၂. ဥပ္ပတ္တာနုပ္ပတ္တိဝါရဝဏ္ဏနာ

၉၉၁. ဒုတိယဝါရေ ယေ ဓမ္မာ ကာမဘဝေ ကာမဓာတုသမ္ဘူတာနဉ္စ သတ္တာနံ ဥပ္ပဇ္ဇန္တိ – ကာမဓာတုယံ ပရိယာပန္နာ ဝါ အပရိယာပန္နာ ဝါ – တေ သဗ္ဗေ သင်္ဂဟေတွာ ကာမဓာတုယာ ပဉ္စက္ခန္ဓာတိအာဒိ ဝုတ္တံ. ရူပဓာတုအာဒီသုပိ ဧသေဝ နယော. ယသ္မာ ပန ရူပဓာတုပရိယာပန္နာနံ သတ္တာနံ ဃာနာယတနာဒီနံ အဘာဝေန ဂန္ဓာယတနာဒီနိ အာယတနာဒိကိစ္စံ န ကရောန္တိ၊ တသ္မာ ရူပဓာတုယာ ဆ အာယတနာနိ၊ နဝ ဓာတုယောတိအာဒိ ဝုတ္တံ. ယသ္မာ စ ဩကာသဝသေန ဝါ သတ္တုပ္ပတ္တိဝသေန ဝါ အပရိယာပန္နဓာတု နာမ နတ္ထိ၊ တသ္မာ အပရိယာပန္နဓာတုယာတိ အဝတွာ ယံ ယံ အပရိယာပန္နံ တံ တဒေဝ ဒဿေတုံ အပရိယာပန္နေ ကတိ ခန္ဓာတိအာဒိ ဝုတ္တံ.