၁၄. ဂေါတမတ္ထေရဂါထာဝဏ္ဏနာ

သံသရန္တိ အာယသ္မတော ဂေါတမတ္ထေရဿ ဂါထာ. ကာ ဥပ္ပတ္တိ? အယံ ကိရ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ကရောန္တော သိခိမှိ ဘဂဝတိ ပရိနိဗ္ဗုတေ တဿ စိတကံ ဒေဝမနုဿေသု ပူဇေန္တေသု အဋ္ဌဟိ စမ္ပကပုပ္ဖေဟိ စိတကံ ပူဇေသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ သကျရာဇကုလေ နိဗ္ဗတ္တိတွာ ဂေါတမောတိ ဂေါတ္တဝသေနေဝ အဘိလက္ခိတနာမော ဝယပ္ပတ္တော သတ္ထု ဉာတိသမာဂမေ ပဋိလဒ္ဓသဒ္ဓေါ ပဗ္ဗဇိတွာ ဝိပဿနာယ ကမ္မံ ကရောန္တော ဆဠဘိညော အဟောသိ. တေန ဝုတ္တံ အပဒါနေ (အပ. ထေရ ၂.၄၇.၆-၁၀) –

‘‘ဈာယမာနဿ ဘဂဝတော၊ သိခိနော လောကဗန္ဓုနော၊

အဋ္ဌ စမ္ပကပုပ္ဖါနိ၊ စိတကံ အဘိရောပယိံ.

‘‘ဧကတိံသေ ဣတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ စိတပူဇာယိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

ဆဠဘိညော ပန ဟုတွာ ဝိမုတ္တိသုခေန ဝိဟရန္တော ဧကဒိဝသံ ဉာတကေဟိ ‘‘ကသ္မာ၊ ဘန္တေ၊ အမှေ ပဟာယ ပဗ္ဗဇိတော’’တိ ပုဋ္ဌော သံသာရေ အတ္တနာ အနုဘူတဒုက္ခဉ္စေဝ ဣဒါနိ အဓိဂတံ နိဗ္ဗာနသုခဉ္စ ပကာသေန္တော –

၂၅၈. ‘‘သံသရဉှိ နိရယံ အဂစ္ဆိဿံ၊ ပေတလောကမဂမံ ပုနပ္ပုနံ၊

ဒုက္ခမမှိပိ တိရစ္ဆာနယောနိယံ၊ နေကဓာ ဟိ ဝုသိတံ စိရံ မယာ.

၂၅၉. ‘‘မာနုသောပိ စ ဘဝေါဘိရာဓိတော၊ သဂ္ဂကာယမဂမံ သကိံ သကိံ၊

ရူပဓာတုသု အရူပဓာတုသု၊ နေဝသညိသု အသညိသုဋ္ဌိတံ.

၂၆၀. ‘‘သမ္ဘဝါ သုဝိဒိတာ အသာရကာ၊ သင်္ခတာ ပစလိတာ သဒေရိတာ၊

တံ ဝိဒိတွာ မဟမဟတ္တသမ္ဘဝံ၊ သန္တိမေဝ သတိမာ သမဇ္ဈဂ’’န္တိ. –

တီဟိ ဂါထာဟိ တေသံ ဓမ္မံ ဒေသေသိ.

တတ္ထ သံသရန္တိ အနာဒိမတိ သံသာရေ သံသရန္တော ကမ္မကိလေသေဟိ ပဉ္စသု ဂတီသု စဝနုပပါတဝသေန အပရာပရံ သံသရန္တောတိ အတ္ထော. ဟီတိ နိပါတမတ္တံ. နိရယံ အဂစ္ဆိဿန္တိ သဉ္ဇီဝါဒိကံ အဋ္ဌဝိဓံ မဟာနိရယံ၊ ကုက္ကုဠာဒိကံ သောဠသဝိဓံ ဥဿဒနိရယဉ္စ ပဋိသန္ဓိဝသေန ဥပဂစ္ဆိံ. ‘‘ပုနပ္ပုန’’န္တိ ဣဒံ ဣဓာပိ အာနေတဗ္ဗံ. ပေတလောကန္တိ ပေတ္တိဝိသယံ၊ ခုပ္ပိပါသာဒိဘေဒံ ပေတတ္တဘာဝန္တိ အတ္ထော. အဂမန္တိ ပဋိသန္ဓိဝသေန ဥပဂစ္ဆိံ ဥပပဇ္ဇိံ. ပုနပ္ပုနန္တိ အပရာပရံ. ဒုက္ခမမှိပီတိ အညမညံ တိခိဏကသာပတောဒါဘိဃာတာဒိဒုက္ခေဟိ ဒုဿဟာယပိ. လိင်္ဂဝိပလ္လာသေန ဟေတံ ဝုတ္တံ ‘‘ဒုက္ခမမှိပီ’’တိ. တိရစ္ဆာနယောနိယန္တိ မိဂပက္ခိအာဒိဘေဒါယ တိရစ္ဆာနယောနိယံ. နေကဓာ ဟီတိ ဩဋ္ဌဂေါဏဂဒြဘာဒိဝသေန စေဝ ကာကဗလာကကုလလာဒိဝသေန စ အနေကပ္ပကာရံ အနေကဝါရဉ္စ စိရံ ဒီဃမဒ္ဓါနံ မယာ ဝုသိတံ နိစ္စံ ဥတြသ္တမာနသတာဒိဝသေန ဒုက္ခံ အနုဘူတံ. တိရစ္ဆာနယောနိယံ နိဗ္ဗတ္တသတ္တော မဟာမူဠှတာယ စိရတရံ တတ္ထေဝ အပရာပရံ ပရိဝတ္တတီတိ ဒဿနတ္ထံ ဣဓ ‘‘စိရ’’န္တိ ဝုတ္တံ.

မာနုသောပိ စ ဘဝေါဘိရာဓိတောတိ မနုဿတ္တဘာဝေါပိ မယာ တာဒိသေန ကုသလကမ္မုနာ သမဝါယေန အဘိရာဓိတော သာဓိတော အဓိဂတော. ကာဏကစ္ဆပေါပမသုတ္တမေတ္ထ (မ. နိ. ၃.၂၅၂၊ သံ. နိ. ၅.၁၁၁၇) ဥဒါဟရိတဗ္ဗံ. သဂ္ဂကာယမဂမံ သကိံ သကိန္တိ သဂ္ဂဂတိသင်္ခါတံ ကာမာဝစရဒေဝကာယံ သကိံ သကိံ ကဒါစိ ကဒါစိ ဥပပဇ္ဇနဝသေန အဂစ္ဆိံ. ရူပဓာတုသူတိ ပုထုဇ္ဇနဘဝဂ္ဂပရိယောသာနေသု ရူပဘဝေသု အရူပဓာတုသူတိ အရူပဘဝေသု. နေဝသညိသု အသညိသုဋ္ဌိတန္တိ ရူပါရူပဓာတူသု စ န ကေဝလံ သညီသု ဧဝ၊ အထ ခေါ နေဝသညီနာသညီသု အသညီသု စ ဥပပဇ္ဇ ဌိတံ မယာတိ အာနေတွာ ယောဇေတဗ္ဗံ. နေဝသညိဂ္ဂဟဏေန ဟေတ္ထ နေဝသညီနာသညီဘဝေါ ဂဟိတော. ယဒိပိမေ ဒွေ ဘဝါ ရူပါရူပဓာတုဂ္ဂဟဏေနေဝ ဂယှန္တိ၊ ယေ ပန ဣတော ဗာဟိရကာ တတ္ထ နိစ္စသညိနော ဘဝဝိမောက္ခသညိနော စ၊ တေသံ တဿာ သညာယ မိစ္ဆာဘာဝဒဿနတ္ထံ ဝိသုံ ဂဟိတာတိ ဒဋ္ဌဗ္ဗံ.

ဧဝံ ဒွီဟိ ဂါထာဟိ ဘဝမူလဿ အနုပစ္ဆိန္နတ္တာ အနာဒိမတိ သံသာရေ အတ္တနော ဝဋ္ဋဒုက္ခာနုဘဝံ ဒဿေတွာ ဣဒါနိ တဒုပစ္ဆေဒေန ဝိဝဋ္ဋသုခါနုဘဝံ ဒဿေန္တော ‘‘သမ္ဘဝါ’’တိအာဒိနာ တတိယံ ဂါထမာဟ. တတ္ထ သမ္ဘဝါတိ ဘဝါ. ကာမဘဝါဒယော ဧဝ ဟိ ဟေတုပစ္စယသမဝါယေန ဘဝန္တီတိ ဣဓ သမ္ဘဝါတိ ဝုတ္တာ. သုဝိဒိတာတိ ဝိပဿနာပညာသဟိတာယ မဂ္ဂပညာယ သုဋ္ဌု ဝိဒိတာ. အသာရကာတိအာဒိ တေသံ ဝိဒိတာကာရဒဿနံ. တတ္ထ အသာရကာတိ နိစ္စသာရာဒိသာရရဟိတာ. သင်္ခတာတိ သမေစ္စ သမ္ဘုယျ ပစ္စယေဟိ ကတာ. ပစလိတာတိ သင်္ခတတ္တာ ဧဝ ဥပ္ပါဒဇရာဒီဟိ ပကာရတော စလိတာ အနဝဋ္ဌိတာ. သဒေရိတာတိ သဒါ သဗ္ဗကာလံ ဘင်္ဂေန ဧရိတာ၊ ဣတ္တရာ ဘင်္ဂဂါမိနော ပဘင်္ဂုနောတိ အတ္ထော. တံ ဝိဒိတွာ မဟမတ္တသမ္ဘဝန္တိ တံ ယထာဝုတ္တံ သင်္ခတသဘာဝံ အတ္တသမ္ဘဝံ အတ္တနိ သမ္ဘူတံ အတ္တာယတ္တံ ဣဿရာဒိဝသေန အပရာယတ္တံ ပရိညာဘိသမယဝသေန အဟံ ဝိဒိတွာ တပ္ပဋိပက္ခဘူတံ သန္တိမေဝ နိဗ္ဗာနမေဝ မဂ္ဂပညာသတိယာ သတိမာ ဟုတွာ သမဇ္ဈဂံ အဓိဂစ္ဆိံ အရိယမဂ္ဂဘာဝနာယ အနုပ္ပတ္တောတိ. ဧဝံ ထေရော ဉာတကာနံ ဓမ္မဒေသနာမုခေန အညံ ဗျာကာသိ.

ဂေါတမတ္ထေရဂါထာဝဏ္ဏနာ နိဋ္ဌိတာ.