၁၀. ဒုတိယဒဗ္ဗသုတ္တဝဏ္ဏနာ

၈၀. ဒသမေ တတြ ခေါ ဘဂဝါ ဘိက္ခူ အာမန္တေသီတိ ဘဂဝါ ရာဇဂဟေ ယထာဘိရန္တံ ဝိဟရိတွာ ဇနပဒစာရိကံ စရန္တော အနုက္ကမေန သာဝတ္ထိံ ပတွာ ဇေတဝနေ ဝိဟရန္တောယေဝ ယေသံ ဘိက္ခူနံ အာယသ္မတော ဒဗ္ဗဿ မလ္လပုတ္တဿ ပရိနိဗ္ဗာနံ အပစ္စက္ခံ၊ တေသံ တံ ပစ္စက္ခံ ကတွာ ဒဿေတုံ၊ ယေပိ စ မေတ္တိယဘူမဇကေဟိ ကတေန အဘူတေန အဗ္ဘာစိက္ခဏေန ထေရေ ဂါရဝရဟိတာ ပုထုဇ္ဇနာ၊ တေသံ ထေရေ ဗဟုမာနုပ္ပါဒနတ္ထဉ္စ အာမန္တေသိ. တတ္ထ တတြာတိ ဝစနသညာပနေ နိပါတမတ္တံ. ခေါတိ အဝဓာရဏေ. တေသု ‘‘တတြာ’’တိ ဣမိနာ ‘‘ဘဂဝါ ဘိက္ခူ အာမန္တေသီ’’တိ ဧတေသံ ပဒါနံ ဝုစ္စမာနတံယေဝ ဇောတေတိ. ‘‘ခေါ’’တိ ပန ဣမိနာ အာမန္တေသိယေဝ၊ နာဿ အာမန္တနေ ကောစိ အန္တရာယော အဟောသီတိ ဣမမတ္ထံ ဒဿေတိ. အထ ဝါ တတြာတိ တသ္မိံ အာရာမေ. ခေါတိ ဝစနာလင်္ကာရေ နိပါတော. အာမန္တေသီတိ အဘာသိ. ကသ္မာ ပန ဘဂဝါ ဘိက္ခူယေဝ အာမန္တေသီတိ? ဇေဋ္ဌတ္တာ သေဋ္ဌတ္တာ အာသန္နတ္တာ သဗ္ဗကာလံ သန္နိဟိတတ္တာ ဓမ္မဒေသနာယ ဝိသေသတော ဘာဇနဘူတတ္တာ စ.

ဘိက္ခဝေါတိ တေသံ အာမန္တနာကာရဒဿနံ. ဘဒန္တေတိ အာမန္တိတာနံ ဘိက္ခူနံ ဂါရဝေန သတ္ထု ပဋိဝစနဒါနံ. တတ္ထ ‘‘ဘိက္ခဝေါ’’တိ ဝဒန္တော ဘဂဝါ တေ ဘိက္ခူ အာလပတိ. ‘‘ဘဒန္တေ’’တိ ဝဒန္တာ တေ ပစ္စာလပန္တိ. အပိစ ‘‘ဘိက္ခဝေါ’’တိ ဣမိနာ ကရုဏာဝိပ္ဖါရသောမ္မဟဒယနိဿိတပုဗ္ဗင်္ဂမေန ဝစနေန တေ ဘိက္ခူ ကမ္မဋ္ဌာနမနသိကာရဓမ္မပစ္စဝေက္ခဏာဒိတော နိဝတ္တေတွာ အတ္တနော မုခါဘိမုခေ ကရောတိ. ‘‘ဘဒန္တေ’’တိ ဣမိနာ သတ္ထရိ အာဒရဗဟုမာနဂါရဝဒီပနဝစနေန တေ ဘိက္ခူ အတ္တနော သုဿူသတံ ဩဝါဒပ္ပဋိဂ္ဂဟဂါရဝဘာဝဉ္စ ပဋိဝေဒေန္တိ. ဘဂဝတော ပစ္စဿောသုန္တိ တေ ဘိက္ခူ ဘဂဝတော ဝစနံ ပတိအဿောသုံ သောတုကာမတံ ဇနေသုံ. ဧတဒဝေါစာတိ ဘဂဝါ ဧတံ ဣဒါနိ ဝက္ခမာနံ သကလံ သုတ္တံ အဘာသိ. ဒဗ္ဗဿ၊ ဘိက္ခဝေ၊ မလ္လပုတ္တဿာတိအာဒိ အနန္တရသုတ္တေ ဝုတ္တတ္ထမေဝ. ဧတမတ္ထန္တိအာဒီသုပိ အပုဗ္ဗံ နတ္ထိ၊ အနန္တရသုတ္တေ ဝုတ္တနယေနေဝ ဝေဒိတဗ္ဗံ.

ဂါထာသု ပန အယောဃနဟတဿာတိ အယော ဟညတိ ဧတေနာတိ အယောဃနံ၊ ကမ္မာရာနံ အယောကူဋံ အယောမုဋ္ဌိ စ. တေန အယောဃနေန ဟတဿ ပဟတဿ. ကေစိ ပန ‘‘အယောဃနဟတဿာတိ ဃနအယောပိဏ္ဍံ ဟတဿာ’’တိ အတ္ထံ ဝဒန္တိ. ဧဝ-သဒ္ဒေါ စေတ္ထ နိပါတမတ္တံ. ဇလတော ဇာတဝေဒသောတိ ဈာယမာနဿ အဂ္ဂိဿ. အနာဒရေ ဧတံ သာမိဝစနံ. အနုပုဗ္ဗူပသန္တဿာတိ အနုက္ကမေန ဥပသန္တဿ ဝိဇ္ဈာတဿ နိရုဒ္ဓဿ. ယထာ န ဉာယတေ ဂတီတိ ယထာ တဿ ဂတိ န ဉာယတိ. ဣဒံ ဝုတ္တံ ဟောတိ – အယောမုဋ္ဌိကူဋာဒိနာ မဟတာ အယောဃနေန ဟတဿ သံဟတဿ၊ ကံသဘာဇနာဒိဂတဿ ဝါ ဇလမာနဿ အဂ္ဂိဿ၊ တထာ ဥပ္ပန္နဿ ဝါ သဒ္ဒဿ အနုက္ကမေန ဥပသန္တဿ သုဝူပသန္တဿ ဒသသု ဒိသာသု န ကတ္ထစိ ဂတိ ပညာယတိ ပစ္စယနိရောဓေန အပ္ပဋိသန္ဓိကနိရုဒ္ဓတ္တာ.

ဧဝံ သမ္မာဝိမုတ္တာနန္တိ ဧဝံ သမ္မာ ဟေတုနာ ဉာယေန တဒင်္ဂဝိက္ခမ္ဘနဝိမုတ္တိပုဗ္ဗင်္ဂမေန အရိယမဂ္ဂေန စတူဟိပိ ဥပါဒါနေဟိ အာသဝေဟိ စ ဝိမုတ္တတ္တာ သမ္မာ ဝိမုတ္တာနံ၊ တတော ဧဝ ကာမပဗန္ဓသင်္ခါတံ ကာမောဃံ ဘဝေါဃာဒိဘေဒံ အဝသိဋ္ဌံ ဩဃဉ္စ တရိတွာ ဌိတတ္တာ ကာမဗန္ဓောဃတာရိနံ သုဋ္ဌု ပဋိပဿမ္ဘိတသဗ္ဗကိလေသဝိပ္ဖန္ဒိတတ္တာ ကိလေသာဘိသင်္ခါရဝါတေဟိ စ အကမ္ပနီယတာယ အစလံ အနုပါဒိသေသနိဗ္ဗာနသင်္ခါတံ သဗ္ဗသင်္ခါရူပသမံ သုခံ ပတ္တာနံ အဓိဂတာနံ ခီဏာသဝါနံ ဂတိ ဒေဝမနုဿာဒိဘေဒါသု ဂတီသု အယံ နာမာတိ ပညပေတဗ္ဗတာယ အဘာဝတ္တာ ပညာပေတုံ နတ္ထိ န ဥပလဗ္ဘတိ၊ ယထာဝုတ္တဇာတဝေဒေါ ဝိယ အပညတ္တိကဘာဝမေဝ ဟိ သော ဂတောတိ အတ္ထော.

ဒသမသုတ္တဝဏ္ဏနာ နိဋ္ဌိတာ.

နိဋ္ဌိတာ စ ပါဋလိဂါမိယဝဂ္ဂဝဏ္ဏနာ.

နိဂမနကထာ

ဧတ္တာဝတာ စ –

သုဝိမုတ္တဘဝါဒါနော၊ ဒေဝဒါနဝမာနိတော၊

ပစ္ဆိန္နတဏှာသန္တာနော၊ ပီတိသံဝေဂဒီပနော.

သဒ္ဓမ္မဒါနနိရတော၊ ဥပါဒါနက္ခယာဝဟော၊

တတ္ထ တတ္ထ ဥဒါနေ ယေ၊ ဥဒါနေသိ ဝိနာယကော.

တေ သဗ္ဗေ ဧကတော ကတွာ၊ အာရောပေန္တေဟိ သင်္ဂဟံ၊

ဥဒါနမိတိ သင်္ဂီတံ၊ ဓမ္မသင်္ဂါဟကေဟိ ယံ.

တဿ အတ္ထံ ပကာသေတုံ၊ ပေါရာဏဋ္ဌကထာနယံ၊

နိဿာယ ယာ သမာရဒ္ဓါ၊ အတ္ထသံဝဏ္ဏနာ မယာ.

သာ တတ္ထ ပရမတ္ထာနံ၊ သုတ္တန္တေသု ယထာရဟံ၊

ပကာသနာ ပရမတ္ထဒီပနီ နာမ နာမတော.

သမ္ပတ္တာ ပရိနိဋ္ဌာနံ၊ အနာကုလဝိနိစ္ဆယာ၊

စတုတ္တိံသပ္ပမာဏာယ၊ ပါဠိယာ ဘာဏဝါရတော.

ဣတိ တံ သင်္ခရောန္တေန၊ ယံ တံ အဓိဂတံ မယာ၊

ပုညံ တဿာနုဘာဝေန၊ လောကနာထဿ သာသနံ.

ဩဂါဟိတွာ ဝိသုဒ္ဓါယ၊ သီလာဒိပဋိပတ္တိယာ၊

သဗ္ဗေပိ ဒေဟိနော ဟောန္တု၊ ဝိမုတ္တိရသဘာဂိနော.

စိရံ တိဋ္ဌတု လောကသ္မိံ၊ သမ္မာသမ္ဗုဒ္ဓသာသနံ၊

တသ္မိံ သဂါရဝါ နိစ္စံ၊ ဟောန္တု သဗ္ဗေပိ ပါဏိနော.

သမ္မာ ဝဿတု ကာလေန၊ ဒေဝေါပိ ဇဂတီပတိ၊

သဒ္ဓမ္မနိရတော လောကံ၊ ဓမ္မေနေဝ ပသာသတူတိ.

ဗဒရတိတ္ထဝိဟာရဝါသိနာ အာစရိယဓမ္မပါလတ္ထေရေန

ကတာဥဒါနဿ အဋ္ဌကထာ သမတ္တာ.