၆. စူဠသာရိဝတ္ထု

သုဇီဝန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော စူဠသာရိံ နာမ သာရိပုတ္တတ္ထေရဿ သဒ္ဓိဝိဟာရိကံ အာရဗ္ဘ ကထေသိ.

သော ကိရ ဧကဒိဝသေ ဝေဇ္ဇကမ္မံ ကတွာ ပဏီတဘောဇနံ လဘိတွာ အာဒါယ နိက္ခမန္တော အန္တရာမဂ္ဂေ ထေရံ ဒိသွာ၊ ‘‘ဘန္တေ၊ ဣဒံ မယာ ဝေဇ္ဇကမ္မံ ကတွာ လဒ္ဓံ၊ တုမှေ အညတ္ထ ဧဝရူပံ ဘောဇနံ န လဘိဿထ၊ ဣမံ ဘုဉ္ဇထ၊ အဟံ တေ ဝေဇ္ဇကမ္မံ ကတွာ နိစ္စကာလံ ဧဝရူပံ အာဟာရံ အာဟရိဿာမီ’’တိ အာဟ. ထေရော တဿ ဝစနံ သုတွာ တုဏှီဘူတောဝ ပက္ကာမိ. ဘိက္ခူ ဝိဟာရံ ဂန္တွာ သတ္ထု တမတ္ထံ အာရောစေသုံ. သတ္ထာ၊ ‘‘ဘိက္ခဝေ၊ အဟိရိကော နာမ ပဂဗ္ဘော ကာကသဒိသော ဟုတွာ ဧကဝီသတိဝိဓာယ အနေသနာယ ဌတွာ သုခံ ဇီဝတိ၊ ဟိရိဩတ္တပ္ပသမ္ပန္နော ပန ဒုက္ခံ ဇီဝတီ’’တိ ဝတွာ ဣမာ ဂါထာ အဘာသိ –

၂၄၄. ‘‘သုဇီဝံ အဟိရိကေန၊ ကာကသူရေန ဓံသိနာ၊

ပက္ခန္ဒိနာ ပဂဗ္ဘေန၊ သံကိလိဋ္ဌေန ဇီဝိတံ.

၂၄၅. ‘‘ဟိရီမတာ စ ဒုဇ္ဇီဝံ၊ နိစ္စံ သုစိဂဝေသိနာ၊

အလီနေနာပ္ပဂဗ္ဘေန၊ သုဒ္ဓါဇီဝေန ပဿတာ’’တိ.

တတ္ထ အဟိရိကေနာတိ ဆိန္နဟိရောတ္တပ္ပကေန. ဧဝရူပေန ဟိ အမာတရမေဝ ‘‘မာတာ မေ’’တိ အပိတာဒယော ဧဝ စ ‘‘ပိတာ မေ’’တိအာဒိနာ နယေန ဝတွာ ဧကဝီသတိဝိဓာယ အနေသနာယ ပတိဋ္ဌာယ သုခေန ဇီဝတုံ သက္ကာ. ကာကသူရေနာတိ သူရကာကသဒိသေန. ယထာ ဟိ သူရကာကော ကုလဃရေသု ယာဂုအာဒီနိ ဂဏှိတုကာမော ဘိတ္တိအာဒီသု နိသီဒိတွာ အတ္တနော ဩလောကနဘာဝံ ဉတွာ အနောလောကေန္တော ဝိယ အညဝိဟိတကော ဝိယ နိဒ္ဒါယန္တော ဝိယ စ ဟုတွာ မနုဿာနံ ပမာဒံ သလ္လက္ခေတွာ အနုပတိတွာ ‘‘သူသူ’’တိ ဝဒန္တေသုယေဝ ဘာဇနတော မုခပူရံ ဂဟေတွာ ပလာယတိ၊ ဧဝမေဝံ အဟိရိကပုဂ္ဂလောပိ ဘိက္ခူဟိ သဒ္ဓိံ ဂါမံ ပဝိသိတွာ ယာဂုဘတ္တဋ္ဌာနာဒီနိ ဝဝတ္ထပေတိ. တတ္ထ ဘိက္ခူ ပိဏ္ဍာယ စရိတွာ ယာပနမတ္တံ အာဒါယ အာသနသာလံ ဂန္တွာ ပစ္စဝေက္ခန္တာ ယာဂုံ ပိဝိတွာ ကမ္မဋ္ဌာနံ မနသိ ကရောန္တိ သဇ္ဈာယန္တိ အာသနသာလံ သမ္မဇ္ဇန္တိ. အယံ ပန အကတွာ ဂါမာဘိမုခေါဝ ဟောတိ.

သော ဟိ ဘိက္ခူဟိ ‘‘ပဿထိမ’’န္တိ ဩလောကိယမာနောပိ အနောလောကေန္တော ဝိယ အညဝိဟိတော ဝိယ နိဒ္ဒါယန္တော ဝိယ ဂဏ္ဌိကံ ပဋိမုဉ္စန္တော ဝိယ စီဝရံ သံဝိဒဟန္တော ဝိယ ဟုတွာ ‘‘အသုကံ နာမ မေ ကမ္မံ အတ္ထီ’’တိ ဝဒန္တော ဥဋ္ဌာယာသနာ ဂါမံ ပဝိသိတွာ ပါတောဝ ဝဝတ္ထပိတဂေဟေသု အညတရံ ဂေဟံ ဥပသင်္ကမိတွာ ဃရမာနုသကေသု ထောကံ ကဝါဋံ ပိဓာယ ဒွါရေ နိသီဒိတွာ ကန္ဒန္တေသုပိ ဧကေန ဟတ္ထေန ကဝါဋံ ပဏာမေတွာ အန္တော ပဝိသတိ. အထ နံ ဒိသွာ အကာမကာပိ အာသနေ နိသီဒါပေတွာ ယာဂုအာဒီသု ယံ အတ္ထိ၊ တံ ဒေန္တိ. သော ယာဝဒတ္ထံ ဘုဉ္ဇိတွာ အဝသေသံ ပတ္တေနာဒါယ ပက္ကမတိ. အယံ ကာကသူရော နာမ. ဧဝရူပေန အဟိရိကေန သုဇီဝန္တိ အတ္ထော.

ဓံသိနာတိ ‘‘အသုကတ္ထေရော နာမ အပ္ပိစ္ဆော’’တိအာဒီနိ ဝဒန္တေသု – ‘‘ကိံ ပန မယံ န အပ္ပိစ္ဆာ’’တိအာဒိဝစနေန ပရေသံ ဂုဏဓံသနတာယ ဓံသိနာ. တထာရူပဿ ဝစနံ သုတွာ ‘‘အယမ္ပိ အပ္ပိစ္ဆတာဒိဂုဏေ ယုတ္တော’’တိ မညမာနာ မနုဿာ ဒါတဗ္ဗံ မညန္တိ. သော ပန တတော ပဋ္ဌာယ ဝိညူပုရိသာနံ စိတ္တံ အာရာဓေတုံ အသက္ကောန္တော တမှာပိ လာဘာ ပရိဟာယတိ. ဧဝံ ဓံသိပုဂ္ဂလော အတ္တနောပိ ပရဿပိ လာဘံ နာသေတိယေဝ.

ပက္ခန္ဒိနာတိ ပက္ခန္ဒစာရိနာ. ပရေသံ ကိစ္စာနိပိ အတ္တနော ကိစ္စာနိ ဝိယ ဒဿေန္တော ပါတောဝ ဘိက္ခူသု စေတိယင်္ဂဏာဒီသု ဝတ္တံ ကတွာ ကမ္မဋ္ဌာနမနသိကာရေန ထောကံ နိသီဒိတွာ ဥဋ္ဌာယ ဂါမံ ပဝိသန္တေသု မုခံ ဓောဝိတွာ ပဏ္ဍုကာသာဝပါရုပနအက္ခိအဉ္ဇနသီသမက္ခနာဒီဟိ အတ္တဘာဝံ မဏ္ဍေတွာ သမ္မဇ္ဇန္တော ဝိယ ဒွေ တယော သမ္မဇ္ဇနိပဟာရေ ဒတွာ ဒွါရကောဋ္ဌကာဘိမုခေါ ဟောတိ. မနုဿာ ပါတောဝ ‘‘စေတိယံ ဝန္ဒိဿာမ၊ မာလာပူဇံ ကရိဿာမာ’’တိ အာဂတာ တံ ဒိသွာ ‘‘အယံ ဝိဟာရော ဣမံ ဒဟရံ နိဿာယ ပဋိဇဂ္ဂနံ လဘတိ၊ ဣမံ မာ ပမဇ္ဇိတ္ထာ’’တိ ဝတွာ တဿ ဒါတဗ္ဗံ မညန္တိ. ဧဝရူပေန ပက္ခန္ဒိနာပိ သုဇီဝံ. ပဂဗ္ဘေနာတိ ကာယပါဂဗ္ဘိယာဒီဟိ သမန္နာဂတေန. သံကိလိဋ္ဌေန ဇီဝိတန္တိ ဧဝံ ဇီဝိကံ ကပ္ပေတွာ ဇီဝန္တေန ဟိ ပုဂ္ဂလေန သံကိလိဋ္ဌေန ဟုတွာ ဇီဝိတံ နာမ ဟောတိ၊ တံ ဒုဇ္ဇီဝိတံ ပါပမေဝါတိ အတ္ထော.

ဟိရီမတာ စာတိ ဟိရောတ္တပ္ပသမ္ပန္နေန ပုဂ္ဂလေန ဒုဇ္ဇီဝံ. သော ဟိ အမာတာဒယောဝ ‘‘မာတာ မေ’’တိအာဒီနိ အဝတွာ အဓမ္မိကေ ပစ္စယေ ဂူထံ ဝိယ ဇိဂုစ္ဆန္တော ဓမ္မေန သမေန ပရိယေသန္တော သပဒါနံ ပိဏ္ဍာယ စရိတွာ ဇီဝိကံ ကပ္ပေန္တော လူခံ ဇီဝိကံ ဇီဝတီတိ အတ္ထော. သုစိဂဝေသိနာတိ သုစီနိ ကာယကမ္မာဒီနိ ဂဝေသန္တေန. အလီနေနာတိ ဇီဝိတဝုတ္တိမနလ္လီနေန. သုဒ္ဓါဇီဝေန ပဿတာတိ ဧဝရူပေါ ဟိ ပုဂ္ဂလော သုဒ္ဓါဇီဝေါ နာမ ဟောတိ. တေန ဧဝံ သုဒ္ဓါဇီဝေန တမေဝ သုဒ္ဓါဇီဝံ သာရတော ပဿတာ လူခဇီဝိတဝသေန ဒုဇ္ဇီဝံ ဟောတီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

စူဠသာရိဝတ္ထု ဆဋ္ဌံ.