၆. ဗိဠာလပါဒကသေဋ္ဌိဝတ္ထု

မာဝမညေထ ပုညဿာတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ဗိဠာလပါဒကသေဋ္ဌိံ အာရဗ္ဘ ကထေသိ.

ဧကသ္မိဉှိ သမယေ သာဝတ္ထိဝါသိနော ဝဂ္ဂဗန္ဓနေန ဗုဒ္ဓပ္ပမုခဿ ဘိက္ခုသံဃဿ ဒါနံ ဒေန္တိ. အထေကဒိဝသံ သတ္ထာ အနုမောဒနံ ကရောန္တော ဧဝမာဟ –

‘‘ဥပါသကာ ဣဓေကစ္စော အတ္တနာဝ ဒါနံ ဒေတိ၊ ပရံ န သမာဒပေတိ. သော နိဗ္ဗတ္တနိဗ္ဗတ္တဋ္ဌာနေ ဘောဂသမ္ပဒံ လဘတိ၊ နော ပရိဝါရသမ္ပဒံ. ဧကစ္စော အတ္တနာ ဒါနံ န ဒေတိ၊ ပရံ သမာဒပေတိ. သော နိဗ္ဗတ္တနိဗ္ဗတ္တဋ္ဌာနေ ပရိဝါရသမ္ပဒံ လဘတိ၊ နော ဘောဂသမ္ပဒံ. ဧကစ္စော အတ္တနာ စ န ဒေတိ၊ ပရဉ္စ န သမာဒပေတိ. သော နိဗ္ဗတ္တနိဗ္ဗတ္တဋ္ဌာနေ နေဝ ဘောဂသမ္ပဒံ လဘတိ၊ န ပရိဝါရသမ္ပဒံ၊ ဝိဃာသာဒေါ ဟုတွာ ဝိစရတိ. ဧကစ္စော အတ္တနာ စ ဒေတိ၊ ပရဉ္စ သမာဒပေတိ. သော နိဗ္ဗတ္တနိဗ္ဗတ္တဋ္ဌာနေ ဘောဂသမ္ပဒဉ္စေဝ လဘတိ၊ ပရိဝါရသမ္ပဒဉ္စာ’’တိ.

အထေကော ပဏ္ဍိတပုရိသော တံ ဓမ္မဒေသနံ သုတွာ ‘‘အဟော အစ္ဆရိယမိဒံ ကာရဏံ၊ အဟံ ဒါနိ ဥဘယသမ္ပတ္တိသံဝတ္တနိကံ ကမ္မံ ကရိဿာမီ’’တိ စိန္တေတွာ သတ္ထာရံ ဥဋ္ဌာယ ဂမနကာလေ အာဟ – ‘‘ဘန္တေ၊ သွေ အမှာကံ ဘိက္ခံ ဂဏှထာ’’တိ. ကိတ္တကေဟိ ပန တေ ဘိက္ခူဟိ အတ္ထောတိ? သဗ္ဗဘိက္ခူဟိ၊ ဘန္တေတိ. သတ္ထာ အဓိဝါသေသိ. သောပိ ဂါမံ ပဝိသိတွာ၊ ‘‘အမ္မတာတာ၊ မယာ သွာတနာယ ဗုဒ္ဓပ္ပမုခေါ ဘိက္ခုသံဃော နိမန္တိတော၊ ယော ယတ္တကာနံ ဘိက္ခူနံ သက္ကောတိ၊ သော တတ္တကာနံ ယာဂုအာဒီနံ အတ္ထာယ တဏ္ဍုလာဒီနိ ဒေတု၊ ဧကသ္မိံ ဌာနေ ပစာပေတွာ ဒါနံ ဒဿာမာ’’တိ ဥဂ္ဃေါသေန္တော ဝိစရိ.

အထ နံ ဧကော သေဋ္ဌိ အတ္တနော အာပဏဒွါရံ သမ္ပတ္တံ ဒိသွာ ‘‘အယံ အတ္တနော ပဟောနကေ ဘိက္ခူ အနိမန္တေတွာ ပန သကလဂါမံ သမာဒပေန္တော ဝိစရတီ’’တိ ကုဇ္ဈိတွာ ‘‘တယာ ဂဟိတဘာဇနံ အာဟရာ’’တိ တီဟိ အင်္ဂုလီဟိ ဂဟေတွာ ထောကေ တဏ္ဍုလေ အဒါသိ၊ တထာ မုဂ္ဂေ၊ တထာ မာသေတိ. သော တတော ပဋ္ဌာယ ဗိဠာလပါဒကသေဋ္ဌိ နာမ ဇာတော၊ သပ္ပိဖာဏိတာဒီနိ ဒေန္တောပိ ကရဏ္ဍံ ကုဋေ ပက္ခိပိတွာ ဧကတော ကောဏံ ကတွာ ဗိန္ဒုံ ဗိန္ဒုံ ပဂ္ဃရာယန္တော ထောကထောကမေဝ အဒါသိ. ဥပါသကော အဝသေသေဟိ ဒိန္နံ ဧကတော ကတွာ ဣမိနာ ဒိန္နံ ဝိသုံယေဝ အဂ္ဂဟေသိ. သော သေဋ္ဌိ တဿ ကိရိယံ ဒိသွာ ‘‘ကိံ နု ခေါ ဧသ မယာ ဒိန္နံ ဝိသုံ ဂဏှာတီ’’တိ စိန္တေတွာ တဿ ပစ္ဆတော ပစ္ဆတော ဧကံ စူဠုပဋ္ဌာကံ ပဟိဏိ ‘‘ဂစ္ဆ၊ ယံ ဧသ ကရောတိ၊ တံ ဇာနာဟီ’’တိ. သော ဂန္တွာ ‘‘သေဋ္ဌိဿ မဟပ္ဖလံ ဟောတူ’’တိ ယာဂုဘတ္တပူဝါနံ အတ္ထာယ ဧကံ ဒွေ တဏ္ဍုလေ ပက္ခိပိတွာ မုဂ္ဂမာသေပိ တေလဖာဏိတာဒိဗိန္ဒူနိပိ သဗ္ဗဘာဇနေသု ပက္ခိပိ. စူဠုပဋ္ဌာကော ဂန္တွာ သေဋ္ဌိဿ အာရောစေသိ. တံ သုတွာ သေဋ္ဌိ စိန္တေသိ – ‘‘သစေ မေ သော ပရိသမဇ္ဈေ အဝဏ္ဏံ ဘာသိဿတိ၊ မမ နာမေ ဂဟိတမတ္တေယေဝ နံ ပဟရိတွာ မာရေဿာမီ’’တိ နိဝါသနန္တရေ ဆုရိကံ ဗန္ဓိတွာ ပုနဒိဝသေ ဂန္တွာ ဘတ္တဂ္ဂေ အဋ္ဌာသိ. သော ပုရိသော ဗုဒ္ဓပ္ပမုခံ ဘိက္ခုသံဃံ ပရိဝိသိတွာ ဘဂဝန္တံ အာဟ – ‘‘ဘန္တေ၊ မယာ မဟာဇနံ သမာဒပေတွာ ဣမံ ဒါနံ ဒိန္နံ၊ တတ္ထ သမာဒပိတမနုဿာ အတ္တနော အတ္တနော ဗလေန ဗဟူနိပိ ထောကာနိပိ တဏ္ဍုလာဒီနိ အဒံသု၊ တေသံ သဗ္ဗေသံ မဟပ္ဖလံ ဟောတူ’’တိ. တံ သုတွာ သော သေဋ္ဌိ စိန္တေသိ – ‘‘အဟံ ‘အသုကေန နာမ အစ္ဆရာယ ဂဏှိတွာ တဏ္ဍုလာဒီနိ ဒိန္နာနီတိ မမ နာမေ ဂဟိတမတ္တေ ဣမံ မာရေဿာမီ’တိ အာဂတော၊ အယံ ပန သဗ္ဗသင်္ဂါဟိကံ ကတွာ ‘ယေဟိပိ နာဠိအာဒီဟိ မိနိတွာ ဒိန္နံ၊ ယေဟိပိ အစ္ဆရာယ ဂဟေတွာ ဒိန္နံ၊ သဗ္ဗေသံ မဟပ္ဖလံ ဟောတူ’တိ ဝဒတိ. သစာဟံ ဧဝရူပံ န ခမာပေဿာမိ၊ ဒေဝဒဏ္ဍော မမ မတ္ထကေ ပတိဿတီ’’တိ. သော တဿ ပါဒမူလေ နိပဇ္ဇိတွာ ‘‘ခမာဟိ မေ၊ သာမီ’’တိ အာဟ. ‘‘ကိံ ဣဒ’’န္တိ စ တေန ဝုတ္တေ သဗ္ဗံ တံ ပဝတ္တိံ အာရောစေသိ. တံ ကိရိယံ ဒိသွာ သတ္ထာ ‘‘ကိံ ဣဒ’’န္တိ ဒါနဝေယျာဝဋိကံ ပုစ္ဆိ. သော အတီတဒိဝသတော ပဋ္ဌာယ သဗ္ဗံ တံ ပဝတ္တိံ အာရောစေသိ. အထ နံ သတ္ထာ ‘‘ဧဝံ ကိရ သေဋ္ဌီ’’တိ ပုစ္ဆိတွာ၊ ‘‘အာမ၊ ဘန္တေ’’တိ ဝုတ္တေ၊ ‘‘ဥပါသက၊ ပုညံ နာမ ‘အပ္ပက’န္တိ န အဝမညိတဗ္ဗံ၊ မာဒိသဿ ဗုဒ္ဓပ္ပမုခဿ ဘိက္ခုသံဃဿ ဒါနံ ဒတွာ ‘အပ္ပက’န္တိ န အဝမညိတဗ္ဗံ. ပဏ္ဍိတမနုဿာ ဟိ ပုညံ ကရောန္တာ ဝိဝဋဘာဇနံ ဝိယ ဥဒကေန အနုက္ကမေန ပုညေန ပူရန္တိယေဝါ’’တိ ဝတွာ အနုသန္ဓိံ ဃဋေတွာ ဓမ္မံ ဒေသေန္တော ဣမံ ဂါထမာဟ –

၁၂၂. ‘‘မာဝမညေထ ပုညဿ၊ န မန္ဒံ အာဂမိဿတိ၊

ဥဒဗိန္ဒုနိပါတေန၊ ဥဒကုမ္ဘောပိ ပူရတိ၊

ဓီရော ပူရတိ ပုညဿ၊ ထောကံ ထောကမ္ပိ အာစိန’’န္တိ.

တဿတ္ထော – ပဏ္ဍိတမနုဿော ပုညံ ကတွာ ‘‘အပ္ပကမတ္တံ မယာ ကတံ၊ န မန္ဒံ ဝိပါကဝသေန အာဂမိဿတိ၊ ဧဝံ ပရိတ္တကံ ကမ္မံ ကဟံ မံ ဒက္ခိဿတိ၊ အဟံ ဝါ တံ ကဟံ ဒက္ခိဿာမိ၊ ကဒါ ဧတံ ဝိပစ္စိဿတီ’’တိ ဧဝံ ပုညံ မာဝမညေထ န အဝဇာနေယျ. ယထာ ဟိ နိရန္တရံ ဥဒဗိန္ဒုနိပါတေန ဝိဝရိတွာ ဌပိတံ ကုလာလဘာဇနံ ပူရတိ၊ ဧဝံ ဓီရော ပဏ္ဍိတပုရိသော ထောကံ ထောကမ္ပိ ပုညံ အာစိနန္တော ပုညဿ ပူရတီတိ.

ဒေသနာဝသာနေ သော သေဋ္ဌိ သောတာပတ္တိဖလံ ပါပုဏိ၊ သမ္ပတ္တပရိသာယပိ သာတ္ထိကာ ဓမ္မဒေသနာ အဟောသီတိ.

ဗိဠာလပါဒကသေဋ္ဌိဝတ္ထု ဆဋ္ဌံ.