ဒေဝတာရောစနဝဏ္ဏနာ

၉၁. ဧတ္တာဝတာ စ ဣမိနာ ဝိပဿိဿ ဘဂဝတော အပဒါနာနုသာရေန ဝိတ္ထာရကထနေန – ‘‘တထာဂတဿေဝေသာ၊ ဘိက္ခဝေ၊ ဓမ္မဓာတု သုပ္ပဋိဝိဒ္ဓါ’’တိ ဧဝံ ဝုတ္တာယ ဓမ္မဓာတုယာ သုပ္ပဋိဝိဒ္ဓဘာဝံ ပကာသေတွာ ဣဒါနိ – ‘‘ဒေဝတာပိ တထာဂတဿ ဧတမတ္ထံ အာရောစေသု’’န္တိ ဝုတ္တံ ဒေဝတာရောစနံ ပကာသေတုံ ဧကမိဒါဟန္တိအာဒိမာဟ.

တတ္ထ သုဘဂဝနေတိ ဧဝံနာမကေ ဝနေ. သာလရာဇမူလေတိ ဝနပ္ပတိဇေဋ္ဌကဿ မူလေ. ကာမစ္ဆန္ဒံ ဝိရာဇေတွာတိ အနာဂါမိမဂ္ဂေန မူလသမုဂ္ဃါတဝသေန ဝိရာဇေတွာ. ယထာ စ ဝိပဿိဿ၊ ဧဝံ သေသဗုဒ္ဓါနမ္ပိ သာသနေ ဝုတ္ထဗြဟ္မစရိယာ ဒေဝတာ အာရောစယိံသု၊ ပါဠိ ပန ဝိပဿိဿ စေဝ အမှာကဉ္စ ဘဂဝတော ဝသေန အာဂတာ.

တတ္ထ အတ္တနော သမ္ပတ္တိယာ န ဟာယန္တိ၊ န ဝိဟာယန္တီတိ အဝိဟာ. န ကဉ္စိ သတ္တံ တပန္တီတိ အတပ္ပါ. သုန္ဒရဒဿနာ အဘိရူပါ ပါသာဒိကာတိ သုဒဿာ. သုဋ္ဌု ပဿန္တိ၊ သုန္ဒရမေတေသံ ဝါ ဒဿနန္တိ သုဒဿီ. သဗ္ဗေဟေဝ စ သဂုဏေဟိ ဘဝသမ္ပတ္တိယာ စ ဇေဋ္ဌာ၊ နတ္ထေတ္ထ ကနိဋ္ဌာတိ အကနိဋ္ဌာ.

ဣဓ ဌတွာ ဘာဏဝါရာ သမောဓာနေတဗ္ဗာ. ဣမသ္မိဉှိ သုတ္တေ ဝိပဿိဿ ဘဂဝတော အပဒါနဝသေန တယော ဘာဏဝါရာ ဝုတ္တာ. ယထာ စ ဝိပဿိဿ၊ ဧဝံ သိခီအာဒီနမ္ပိ အပဒါနဝသေန ဝုတ္တာဝ. ပါဠိ ပန သင်္ခိတ္တာ. ဣတိ သတ္တန္နံ ဗုဒ္ဓါနံ ဝသေန အမှာကံ ဘဂဝတာ ဧကဝီသတိ ဘာဏဝါရာ ကထိတာ. တထာ အဝိဟေဟိ. တထာ အတပ္ပေဟိ. တထာ သုဒဿေဟိ. တထာ သုဒဿီဟိ. တထာ အကနိဋ္ဌေဟီတိ သဗ္ဗမ္ပိ ဆဗ္ဗီသတိဘာဏဝါရသတံ ဟောတိ. တေပိဋကေ ဗုဒ္ဓဝစနေ အညံ သုတ္တံ ဆဗ္ဗီသတိဘာဏဝါရသတပရိမာဏံ နာမ နတ္ထိ၊ သုတ္တန္တရာဇာ နာမ အယံ သုတ္တန္တောတိ ဝေဒိတဗ္ဗော. ဣတော ပရံ အနုသန္ဓိဒွယမ္ပိ နိယျာတေန္တော ဣတိ ခေါ ဘိက္ခဝေတိအာဒိမာဟ. တံ သဗ္ဗံ ဥတ္တာနမေဝါတိ.

ဣတိ သုမင်္ဂလဝိလာသိနိယာ ဒီဃနိကာယဋ္ဌကထာယံ

မဟာပဒါနသုတ္တဝဏ္ဏနာ နိဋ္ဌိတာ.