၁၂. ဥတ္တရပါလတ္ထေရဂါထာဝဏ္ဏနာ

ပဏ္ဍိတံ ဝတ မံ သန္တန္တိ အာယသ္မတော ဥတ္တရပါလတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ဥပစိနန္တော ဝိပဿိဿ ဘဂဝတော ဂမနမဂ္ဂေ သေတုံ ကာရာပေသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ သာဝတ္ထိယံ ဗြာဟ္မဏကုလေ နိဗ္ဗတ္တိတွာ ဥတ္တရပါလောတိ လဒ္ဓနာမော ဝယပ္ပတ္တော ယမကပါဋိဟာရိယံ ဒိသွာ ပဋိလဒ္ဓသဒ္ဓေါ ပဗ္ဗဇိတွာ သမဏဓမ္မံ ကရောတိ. တဿ ဧကဒိဝသံ အယောနိသောမနသိကာရဝသေန အနုဘူတာရမ္မဏံ အနုဿရန္တဿ ကာမရာဂေါ ဥပ္ပဇ္ဇိ. သော တာဝဒေဝ သဟောဍ္ဎံ စောရံ ဂဏှန္တော ဝိယ အတ္တနော စိတ္တံ နိဂ္ဂဟေတွာ သံဝေဂဇာတော ပဋိပက္ခမနသိကာရေန ကိလေသေ ဝိက္ခမ္ဘေတွာ ဝိပဿနာယ ကမ္မံ ကရောန္တော ဘာဝနံ ဥဿုက္ကာပေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၄၇.၁၆-၂၀) –

‘‘ဝိပဿိနော ဘဂဝတော၊ စင်္ကမန္တဿ သမ္မုခါ၊

ပသန္နစိတ္တော သုမနော၊ သေတုံ ကာရာပယိံ အဟံ.

‘‘ဧကနဝုတိတော ကပ္ပေ၊ ယံ သေတုံ ကာရယိံ အဟံ၊

ဒုဂ္ဂတိံ နာဘိဇာနာမိ၊ သေတုဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အတ္တနော ပဋိပတ္တိံ ပစ္စဝေက္ခိတွာ သီဟနာဒံ နဒန္တော –

၂၅၂. ‘‘ပဏ္ဍိတံ ဝတ မံ သန္တံ၊ အလမတ္ထဝိစိန္တကံ၊

ပဉ္စ ကာမဂုဏာ လောကေ၊ သမ္မောဟာ ပါတယိံသု မံ.

၂၅၃. ‘‘ပက္ခန္ဒော မာရဝိသယေ၊ ဒဠှသလ္လသမပ္ပိတော၊

အသက္ခိံ မစ္စုရာဇဿ၊ အဟံ ပါသာ ပမုစ္စိတုံ.

၂၅၄. ‘‘သဗ္ဗေ ကာမာ ပဟီနာ မေ၊ ဘဝါ သဗ္ဗေ ပဒါလိတာ၊

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ. –

တိဿော ဂါထာ အဘာသိ.

တတ္ထ ပဏ္ဍိတံ ဝတ မံ သန္တန္တိ သုတစိန္တာမယာယ ပညာယ ဝသေန ပညာသမ္ပန္နမ္ပိ နာမ မံ သမာနံ. အလမတ္ထဝိစိန္တကန္တိ အတ္တနော စ ပရေသဉ္စ အတ္ထံ ဟိတံ ဝိစိန္တေတုံ သမတ္ထံ၊ အလံ ဝါ ပရိယတ္တံ အတ္ထဿ ဝိစိန္တကံ၊ ကိလေသဝိဒ္ဓံသနသမတ္ထံ အတ္ထဒဿိနံ ဝါ၊ သဗ္ဗမေတံ အတ္တနော အန္တိမဘဝိကတာယ ထေရော ဝဒတိ. ပဉ္စ ကာမဂုဏာတိ ရူပါဒယော ပဉ္စ ကာမကောဋ္ဌာသာ. လောကေတိ တေသံ ပဝတ္တိဋ္ဌာနဒဿနံ. သမ္မောဟာတိ သမ္မောဟနိမိတ္တံ အယောနိသောမနသိကာရဟေတု. သမ္မောဟာတိ ဝါ သမ္မောဟနာ သမ္မောဟကရာ. ပါတယိံသူတိ ဓီရဘာဝတော ပါတေသုံ၊ လောကတော ဝါ ဥတ္တရိတုကာမံ မံ လောကေ ပါတယိံသူတိ အတ္ထော.

ပက္ခန္ဒောတိ အနုပဝိဋ္ဌော. မာရဝိသယေတိ ကိလေသဝိသယေ ကိလေသမာရဿ ပဝတ္တိဋ္ဌာနေ၊ တဿ ဝသံ ဂတောတိ အဓိပ္ပါယော. ဒေဝပုတ္တမာရဿ ဝါ ဣဿရိယဋ္ဌာနေ တံ အနုပဝိသိတွာ ဌိတော. ဒဠှသလ္လသမပ္ပိတောတိ ဒဠှံ ထိရံ၊ ဒဠှေန ဝါ သလ္လေန သမပ္ပိတော၊ ရာဂသလ္လေန ဟဒယံ အာဟစ္စ ဝိဒ္ဓေါ. အသက္ခိံ မစ္စုရာဇဿ၊ အဟံ ပါသာ ပမုစ္စိတုန္တိ အဂ္ဂမဂ္ဂသဏ္ဍာသေန ရာဂါဒိသလ္လံ အနဝသေသတော ဥဒ္ဓရန္တောယေဝ ရာဂဗန္ဓနသင်္ခါတာ မစ္စုရာဇဿ ပါသာ အဟံ ပရိမုစ္စိတုံ အသက္ခိံ၊ တတော အတ္တာနံ ပမောစေသိံ.

တတော ဧဝ စ သဗ္ဗေ ကာမာ ပဟီနာ မေ၊ ဘဝါ သဗ္ဗေ ပဒါလိတာတိ ဝတ္ထာရမ္မဏာဒိဘေဒေန အနေကဘေဒဘိန္နာ သဗ္ဗေ ကိလေသကာမာ အရိယမဂ္ဂေန သမုစ္ဆေဒဝသေန မယာ ပဟီနာ. ကိလေသကာမေသု ဟိ ပဟီနေသု ဝတ္ထုကာမာပိ ပဟီနာ ဧဝ ဟောန္တိ. တထာ ကာမဘဝကမ္မဘဝါဒယော ဘဝါ သဗ္ဗေ မဂ္ဂဉာဏာသိနာ ပဒါလိတာ ဝိဒ္ဓံသိတာ. ကမ္မဘဝေသု ဟိ ပဒါလိတေသု ဥပပတ္တိဘဝါ ပဒါလိတာ ဧဝ ဟောန္တိ. ဧဝံ ကမ္မဘဝါနံ ပဒါလိတတ္တာ ဧဝ ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါတိ. တဿတ္ထော ဟေဋ္ဌာ ဝုတ္တောယေဝ. ဣဒမေဝ စ ထေရဿ အညာဗျာကရဏံ အဟောသိ.

ဥတ္တရပါလတ္ထေရဂါထာဝဏ္ဏနာ နိဋ္ဌိတာ.