၉. ဗာလိသိကဝတ္ထု

န တေန အရိယော ဟောတီတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ဧကံ အရိယံ နာမ ဗာလိသိကံ အာရဗ္ဘ ကထေသိ.

ဧကဒိဝသဉှိ သတ္ထာ တဿ သောတာပတ္တိမဂ္ဂဿူပနိဿယံ ဒိသွာ သာဝတ္ထိယာ ဥတ္တရဒွါရဂါမေ ပိဏ္ဍာယ စရိတွာ ဘိက္ခုသံဃပရိဝုတော တတော အာဂစ္ဆတိ. တသ္မိံ ခဏေ သော ဗာလိသိကော ဗလိသေန မစ္ဆေ ဂဏှန္တော ဗုဒ္ဓပ္ပမုခံ ဘိက္ခုသံဃံ ဒိသွာ ဗလိသယဋ္ဌိံ ဆဍ္ဍေတွာ အဋ္ဌာသိ. သတ္ထာ တဿ အဝိဒူရေ ဌာနေ နိဝတ္တိတွာ ဌိတော ‘‘တွံ ကိံ နာမောသီ’’တိ သာရိပုတ္တတ္ထေရာဒီနံ နာမာနိ ပုစ္ဆိ. တေပိ ‘‘အဟံ သာရိပုတ္တော အဟံ မောဂ္ဂလ္လာနော’’တိ အတ္တနော အတ္တနော နာမာနိ ကထယိံသု. ဗာလိသိကော စိန္တေသိ – ‘‘သတ္ထာ သဗ္ဗေသံ နာမာနိ ပုစ္ဆတိ၊ မမမ္ပိ နာမံ ပုစ္ဆိဿတိ မညေ’’တိ. သတ္ထာ တဿ ဣစ္ဆံ ဉတွာ၊ ‘‘ဥပါသက၊ တွံ ကော နာမောသီ’’တိ ပုစ္ဆိတွာ ‘‘အဟံ၊ ဘန္တေ၊ အရိယော နာမာ’’တိ ဝုတ္တေ ‘‘န၊ ဥပါသက၊ တာဒိသာ ပါဏာတိပါတိနော အရိယာ နာမ ဟောန္တိ၊ အရိယာ ပန မဟာဇနဿ အဟိံသနဘာဝေ ဌိတာ’’တိ ဝတွာ ဣမံ ဂါထမာဟ –

၂၇၀. ‘‘န တေန အရိယော ဟောတိ၊ ယေန ပါဏာနိ ဟိံသတိ၊

အဟိံသာ သဗ္ဗပါဏာနံ၊ အရိယောတိ ပဝုစ္စတီ’’တိ.

တတ္ထ အဟိံသာတိ အဟိံသနေန. ဣဒံ ဝုတ္တံ ဟောတိ – ယေန ဟိ ပါဏာနိ ဟိံသတိ၊ န တေန ကာရဏေန အရိယော ဟောတိ. ယော ပန သဗ္ဗပါဏာနံ ပါဏိအာဒီဟိ အဟိံသနေန မေတ္တာဒိဘာဝနာယ ပတိဋ္ဌိတတ္တာ ဟိံသတော အာရာဝ ဌိတော၊ အယံ အရိယောတိ ဝုစ္စတီတိ အတ္ထော.

ဒေသနာဝသာနေ ဗာလိသိကော သောတာပတ္တိဖလေ ပတိဋ္ဌဟိ၊ သမ္ပတ္တာနမ္ပိ သာတ္ထိကာ ဓမ္မဒေသနာ အဟောသီတိ.

ဗာလိသိကဝတ္ထု နဝမံ.