၄. ဣသိဒိန္နတ္ထေရဂါထာဝဏ္ဏနာ

ဒိဋ္ဌာ မယာတိ အာယသ္မတော ဣသိဒိန္နတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ကရောန္တော ဝိပဿိဿ ဘဂဝတော ကာလေ ကုလဂေဟေ နိဗ္ဗတ္တိတွာ ဝိညုတံ ပတ္တော ဗီဇနိံ ဂဟေတွာ ဗောဓိယာ ပူဇံ အကာသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ သုနာပရန္တဇနပဒေ သေဋ္ဌိကုလေ နိဗ္ဗတ္တိတွာ ဣသိဒိန္နောတိ လဒ္ဓနာမော ဝယပ္ပတ္တော သတ္ထု စန္ဒနမာဠပဋိဂ္ဂဟဏေ ပါဋိဟာရိယံ ဒိသွာ ပသန္နမာနသော သတ္ထာရံ ဥပသင်္ကမိတွာ ဓမ္မံ သုတွာ သောတာပန္နော ဟုတွာ အဂါရံ အဇ္ဈာဝသတိ. တဿ ဟိတာနုကမ္ပိနီ ဒေဝတာ တံ စောဒေန္တီ –

၁၈၇. ‘‘ဒိဋ္ဌာ မယာ ဓမ္မဓရာ ဥပါသကာ၊ ကာမာ အနိစ္စာ ဣတိ ဘာသမာနာ၊

သာရတ္တရတ္တာ မဏိကုဏ္ဍလေသု၊ ပုတ္တေသု ဒါရေသု စ တေ အပေက္ခာ.

၁၈၈. ‘‘အဒ္ဓါ န ဇာနန္တိ ယတောဓ ဓမ္မံ၊ ကာမာ အနိစ္စာ ဣတိ စာပိ အာဟု၊

ရာဂဉ္စ တေသံ န ဗလတ္ထိ ဆေတ္တုံ၊ တသ္မာ သိတာ ပုတ္တဒါရံ ဓနဉ္စာ’’တိ. –

ဂါထာဒွယမဘာသိ.

တတ္ထ ဒိဋ္ဌာ မယာ ဓမ္မဓရာ ဥပါသကာ၊ ကာမာ အနိစ္စာ ဣတိ ဘာသမာနာတိ ဣဓေကစ္စေ ပရိယတ္တိဓမ္မဓရာ ဥပါသကာ မယာ ဒိဋ္ဌာ၊ ပရိယတ္တိဓမ္မဓရတ္တာ ဧဝ ‘‘ကာမာ နာမေတေ အနိစ္စာ ဒုက္ခာ ဝိပရိဏာမဓမ္မာ’’တိ ကာမေသု အာဒီနဝပဋိသံယုတ္တံ ဓမ္မံ ဘာသမာနာ၊ သယံ ပန သာရတ္တရတ္တာ မဏိကုဏ္ဍလေသု၊ ပုတ္တေသု ဒါရေသု စ တေ အပေက္ခာတိ သာရတ္တာ ဟုတွာ ဗဟလရာဂရတ္တာ မဏီသု ကုဏ္ဍလေသု စ၊ မဏိစိတေသု ဝါ ကုဏ္ဍလေသု၊ ပုတ္တေသု ပုတ္တဓီတာသု ဒါရေသု စ အဓိဂတသ္နေဟာ၊ အညံ ဘဏန္တာ အညံ ကရောန္တာ ဒိဋ္ဌာ မယာတိ အတ္ထော.

ယတောတိ ယသ္မာ တေ ဥပါသကာ သာရတ္တရတ္တာ မဏိကုဏ္ဍလေသု ပုတ္တေသု ဒါရေသု စ အပေက္ခဝန္တော၊ တသ္မာ ဣဓ ဣမသ္မိံ ဗုဒ္ဓသာသနေ ဓမ္မံ ယာထာဝတော အဒ္ဓါ ဧကံသေန န ဇာနန္တိ. ဧဝံ ဘူတာ စ ‘‘ကာမာ အနိစ္စာ’’ဣတိ စာပိ အာဟု အဟောသိ၊ သတ္တပကတိ ဝိစိတ္တသဘာဝါတိ အဓိပ္ပါယော. ရာဂဉ္စ တေသံ န ဗလတ္ထိ ဆေတ္တုန္တိ တေသံ ဥပါသကာနံ ယသ္မာ ရာဂံ ဆေတ္တုံ သမုစ္ဆိန္ဒိတုံ တာဒိသံ ဉာဏဗလံ နတ္ထိ၊ တသ္မာ တေန ကာရဏေန သိတာ တဏှာဝသေန နိဿိတာ ပုတ္တဒါရံ ဓနဉ္စ အလ္လီနာ န ဝိဿဇ္ဇေန္တီတိ သဗ္ဗမေတံ ဒေဝတာ တံယေဝ ဥပါသကံ ဥဒ္ဒိဿ အညာပဒေသေန ကထေသိ. တံ သုတွာ ဥပါသကော သံဝေဂဇာတော ပဗ္ဗဇိတွာ နစိရဿေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၄၈.၄၆-၅၀) –

‘‘ဝိပဿိနော ဘဂဝတော၊ ဗောဓိယာ ပါဒပုတ္တမေ၊

သုမနော ဗီဇနိံ ဂယှ၊ အဗီဇိံ ဗောဓိမုတ္တမံ.

‘‘ဧကနဝုတိတော ကပ္ပေ၊ အဗီဇိံ ဗောဓိမုတ္တမံ၊

ဒုဂ္ဂတိံ နာဘိဇာနာမိ၊ ဗီဇနာယ ဣဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အညံ ဗျာကရောန္တော ဣမာ ဧဝ ဂါထာ အဘာသီတိ.

ဣသိဒိန္နတ္ထေရဂါထာဝဏ္ဏနာ နိဋ္ဌိတာ.