၁. ခန္ဓပဒဝဏ္ဏနာ

၆. ဣဒါနိ ပဉ္စက္ခန္ဓာဒိဝသေန နိက္ခိတ္တမာတိကံ ‘သင်္ဂဟော အသင်္ဂဟော’တိအာဒီဟိ နယမာတိကာပဒေဟိ သဒ္ဓိံ ယောဇေတွာ ဒဿေတုံ ရူပက္ခန္ဓော ကတိဟိ ခန္ဓေဟီတိအာဒိနာ နယေန နိဒ္ဒေသဝါရော အာရဒ္ဓေါ. တတ္ထ ယသ္မာ ‘‘သင်္ဂဟော အသင်္ဂဟောတိအာဒိကာယ နယမာတိကာယ ‘‘တီဟိ သင်္ဂဟော၊ တီဟိ အသင်္ဂဟော’’တိ နယမုခမာတိကာ ဌပိတာ၊ တသ္မာ ရူပက္ခန္ဓာဒီနံ သင်္ဂဟံ ဒဿေတုံ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟီတိ တီဏိ ခန္ဓာယတနဓာတုပဒါနေဝ ဥဒ္ဓဋာနိ. ‘စတ္တာရိ သစ္စာနီ’တိအာဒီသု ဧကမ္ပိ န ပရာမဋ္ဌံ. ယသ္မာ စ ‘‘သဘာဂေါ ဝိသဘာဂေါ’’တိ ဧဝံ လက္ခဏမာတိကာ ဌပိတာ၊ တသ္မာ ဣမဿ ပဉှဿ ဝိဿဇ္ဇနေ ရူပက္ခန္ဓော ဧကေန ခန္ဓေနာတိအာဒိ ဝုတ္တံ. သဘာဂါ ဟိ တဿ ဧတေ ခန္ဓာဒယောတိ. တတ္ထ ဧကေန ခန္ဓေနာတိ ရူပက္ခန္ဓေနေဝ. ယဉှိ ကိဉ္စိ ရူပံ ရူပက္ခန္ဓသဘာဂတ္တာ ရူပက္ခန္ဓောတွေဝ သင်္ဂဟံ ဂစ္ဆတီတိ ရူပက္ခန္ဓေနေဝ ဂဏိတံ၊ တံ ရူပက္ခန္ဓေနေဝ ပရိစ္ဆိန္နံ. ဧကာဒသဟာယတနေဟီတိ မနာယတနဝဇ္ဇေဟိ. သဗ္ဗောပိ ဟိ ရူပက္ခန္ဓော ဒသာယတနာနိ ဓမ္မာယတနေကဒေသော စ ဟောတိ၊ တသ္မာ ဧကာဒသဟာယတနေဟိ ဂဏိတော၊ ပရိစ္ဆိန္နော. ဧကာဒသဟိ ဓာတူဟီတိ သတ္တဝိညာဏဓာတုဝဇ္ဇာဟိ ဧကာဒသဟိ ဧတာသု ဟိ အပရိယာပန္နံ ရူပံ နာမ နတ္ထိ.

အသင်္ဂဟနယနိဒ္ဒေသေ ကတိဟိ အသင်္ဂဟိတောတိ သင်္ခေပေနေဝ ပုစ္ဆာ ကတာ. ဝိဿဇ္ဇနေ ပနဿ ယသ္မာ ရူပက္ခန္ဓဿ ဝိသဘာဂါ စတ္တာရော အရူပက္ခန္ဓာ၊ ဧကံ မနာယတနံ၊ သတ္တ ဝိညာဏဓာတုယော၊ တသ္မာ စတူဟိ ခန္ဓေဟီတိအာဒိ ဝုတ္တံ. ဣမိနာ နယေန သဗ္ဗပဒေသု သင်္ဂဟာသင်္ဂဟော ဝေဒိတဗ္ဗော. ဣမသ္မိံ ပန ခန္ဓနိဒ္ဒေသေ – ‘‘ရူပက္ခန္ဓော ကတိဟိ ခန္ဓေဟီ’’တိအာဒိမှိ တာဝ ဧကမူလကေ သင်္ဂဟနယေ သရူပေနေဝ ဒဿိတာ ပဉ္စ ပုစ္ဆာ၊ ပဉ္စ ဝိဿဇ္ဇနာနိ. အသင်္ဂဟနယေ သင်္ခေပေန ဒဿိတာ ပဉ္စ ပုစ္ဆာ၊ ပဉ္စ ဝိဿဇ္ဇနာနိ. ဣမိနာ ဥပါယေန ဒုကမူလကာဒီသုပိ ပုစ္ဆာဝိဿဇ္ဇနာနိ ဝေဒိတဗ္ဗာနိ. ရူပက္ခန္ဓမူလကာယေဝ စေတ္ထ ဒုကတိကစတုက္ကာ ဒဿိတာ. ပဉ္စကေ ပန ‘‘ရူပက္ခန္ဓော စ။ပေ။ ဝိညာဏက္ခန္ဓော စာ’’တိ ဧဝံ ဘေဒတော စ၊ ‘‘ပဉ္စက္ခန္ဓာ ကတိဟိ ခန္ဓေဟီ’’တိ ဧဝံ အဘေဒတော စာတိ ဒွိဓာ ပုစ္ဆာဝိဿဇ္ဇနာနိ ကတာနိ. ဧဝံ ပါဠိနယော ဝေဒိတဗ္ဗောတိ.