၂. ဆဗ္ဗဂ္ဂိယဝတ္ထု

န တေန ပဏ္ဍိတော ဟောတီတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ဆဗ္ဗဂ္ဂိယေ အာရဗ္ဘ ကထေသိ.

တေ ကိရ ဝိဟာရေပိ ဂါမေပိ ဘတ္တဂ္ဂံ အာကုလံ ကရောန္တာ ဝိစရန္တိ. အထေကဒိဝသေ ဘိက္ခူ ဂါမေ ဘတ္တကိစ္စံ ကတွာ အာဂတေ ဒဟရေ သာမဏေရေ စ ပုစ္ဆိံသု – ‘‘ကီဒိသံ၊ အာဝုသော၊ ဘတ္တဂ္ဂ’’န္တိ? ဘန္တေ၊ မာ ပုစ္ဆထ၊ ဆဗ္ဗဂ္ဂိယာ ‘‘မယမေဝ ဝိယတ္တာ၊ မယမေဝ ပဏ္ဍိတာ၊ ဣမေ ပဟရိတွာ သီသေ ကစဝရံ အာကိရိတွာ နီဟရိဿာမာ’’တိ ဝတွာ အမှေ ပိဋ္ဌိယံ ဂဟေတွာ ကစဝရံ ဩကိရန္တာ ဘတ္တဂ္ဂံ အာကုလံ အကံသူတိ. ဘိက္ခူ သတ္ထု သန္တိကံ ဂန္တွာ တမတ္ထံ အာရောစေသုံ. သတ္ထာ ‘‘နာဟံ၊ ဘိက္ခဝေ၊ ဗဟုံ ဘာသိတွာ ပရေ ဝိဟေဌယမာနံ ‘ပဏ္ဍိတော’တိ ဝဒါမိ၊ ခေမိနံ ပန အဝေရီနံ အဘယမေဝ ပဏ္ဍိတောတိ ဝဒါမီ’’တိ ဝတွာ ဣမံ ဂါထမာဟ –

၂၅၈. ‘‘န တေန ပဏ္ဍိတော ဟောတိ၊ ယာဝတာ ဗဟု ဘာသတိ၊

ခေမီ အဝေရီ အဘယော၊ ပဏ္ဍိတောတိ ပဝုစ္စတီ’’တိ.

တတ္ထ ယာဝတာတိ ယတ္တကေန ကာရဏေန သံဃမဇ္ဈာဒီသု ဗဟုံ ကထေတိ၊ တေန ပဏ္ဍိတော နာမ န ဟောတိ. ယော ပန သယံ ခေမီ ပဉ္စန္နံ ဝေရာနံ အဘာဝေန အဝေရီ နိဗ္ဘယော၊ ယံ ဝါ အာဂမ္မ မဟာဇနဿ ဘယံ န ဟောတိ၊ သော ပဏ္ဍိတော နာမ ဟောတီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ဆဗ္ဗဂ္ဂိယဝတ္ထု ဒုတိယံ.