၄. အညတရကုလဒါရိကာဝတ္ထု

နတ္ထိ ရာဂသမောတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော အညတရံ ကုလဒါရိကံ အာရဗ္ဘ ကထေသိ.

တဿာ ကိရ မာတာပိတရော အာဝါဟံ ကတွာ မင်္ဂလဒိဝသေ သတ္ထာရံ နိမန္တယိံသု. သတ္ထာ ဘိက္ခုသံဃပရိဝုတော တတ္ထ ဂန္တွာ နိသီဒိ. သာပိ ခေါ ဝဓုကာ ဘိက္ခုသံဃဿ ဥဒကပရိဿာဝနာဒီနိ ကရောန္တီ အပရာပရံ သဉ္စရတိ. သာမိကောပိဿာ တံ ဩလောကေန္တော အဋ္ဌာသိ. တဿ ရာဂဝသေန ဩလောကေန္တဿ အန္တော ကိလေသော သမုဒါစရိ. သော အညာဏာဘိဘူတော နေဝ ဗုဒ္ဓံ ဥပဋ္ဌဟိ၊ န အသီတိ မဟာထေရေ. ဟတ္ထံ ပသာရေတွာ ‘‘တံ ဝဓုကံ ဂဏှိဿာမီ’’တိ ပန စိတ္တံ အကာသိ. သတ္ထာ တဿဇ္ဈာသယံ ဩလောကေတွာ ယထာ တံ ဣတ္ထိံ န ပဿတိ၊ ဧဝမကာသိ. သော အဒိသွာ သတ္ထာရံ ဩလောကေန္တော အဋ္ဌာသိ. သတ္ထာ တဿ ဩလောကေတွာ ဌိတကာလေ ‘‘ကုမာရက၊ န ဟိ ရာဂဂ္ဂိနာ သဒိသော အဂ္ဂိ နာမ၊ ဒေါသကလိနာ သဒိသော ကလိ နာမ၊ ခန္ဓပရိဟရဏဒုက္ခေန သဒိသံ ဒုက္ခံ နာမ အတ္ထိ၊ နိဗ္ဗာနသုခသဒိသံ သုခမ္ပိ နတ္ထိယေဝါ’’တိ ဝတွာ ဣမံ ဂါထမာဟ –

၂၀၂. ‘‘နတ္ထိ ရာဂသမော အဂ္ဂိ၊ နတ္ထိ ဒေါသသမော ကလိ၊

နတ္ထိ ခန္ဓသမာ ဒုက္ခာ၊ နတ္ထိ သန္တိပရံ သုခ’’န္တိ.

တတ္ထ နတ္ထိ ရာဂသမောတိ ဓူမံ ဝါ ဇာလံ ဝါ အင်္ဂါရံ ဝါ အဒဿေတွာ အန္တောယေဝ ဈာပေတွာ ဘသ္မမုဋ္ဌိံ ကာတုံ သမတ္ထော ရာဂေန သမော အညော အဂ္ဂိ နာမ နတ္ထိ. ကလီတိ ဒေါသေန သမော အပရာဓောပိ နတ္ထိ. ခန္ဓသမာတိ ခန္ဓေဟိ သမာ. ယထာ ပရိဟရိယမာနာ ခန္ဓာ ဒုက္ခာ၊ ဧဝံ အညံ ဒုက္ခံ နာမ နတ္ထိ. သန္တိပရန္တိ နိဗ္ဗာနတော ဥတ္တရိံ အညံ သုခမ္ပိ နတ္ထိ. အညဉှိ သုခံ သုခမေဝ၊ နိဗ္ဗာနံ ပရမသုခန္တိ အတ္ထော.

ဒေသနာဝသာနေ ကုမာရိကာ စ ကုမာရကော စ သောတာပတ္တိဖလေ ပတိဋ္ဌဟိံသု. တသ္မိံ သမယေ ဘဂဝါ တေသံ အညမညံ ဒဿနာကာရံ အကာသီတိ.

အညတရကုလဒါရိကာဝတ္ထု စတုတ္ထံ.