၁၁. ဥဇ္ဈာနသညိတ္ထေရဝတ္ထု

ပရဝဇ္ဇာနုပဿိဿာတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ဥဇ္ဈာနသညိံ နာမ ဧကံ ထေရံ အာရဗ္ဘ ကထေသိ.

သော ကိရ ‘‘အယံ ဧဝံ နိဝါသေတိ၊ ဧဝံ ပါရုပတီ’’တိ ဘိက္ခူနံ အန္တရမေဝ ဂဝေသန္တော ဝိစရတိ. ဘိက္ခူ ‘‘အသုကော နာမ၊ ဘန္တေ၊ ထေရော ဧဝံ ကရောတီ’’တိ သတ္ထု အာရောစေသုံ. သတ္ထာ၊ ‘‘ဘိက္ခဝေ၊ ဝတ္တသီသေ ဌတွာ ဧဝံ ဩဝဒန္တော အနနုပဝါဒေါ. ယော ပန နိစ္စံ ဥဇ္ဈာနသညိတာယ ပရေသံ အန္တရံ ပရိယေသမာနော ဧဝံ ဝတွာ ဝိစရတိ၊ တဿ ဈာနာဒီသု ဧကောပိ ဝိသေသော နုပ္ပဇ္ဇတိ၊ ကေဝလံ အာသဝါယေဝ ဝဍ္ဎန္တီ’’တိ ဝတွာ ဣမံ ဂါထမာဟ –

၂၅၃. ‘‘ပရဝဇ္ဇာနုပဿိဿ၊ နိစ္စံ ဥဇ္ဈာနသညိနော၊

အာသဝါ တဿ ဝဍ္ဎန္တိ၊ အာရာ သော အာသဝက္ခယာ’’တိ.

တတ္ထ ဥဇ္ဈာနသညိနောတိ ဧဝံ နိဝါသေတဗ္ဗံ ဧဝံ ပါရုပိတဗ္ဗန္တိ ပရေသံ အန္တရဂဝေသိတာယ ဥဇ္ဈာနဗဟုလဿ ပုဂ္ဂလဿ ဈာနာဒီသု ဧကဓမ္မောပိ န ဝဍ္ဎတိ၊ အထ ခေါ အာသဝါဝ တဿ ဝဍ္ဎန္တိ. တေနေဝ ကာရဏေန သော အရဟတ္တမဂ္ဂသင်္ခါတာ အာသဝက္ခယာ အာရာ ဒူရံ ဂတောဝ ဟောတီတိ.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ဥဇ္ဈာနသညိတ္ထေရဝတ္ထု ဧကာဒသမံ.