ဗျာဓိပုရိသဝဏ္ဏနာ

၄၇. အဒ္ဒသ ခေါတိ ပုဗ္ဗေ ဝုတ္တနယေနေဝ သုဒ္ဓါဝါသေဟိ ဒဿိတံ အဒ္ဒသ. အာဗာဓိကန္တိ ဣရိယာပထဘဉ္ဇနကေန ဝိသဘာဂဗာဓေန အာဗာဓိကံ. ဒုက္ခိတန္တိ ရောဂဒုက္ခေန ဒုက္ခိတံ. ဗာဠှဂိလာနန္တိ အဓိမတ္တဂိလာနံ. ပလိပန္နန္တိ နိမုဂ္ဂံ. ဇရာ ပညာယိဿတိ ဗျာဓိ ပညာယိဿတီတိ ဣဓာပိ ယာယ ဇာတိယာ သတိ ဣဒံ ဒွယံ ပညာယတိ၊ ဓိက္ကတာ သာ ဇာတိ၊ အဇာတံ ခေမန္တိ ဇာတိယာ မူလံ ခဏန္တော နိသီဒိ၊ ဒုတိယေန သလ္လေန ဝိဒ္ဓေါ ဝိယ.