၆. မေဠဇိနတ္ထေရဂါထာဝဏ္ဏနာ

ယဒါဟံ ဓမ္မမဿောသိန္တိအာဒိကာ အာယသ္မတော မေဠဇိနတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ဥပစိနန္တော သုမေဓဿ ဘဂဝတော ကာလေ ကုလဂေဟေ နိဗ္ဗတ္တိတွာ ဝိညုတံ ပတ္တော ဧကဒိဝသံ ဘဂဝန္တံ ပိဏ္ဍာယ ဂစ္ဆန္တံ ဒိသွာ ပသန္နမာနသော မဓုရံ အာမောဒဖလံ အဒါသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ဗာရာဏသိယံ ခတ္တိယကုလေ နိဗ္ဗတ္တိတွာ မေဠဇိနောတိ လဒ္ဓနာမော ဝိဇ္ဇာသိပ္ပေသု နိပ္ဖတ္တိံ ဂတော ပဏ္ဍိတော ဗျတ္တော ဒိသာသု ပါကဋော အဟောသိ. သော ဘဂဝတိ ဗာရာဏသိယံ ဣသိပတနေ ဝိဟရန္တေ ဝိဟာရံ ဂန္တွာ သတ္ထာရံ ဥပသင်္ကမိတွာ ဓမ္မံ သုတွာ ပဋိလဒ္ဓသဒ္ဓေါ ပဗ္ဗဇိတွာ ဝိပဿနံ ပဋ္ဌပေတွာ တဒဟေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၅၁.၅၇-၆၂) –

‘‘သဟဿရံသီ ဘဂဝါ၊ သယမ္ဘူ အပရာဇိတော၊

ဝိဝေကာ ဝုဋ္ဌဟိတွာန၊ ဂေါစရာယာဘိနိက္ခမိ.

‘‘ဖလဟတ္ထော အဟံ ဒိသွာ၊ ဥပဂစ္ဆိံ နရာသဘံ၊

ပသန္နစိတ္တော သုမနော၊ အဝဋံ အဒဒိံ ဖလံ.

‘‘စတုန္နဝုတိတော ကပ္ပေ၊ ယံ ဖလံ အဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အပရဘာဂေ ဘိက္ခူဟိ၊ ‘‘အာဝုသော၊ ကိံ တယာ ဥတ္တရိမနုဿဓမ္မော အဓိဂတော’’တိ ပုဋ္ဌော သီဟနာဒံ နဒန္တော –

၁၃၁. ‘‘ယဒါဟံ ဓမ္မမဿောသိံ၊ ဘာသမာနဿ သတ္ထုနော၊

န ကင်္ခမဘိဇာနာမိ၊ သဗ္ဗညူ အပရာဇိတေ.

၁၃၂. ‘‘သတ္ထဝါဟေ မဟာဝီရေ၊ သာရထီနံ ဝရုတ္တမေ၊

မဂ္ဂေ ပဋိပဒါယံ ဝါ၊ ကင်္ခါ မယှံ န ဝိဇ္ဇတီ’’တိ. – ဂါထာဒွယံ အဘာသိ၊

တတ္ထ ယဒါတိ ယသ္မိံ ကာလေ. အဟန္တိ အတ္တာနံ နိဒ္ဒိသတိ. ဓမ္မန္တိ စတုသစ္စဓမ္မံ. အဿောသိန္တိ သုဏိံ. သတ္ထုနောတိ ဒိဋ္ဌဓမ္မိကာဒိအတ္ထေဟိ ဝေနေယျာနံ သာသနဋ္ဌေန သတ္ထုနော. ကင်္ခန္တိ သံသယံ. သင်္ခတမသင်္ခတဉ္စ အနဝသေသတော ဇာနနဋ္ဌေန သဗ္ဗညူ. ကုတောစိပိ ပရာဇိတာ ဘာဝေန အပရာဇိတေ. ဝေနေယျသတ္တာနံ သံသာရကန္တာရတော နိဗ္ဗာနံ ပဋိဝါဟနဋ္ဌေန သတ္ထဝါဟေ. ဣဒံ ဝုတ္တံ ဟောတိ – ယတော ပဘုတိ အဟံ သတ္ထုနော ဓမ္မံ ဒေသေန္တဿ စတုသစ္စဓမ္မံ အဿောသိံ သောတဒွါရာနုသာရေန ဥပဓာရေသိံ ဥပလဘိံ၊ တတော ပဋ္ဌာယ အနဝသေသသင်္ခတာသင်္ခတသမ္မုတိဓမ္မာနံ သယမ္ဘူဉာဏေန ဇာနနတော သဗ္ဗညူ အနာဝရဏဒဿာဝိမှိ၊ ပဉ္စန္နမ္ပိ မာရာနံ အဘိဘဝနတော တေဟိ အပရာဇိတတ္တာ သဒေဝကေ လောကေ အပ္ပဋိဟတဓမ္မစက္ကတ္တာ စ အပရာဇိတေ၊ ဝေနေယျသတ္တာနံ လောဘကန္တာရာဒိတော ဝါဟနဋ္ဌေန သတ္ထဝါဟေ၊ မဟာဝိက္ကန္တတာယ မဟာဝီရေ၊ အညေဟိ ဒုဒ္ဒမာနံ ပုရိသဒမ္မာနံ သရဏတော အစ္စန္တိကေန ဒမထေန ဒမနတော သာရထီနံ ပဝရဘူတေ ဥတ္တမေ သမ္မာသမ္ဗုဒ္ဓေ၊ ‘‘ဗုဒ္ဓေါ နု ခေါ နော နု ခေါ’’တိ ကင်္ခံ နာဘိဇာနာမိ အပရပ္ပစ္စယဘာဝတော. တထာရူပေ ဒေသိတေ အရိယမဂ္ဂေ တဒုပါဒါယဘူတာယ စ သီလာဒိပဋိပဒါယ ‘‘နိယျာနိကော နု ခေါ န နု ခေါ’’တိ ကင်္ခါ ဝိစိကိစ္ဆာ န ဝိဇ္ဇတိ နတ္ထီတိ. ဧတ္ထ စ အရိယဓမ္မေ သံသယာဘာဝကထနေန အရိယသံဃေပိ သံသယာဘာဝေါ ကထိတောယေဝါတိ ဒဋ္ဌဗ္ဗံ တတ္ထ ပတိဋ္ဌိတဿ အနညထာဘာဝတောတိ.

မေဠဇိနတ္ထေရဂါထာဝဏ္ဏနာ နိဋ္ဌိတာ.