၆. ဟတ္ထကဝတ္ထု

န မုဏ္ဍကေန သမဏောတိ ဣမံ ဓမ္မဒေသနံ သတ္ထာ သာဝတ္ထိယံ ဝိဟရန္တော ဟတ္ထကံ အာရဗ္ဘ ကထေသိ.

သော ကိရ ဝါဒက္ခိတ္တော ‘‘တုမှေ အသုကဝေလာယ အသုကဋ္ဌာနံ နာမ အာဂစ္ဆေယျာထ၊ ဝါဒံ ကရိဿာမာ’’တိ ဝတွာ ပုရေတရမေဝ တတ္ထ ဂန္တွာ ‘‘ပဿထ၊ တိတ္ထိယာ မမ ဘယေန နာဂတာ၊ ဧသောဝ ပန နေသံ ပရာဇယော’’တိအာဒီနိ ဝတွာ ဝါဒက္ခိတ္တော အညေနညံ ပဋိစရန္တော ဝိစရတိ. သတ္ထာ ‘‘ဟတ္ထကော ကိရ ဧဝံ ကရောတီ’’တိ သုတွာ တံ ပက္ကောသာပေတွာ ‘‘သစ္စံ ကိရ တွံ၊ ဟတ္ထက၊ ဧဝံ ကရောသီ’’တိ ပုစ္ဆိတွာ ‘‘သစ္စ’’န္တိ ဝုတ္တေ၊ ‘‘ကသ္မာ ဧဝံ ကရောသိ? ဧဝရူပဉှိ မုသာဝါဒံ ကရောန္တော သီသမုဏ္ဍနာဒိမတ္တေနေဝ သမဏော နာမ န ဟောတိ. ယော ပန အဏူနိ ဝါ ထူလာနိ ဝါ ပါပါနိ သမေတွာ ဌိတော၊ အယမေဝ သမဏော’’တိ ဝတွာ ဣမာ ဂါထာ အဘာသိ –

၂၆၄. ‘‘န မုဏ္ဍကေန သမဏော၊ အဗ္ဗတော အလိကံ ဘဏံ၊

ဣစ္ဆာလောဘသမာပန္နော၊ သမဏော ကိံ ဘဝိဿတိ.

၂၆၅. ‘‘ယော စ သမေတိ ပါပါနိ၊ အဏုံ ထူလာနိ သဗ္ဗသော၊

သမိတတ္တာ ဟိ ပါပါနံ၊ သမဏောတိ ပဝုစ္စတီ’’တိ.

တတ္ထ မုဏ္ဍကေနာတိ သီသမုဏ္ဍနမတ္တေန. အဗ္ဗတောတိ သီလဝတေန စ ဓုတင်္ဂဝတေန စ ဝိရဟိတော. အလိကံ ဘဏန္တိ မုသာဝါဒံ ဘဏန္တော အသမ္ပတ္တေသု အာရမ္မဏေသု ဣစ္ဆာယ ပတ္တေသု စ လောဘေန သမန္နာဂတော သမဏော နာမ ကိံ ဘဝိဿတိ? သမေတီတိ ယော စ ပရိတ္တာနိ ဝါ မဟန္တာနိ ဝါ ပါပါနိ ဝူပသမေတိ၊ သော တေသံ သမိတတ္တာ သမဏောတိ ပဝုစ္စတီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ဟတ္ထကဝတ္ထု ဆဋ္ဌံ.