၇. သောဏပေါဋိရိယပုတ္တတ္ထေရဂါထာဝဏ္ဏနာ

န တာဝ သုပိတုံ ဟောတီတိ အာယသ္မတော သောဏဿ ပေါဋိရိယပုတ္တဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော သိခိဿ ဘဂဝတော ကာလေ ဝနစရော ဟုတွာ ဇီဝန္တော ဧကဒိဝသံ သတ္ထာရံ ဒိသွာ ပသန္နစိတ္တော ကုရဉ္ဇိယဖလံ သတ္ထုနော အဒါသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ကပိလဝတ္ထုသ္မိံ ပေါဋိရိယဿ နာမ ဂါမဘောဇကဿ ပုတ္တော ဟုတွာ နိဗ္ဗတ္တိ၊ သောဏောတိဿ နာမံ အဟောသိ. သော ဝယပ္ပတ္တော ဘဒ္ဒိယဿ သာကိယရညော သေနာပတိ အဟောသိ. အထ ဘဒ္ဒိယရာဇေ ဟေဋ္ဌာ ဝုတ္တနယေန ပဗ္ဗဇိတေ၊ သေနာပတိ ‘‘ရာဇာပိ နာမ ပဗ္ဗဇိ၊ ကိံ မယှံ ဃရာဝါသေနာ’’တိ ပဗ္ဗဇိ? ပဗ္ဗဇိတွာ ပန နိဒ္ဒါရာမော ဝိဟရတိ၊ န ဘာဝနမနုယုဉ္ဇတိ. တံ ဘဂဝါ အနုပိယာယံ အမ္ဗဝနေ ဝိဟရန္တော အတ္တနော ဩဘာသံ ဖရာပေတွာ တေနဿ သတိံ ဇနေတွာ ဣမာယ ဂါထာယ တံ ဩဝဒန္တော –

၁၉၃. ‘‘န တာဝ သုပိတုံ ဟောတိ၊ ရတ္တိ နက္ခတ္တမာလိနီ၊

ပဋိဇဂ္ဂိတုမေဝေသာ၊ ရတ္တိ ဟောတိ ဝိဇာနတာ.

၁၉၄. ‘‘ဟတ္ထိက္ခန္ဓာဝပတိတံ၊ ကုဉ္ဇရော စေ အနုက္ကမေ၊

သင်္ဂါမေ မေ မတံ သေယျော၊ ယဉ္စေ ဇီဝေ ပရာဇိတော’’တိ. – ဂါထာဒွယံ အဘာသိ၊

တတ္ထ န တာဝ သုပိတုံ ဟောတိ၊ ရတ္တိ နက္ခတ္တမာလိနီတိ အဋ္ဌဟိ အက္ခဏေဟိ ဝဇ္ဇိတံ နဝမံ ခဏံ လဘိတွာ ဌိတဿ ဝိညုဇာတိကဿ ယာဝ န အရဟတ္တံ ဟတ္ထဂတံ ဟောတိ၊ တာဝ အယံ နက္ခတ္တမာလိနီ ရတ္တိ သုပိတုံ နိဒ္ဒါယိတုံ န ဟောတိ၊ သုပနဿ ကာလော န ဟောတိ. အပိစ ခေါ ပဋိဇဂ္ဂိတုမေဝေသာ၊ ရတ္တိ ဟောတိ ဝိဇာနတာတိ ဧသာ ရတ္တိ နာမ မနုဿာနံ မိဂပက္ခီနဉ္စ နိဒ္ဒူပဂမနေန ဝိသေသတော နိဿဒ္ဒဝေလာဘူတာ ပဋိပတ္တိံ အတ္တနိ သဉ္ဇဂ္ဂိတုံ ဇာဂရိယာနုယောဂမနုယုဉ္ဇိတုမေဝ ဝိဇာနတာ ဝိညုနာ ဣစ္ဆိတာ ဟောတီတိ.

တံ သုတွာ သောဏော သံဝိဂ္ဂတရမာနသော ဟိရောတ္တပ္ပံ ပစ္စုပဋ္ဌပေတွာ အဗ္ဘောကာသိကင်္ဂံ အဓိဋ္ဌာယ ဝိပဿနာယ ကမ္မံ ကရောန္တော ‘‘ဟတ္ထိက္ခန္ဓောဝ ပတိတ’’န္တိ ဒုတိယံ ဂါထမာဟ. တတ္ထ အဝပတိတန္တိ အဝမုခံ ပတိတံ ဥဒ္ဓံပါဒံ အဓောမုခံ ပတိတံ. ကုဉ္ဇရော စေ အနုက္ကမေတိ ကုဉ္ဇရော အနုက္ကမေယျ စေ. ဣဒံ ဝုတ္တံ ဟောတိ – ယဒါဟံ ဟတ္ထိမာရုဟိတွာ သင်္ဂါမံ ပဝိဋ္ဌော ဟတ္ထိက္ခန္ဓတော ပတိတော၊ တဒါဟံ သင်္ဂါမေ တေန ဟတ္ထိနာ မဒ္ဒိတော မတော အဟောသိံ စေ၊ တံ မေ မရဏံ သေယျော၊ ယဉ္စေ ဣဒါနိ ကိလေသေဟိ ပရာဇိတော ဇီဝေယျံ၊ တံ န သေယျောတိ. ဣမံ ဂါထံ ဝဒန္တောယေဝ ဝိပဿနံ ဥဿုက္ကာပေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၅၂.၁-၆) –

‘‘မိဂလုဒ္ဒေါ ပုရေ အာသိံ၊ ဝိပိနေ ဝိစရံ အဟံ၊

အဒ္ဒသံ ဝိရဇံ ဗုဒ္ဓံ၊ သဗ္ဗဓမ္မာန ပါရဂုံ.

‘‘ကုရဉ္ဇိယဖလံ ဂယှ၊ ဗုဒ္ဓသေဋ္ဌဿဒါသဟံ၊

ပုညက္ခေတ္တဿ တာဒိနော၊ ပသန္နော သေဟိ ပါဏိဘိ.

‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ ‘‘သတ္ထာရာ ဝုတ္တံ၊ အတ္တနာ ဝုတ္တ’’န္တိ ဥဘယဉှိ ဂါထံ ‘‘ဟတ္ထိက္ခန္ဓာဝပတိတ’’န္တိအာဒိနာ ပစ္စုဒါဟာသိ. တေန ဣဒမေဝ အညာဗျာကရဏံ အဟောသီတိ.

သောဏပေါဋိရိယပုတ္တတ္ထေရဂါထာဝဏ္ဏနာ နိဋ္ဌိတာ.