၁. နယမာတိကာဝဏ္ဏနာ

၁. သင်္ဂဟော အသင်္ဂဟောတိအာဒီနဉှိ ဝသေန ဣဒံ ပကရဏံ စုဒ္ဒသဝိဓေန ဝိဘတ္တန္တိ ဝုတ္တံ. တံ သဗ္ဗမ္ပိ ဥဒ္ဒေသနိဒ္ဒေသတော ဒွိဓာ ဌိတံ. တတ္ထ မာတိကာ ဥဒ္ဒေသော. သာ ပဉ္စဝိဓာ – နယမာတိကာ၊ အဗ္ဘန္တရမာတိကာ၊ နယမုခမာတိကာ၊ လက္ခဏမာတိကာ၊ ဗာဟိရမာတိကာတိ. တတ္ထ သင်္ဂဟော အသင်္ဂဟော။ပေ။ ဝိပ္ပယုတ္တေန သင်္ဂဟိတံ အသင်္ဂဟိတန္တိ – အယံ စုဒ္ဒသဟိ ပဒေဟိ နိက္ခိတ္တာ နယမာတိကာ နာမ. အယဉှိ ဣမိနာ သင်္ဂဟာဒိကေန နယေန ဓာတုကထာ ဓမ္မာ ဝိဘတ္တာတိ ဒဿေတုံ ဌပိတတ္တာ နယမာတိကာတိ ဝုစ္စတိ. ဧတေသံ ပဒါနံ မူလဘူတတ္တာ မူလမာတိကာတိပိ ဝတ္တုံ ဝဋ္ဋတိ.