောဓိသတ္တော ကိရေသ၊ တံ ကိရ ပိဏ္ဍပါတံ ပရိဘုဉ္ဇိတွာ အနုတ္တရံ သမ္မာသမ္ဗောဓိံ အဘိသမ္ဗုဒ္ဓေါ၊ သတ္တသတ္တာဟံ ကိရဿ တေန ယာပနာ အဟောသီ’’တိ. တဿာ ဣဒံ သုတွာ ‘‘လာဘာ ဝတ မေ’’တိ အနုဿရန္တိယာ ဗလဝပီတိသောမနဿံ ဥဒပါဒိ. စုန္ဒဿပိ အပရဘာဂေ ‘‘အဝသာနပိဏ္ဍပါတော ကိရ မယာ ဒိန္နော၊ ဓမ္မသီသံ ကိရ မယာ ဂဟိတံ၊ မယှံ ကိရ ပိဏ္ဍပါတံ ပရိဘုဉ္ဇိတွာ သတ္ထာ အတ္တနာ စိရကာလာဘိပတ္ထိတာယ အနုပါဒိသေသာယ နိဗ္ဗာနဓာတုယာ ပရိနိဗ္ဗုတော’’တိ သုတွာ ‘‘လာဘာ ဝတ မေ’’တိ အနုဿရတော ဗလဝပီတိသောမနဿံ ဥဒပါဒိ. ဧဝံ အနုဿရဏသမတာယပိ သမဖလာနိ ဒွေပိ ပိဏ္ဍပါတဒါနာနီတိ ဝေဒိတဗ္ဗာနိ.

အာယုသံဝတ္တနိကန္တိ ဒီဃာယုကသံဝတ္တနိကံ. ဥပစိတန္တိ ပသုတံ ဥပ္ပါဒိတံ. ယသသံဝတ္တနိကန္တိ ပရိဝါရသံဝတ္တနိကံ. အာဓိပတေယျသံဝတ္တနိကန္တိ သေဋ္ဌဘာဝသံဝတ္တနိကံ.

ဧတမတ္ထံ ဝိဒိတွာတိ ဧတံ ဒါနဿ မဟပ္ဖလတဉ္စေဝ သီလာဒိဂုဏေဟိ အတ္တနော စ အနုတ္တရဒက္ခိဏေယျဘာဝံ အနုပါဒါပရိနိဗ္ဗာနဉ္စာတိ တိဝိဓမ္ပိ အတ္ထံ သဗ္ဗာကာရတော ဝိဒိတွာ တဒတ္ထဒီပနံ ဣမံ ဥဒါနံ ဥဒါနေသိ.

တတ္ထ ဒဒတော ပုညံ ပဝဍ္ဎတီတိ ဒါနံ ဒေန္တဿ စိတ္တသမ္ပတ္တိယာ စ ဒက္ခိဏေယျသမ္ပတ္တိယာ စ ဒါနမယံ ပုညံ ဥပစီယတိ၊ မဟပ္ဖလတရဉ္စ မဟာနိသံသတရဉ္စ ဟောတီတိ အတ္ထော. အထ ဝါ ဒဒတော ပုညံ ပဝဍ္ဎတီတိ ဒေယျဓမ္မံ ပရိစ္စဇန္တော ပရိစ္စာဂစေတနာယ ဗဟုလီကတာယ အနုက္ကမေန သဗ္ဗတ္ထ အနာပတ္တိဗဟုလော သုဝိသုဒ္ဓသီလံ ရက္ခိတွာ သမထဝိပဿနဉ္စ ဘာဝေတုံ သက္ကောတီတိ တဿ ဒါနာဒိဝသေန တိဝိဓမ္ပိ ပုညံ အဘိဝဍ္ဎတီတိ ဧဝမေတ္ထ အတ္ထော ဝေဒိတဗ္ဗော. သံယမတောတိ သီလသံယမေန သံယမန္တဿ၊ သံဝရေ ဌိတဿာတိ အတ္ထော. ဝေရံ န စီယတီတိ ပဉ္စဝိဓဝေရံ န ပဝဍ္ဎတိ၊ အဒေါသပဓာနတ္တာ ဝါ အဓိသီလဿ ကာယဝါစာစိတ္တေဟိ သယံမန္တော သုဝိသုဒ္ဓသီလော ခန္တိဗဟုလတာယ ကေနစိ ဝေရံ န ကရောတိ၊ ကုတော တဿ ဥပစယော. တသ္မာ တဿ သံယမတော သံယမန္တဿ၊ သံယမဟေတု ဝါ ဝေရံ န စီယတိ. ကုသလော စ ဇဟာတိ ပါပကန္တိ ကုသလော ပန ဉာဏသမ္ပန္နော သုဝိသုဒ္ဓသီလေ ပတိဋ္ဌိတော အဋ္ဌတိံသာယ အာရမ္မဏေသု အတ္တနော အနုရူပံ ကမ္မဋ္ဌာနံ ဂဟေတွာ ဥပစာရပ္ပနာဘေဒံ ဈာနံ သမ္ပာဒေန္တော ပါပကံ လာမကံ ကာမစ္ဆန္ဒာဒိအကုသလံ ဝိက္ခမ္ဘနဝသေန ဇဟာတိ ပရိစ္စဇတိ. သော တမေဝ ဈာနံ ပါဒကံ ကတွာ သင်္ခါရေသု ခယဝယံ ပဋ္ဌပေတွာ ဝိပဿနာယ ကမ္မံ ကရောန္တော ဝိပဿနံ ဥဿုက္ကာပေတွာ အရိယမဂ္ဂေန အနဝသေသံ ပါပကံ လာမကံ အကုသလံ သမုစ္ဆေဒဝသေန ဇဟာတိ. ရာဂဒေါသမောဟက္ခယာ သ နိဗ္ဗုတောတိ သော ဧဝံ ပါပကံ ပဇဟိတွာ ရာဂါဒီနံ ခယာ အနဝသေသကိလေသနိဗ္ဗာနေန၊ တတော ပရံ ခန္ဓနိဗ္ဗာနေန စ နိဗ္ဗုတော ဟောတီတိ ဧဝံ ဘဂဝါ စုန္ဒဿ စ ဒက္ခိဏသမ္ပတ္တိံ၊ အတ္တနော စ ဒက္ခိဏေယျသမ္ပတ္တိံ နိဿာယ ပီတိဝေဂဝိဿဋ္ဌံ ဥဒါနံ ဥဒါနေသိ.

ပဉ္စမသုတ္တဝဏ္ဏနာ နိဋ္ဌိတာ.