(၆.) ဆက္ကနိဒ္ဒေသဝဏ္ဏနာ

၉၄၄. ဆက္ကနိဒ္ဒေသေ ယသ္မာ ကုဒ္ဓေါ ဝါ ကောဓဝသေန၊ သန္ဒိဋ္ဌိပရာမာသီ ဝါ သန္ဒိဋ္ဌိပရာမာသိတာယ ကလဟံ ဝိဂ္ဂဟံ ဝိဝါဒံ အာပဇ္ဇတိ၊ တသ္မာ ကောဓာဒယော ‘ဝိဝါဒမူလာနီ’တိ ဝုတ္တာ.

ဆန္ဒရာဂနိဒ္ဒေသေ ကာမဂေဟသိတတ္တာ ဆန္ဒရာဂါ ဂေဟဿိတာ ဓမ္မာတိ သင်္ဂဟတော ဝတွာ ပုန ပဘေဒတော ဒဿေတုံ မနာပိယေသု ရူပေသူတိအာဒိ ဝုတ္တံ. တတ္ထ မနာပိယေသူတိ မနဝဍ္ဎနကေသု ဣဋ္ဌေသု. ဝိရောဓာ ဧဝ ဝိရောဓဝတ္ထူနိ. အမနာပိယေသူတိ အနိဋ္ဌေသု.

၉၄၅. အဂါရဝေသု အဂါရဝေါတိ ဂါရဝဝိရဟိတော. အပ္ပတိဿောတိ အပ္ပတိဿယော အနီစဝုတ္တိ. ဧတ္ထ ပန ယော ဘိက္ခု သတ္ထရိ ဓရမာနေ တီသု ကာလေသု ဥပဋ္ဌာနံ န ယာတိ၊ သတ္ထရိ အနုပါဟနေ စင်္ကမန္တေ သဥပါဟနော စင်္ကမတိ၊ နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမတိ၊ ဟေဋ္ဌာ ဝသန္တေ ဥပရိ ဝသတိ၊ သတ္ထုဒဿနဋ္ဌာနေ ဥဘော အံသေ ပါရုပတိ၊ ဆတ္တံ ဓာရေတိ၊ ဥပါဟနံ ဓာရေတိ၊ နှာယတိ၊ ဥစ္စာရံ ဝါ ပဿာဝံ ဝါ ကရောတိ၊ ပရိနိဗ္ဗုတေ ဝါ ပန စေတိယံ ဝန္ဒိတုံ န ဂစ္ဆတိ၊ စေတိယဿ ပညာယနဋ္ဌာနေ သတ္ထုဒဿနဋ္ဌာနေ ဝုတ္တံ သဗ္ဗံ ကရောတိ – အယံ သတ္ထရိ အဂါရဝေါ နာမ. ယော ပန ဓမ္မသဝနေ သင်္ဃုဋ္ဌေ သက္ကစ္စံ န ဂစ္ဆတိ၊ သက္ကစ္စံ ဓမ္မံ န သုဏာတိ၊ သမုလ္လပန္တော နိသီဒတိ၊ န သက္ကစ္စံ ဂဏှာတိ၊ န သက္ကစ္စံ ဝါစေတိ – ‘အယံ ဓမ္မေ အဂါရဝေါ နာမ. ယော ပန ထေရေန ဘိက္ခုနာ အနဇ္ဈိဋ္ဌော ဓမ္မံ ဒေသေတိ၊ ပဉှံ ကထေတိ၊ ဝုဍ္ဎေ ဘိက္ခူ ဃဋ္ဋေန္တော ဂစ္ဆတိ၊ တိဋ္ဌတိ၊ နိသီဒတိ၊ ဒုဿပလ္လတ္ထိကံ ဝါ ဟတ္ထပလ္လတ္ထိကံ ဝါ ကရောတိ၊ သံဃမဇ္ဈေ ဥဘော အံသေ ပါရုပတိ၊ ဆတ္တုပါဟနံ ဓာရေတိ – အယံ သံဃေ အဂါရဝေါ နာမ. ဧကဘိက္ခုသ္မိမ္ပိ ဟိ အဂါရဝေ ကတေ သံဃေ အဂါရဝေါ ကတောဝ ဟောတိ. တိဿော သိက္ခာ ပန အပူရယမာနောဝ သိက္ခာယ အဂါရဝေါ နာမ. အပ္ပမာဒလက္ခဏံ အနနုဗြူဟယမာနော အပ္ပမာဒေ အဂါရဝေါ နာမ. ဒုဝိဓံ ပဋိသန္ထာရံ အကရောန္တော ပဋိသန္ထာရေ အဂါရဝေါ နာမ.

ပရိဟာနိယာ ဓမ္မာတိ ပရိဟာနကရာ ဓမ္မာ. ကမ္မာရာမတာတိ နဝကမ္မေ ဝါ စီဝရဝိစာရဏာဒီသု ဝါ ကမ္မေသု အဘိရတိ ယုတ္တပယုတ္တတာ. ဘဿာရာမတာတိ တိရစ္ဆာနကထာဝသေန ဘဿေ ယုတ္တပယုတ္တတာ. နိဒ္ဒါရာမတာတိ နိဒ္ဒါယ ယုတ္တပယုတ္တတာ. သင်္ဂဏိကာရာမတာတိ သင်္ဂဏိကာယ ယုတ္တပယုတ္တတာ. သံသဂ္ဂါရာမတာတိ သဝနသံသဂ္ဂေ၊ ဒဿနသံသဂ္ဂေ၊ သမုလ္လာပသံသဂ္ဂေ၊ ပရိဘောဂသံသဂ္ဂေ၊ ကာယသံသဂ္ဂေတိ ပဉ္စဝိဓေ သံသဂ္ဂေ ယုတ္တပယုတ္တတာ. ပပဉ္စာရာမတာတိ တဏှာမာနဒိဋ္ဌိပပဉ္စေသု ယုတ္တပယုတ္တတာ.

၉၄၆. သောမနဿုပဝိစာရာဒီသု သောမနဿေန သဒ္ဓိံ ဥပဝိစရန္တီတိ သောမနဿုပဝိစာရာ. စက္ခုနာ ရူပံ ဒိသွာတိ စက္ခုဝိညာဏေန ရူပံ ပဿိတွာ. သောမနဿဋ္ဌာနိယန္တိ သောမနဿဿ အာရမ္မဏဝသေန ကာရဏဘူတံ. ဥပဝိစရတီတိ တတ္ထ ဝိစာရပ္ပဝတ္တနေန ဥပဝိစရတိ. ဝိတက္ကော ပန တံသမ္ပယုတ္တော ဝါတိ ဣမိနာ နယေန တီသုပိ ဆက္ကေသု အတ္ထော ဝေဒိတဗ္ဗော.

၉၄၇. ဂေဟသိတာနီတိ ကာမဂုဏနိဿိတာနိ. သောမနဿာနီတိ စေတသိကသုခါနိ. ဒေါမနဿာနီတိ စေတသိကဒုက္ခာနိ. ဥပေက္ခာတိ အညာဏသမ္ပယုတ္တာ ဥပေက္ခာ ဝေဒနာ၊ အညာဏုပေက္ခာတိပိ ဧတာသံယေဝ နာမံ.

၉၄၈. အတ္ထိ မေ အတ္တာတိ ဝါတိ သဗ္ဗပဒေသု ဝါ-သဒ္ဒေါ ဝိကပ္ပတ္ထော၊ ဧဝံ ဝါ ဒိဋ္ဌိ ဥပ္ပဇ္ဇတီတိ ဝုတ္တံ ဟောတိ. အတ္ထိ မေ အတ္တာတိ စေတ္ထ သဿတဒိဋ္ဌိ သဗ္ဗကာလေသု အတ္တနော အတ္ထိတံ ဂဏှာတိ. သစ္စတော ထေတတောတိ ဘူတတော စ ထိရတော စ၊ ဣဒံ သစ္စန္တိ သုဋ္ဌု ဒဠှဘာဝေနာတိ ဝုတ္တံ ဟောတိ. နတ္ထိ မေ အတ္တာတိ အယံ ပန ဥစ္ဆေဒဒိဋ္ဌိ၊ သတော သတ္တဿ တတ္ထ တတ္ထ ဝိဘဝဂ္ဂဟဏတော. အထ ဝါ ပုရိမာပိ တီသု ကာလေသု အတ္ထီတိ ဂဟဏတော သဿတဒိဋ္ဌိ၊ ပစ္စုပ္ပန္နမေဝ အတ္ထီတိ ဂဏှန္တီ ဥစ္ဆေဒဒိဋ္ဌိ. ပစ္ဆိမာပိ အတီတာနာဂတေသု နတ္ထီတိ ဂဟဏတော ‘ဘသ္မန္တာ အာဟုတိယော’တိ ဂဟိတဒိဋ္ဌိကာနံ ဝိယ ဥစ္ဆေဒဒိဋ္ဌိ၊ အတီတေယေဝ နတ္ထီတိ ဂဏှန္တီ အဓိစ္စသမုပ္ပန္နိကဿေဝ သဿတဒိဋ္ဌိ. အတ္တနာ ဝါ အတ္တာနံ သဉ္ဇာနာမီတိ သညာက္ခန္ဓသီသေန ခန္ဓေ အတ္တာတိ ဂဟေတွာ သညာယ အဝသေသက္ခန္ဓေ သဉ္ဇာနနတော ‘ဣမိနာ အတ္တနာ ဣမံ အတ္တာနံ သဉ္ဇာနာမီ’တိ ဧဝံ ဟောတိ. အတ္တနာ ဝါ အနတ္တာနန္တိ သညာက္ခန္ဓံယေဝ အတ္တာတိ ဂဟေတွာ ဣတရေ စတ္တာရော ခန္ဓေ အနတ္တာတိ ဂဟေတွာ သညာယ တေသံ ဇာနနတော ဧဝံ ဟောတိ. အနတ္တနာ ဝါ အတ္တာနန္တိ သညာက္ခန္ဓံ အနတ္တာတိ ဣတရေ စ စတ္တာရော ခန္ဓေ အတ္တာတိ ဂဟေတွာ သညာယ တေသံ ဇာနနတော ဧဝံ ဟောတိ. သဗ္ဗာပိ သဿတုစ္ဆေဒဒိဋ္ဌိယောဝ.

ဝဒေါ ဝေဒေယျောတိ အာဒယော ပန သဿတဒိဋ္ဌိယာ ဧဝ အဘိနိဝေသာကာရာ. တတ္ထ ဝဒတီတိ ဝဒေါ၊ ဝစီကမ္မဿ ကာရကောတိ ဝုတ္တံ ဟောတိ. ဝေဒယတီတိ ဝေဒေယျော၊ ဇာနာတိ အနုဘဝတိ စာတိ ဝုတ္တံ ဟောတိ. ဣဒါနိ ယံ သော ဝေဒေတိ တံ ဒဿေတုံ တတြ တတြ ဒီဃရတ္တံ ကလျာဏပါပကာနန္တိအာဒိ ဝုတ္တံ. တတ္ထ တတြ တတြာတိ တေသု တေသု ယောနိဂတိဌိတိနိဝါသနိကာယေသု အာရမ္မဏေသု ဝါ. ဒီဃရတ္တန္တိ စိရရတ္တံ. ပစ္စနုဘောတီတိ ပဋိသံဝေဒယတိ. န သော ဇာတော နာဟောသီတိ သော အတ္တာ အဇာတိဓမ္မတော န ဇာတော နာမ၊ သဒါ ဝိဇ္ဇမာနော ယေဝါတိ အတ္ထော. တေနေဝ အတီတေ နာဟောသိ၊ အနာဂတေပိ န ဘဝိဿတိ. ယော ဟိ ဇာတော သော အဟောသိ၊ ယော စ ဇာယိဿတိ သော ဘဝိဿတီတိ. အထဝါ ‘န သော ဇာတော နာဟောသီ’တိ သော သဒါ ဝိဇ္ဇမာနတ္တာ အတီတေပိ န ဇာတု နာဟောသိ၊ အနာဂတေပိ န ဇာတု န ဘဝိဿတိ. နိစ္စောတိ ဥပ္ပါဒဝယရဟိတော. ဓုဝေါတိ ထိရော သာရဘူတော. သဿတောတိ သဗ္ဗကာလိကော. အဝိပရိဏာမဓမ္မောတိ အတ္တနော ပကတိဘာဝံ အဝိဇဟနဓမ္မော ကကဏ္ဋကော ဝိယ နာနပ္ပကာရတ္တံ နာပဇ္ဇတိ. ဧဝမယံ သဗ္ဗာသဝဒိဋ္ဌိ (မ. နိ. ၁.၁၇ အာဒယော) နာမ ကထိတာ. သေသံ သဗ္ဗတ္ထ ဥတ္တာနတ္ထမေဝါတိ.

ဆက္ကနိဒ္ဒေသဝဏ္ဏနာ.