၉. သတ္ထုသာသနသုတ္တဝဏ္ဏနာ

၈၃. နဝမေ ဧကောတိ အဒုတိယော. ဝူပကဋ္ဌောတိ ကာယေန ဂဏတော၊ စိတ္တေန ကိလေသေဟိ ဝူပကဋ္ဌော ဝိဝေကဋ္ဌော ဒူရီဘူတော. အပ္ပမတ္တောတိ သတိအဝိပ္ပဝါသေ ဌိတော. ပဟိတတ္တောတိ ပေသိတတ္တော. နိဗ္ဗိဒါယာတိ ဝဋ္ဋေ ဥက္ကဏ္ဌနတ္ထာယ. ဝိရာဂါယာတိ ရာဂါဒီနံ ဝိရဇ္ဇနတ္ထာယ. နိရောဓာယာတိ အပ္ပဝတ္တိကရဏတ္ထာယ. ဝူပသမာယာတိ ကိလေသဝူပသမာယ အပ္ပဝတ္တိယာ. အဘိညာယာတိ တိလက္ခဏံ အာရောပေတွာ အဘိဇာနနတ္ထာယ. သမ္ဗောဓာယာတိ မဂ္ဂသင်္ခါတဿ သမ္ဗောဓဿ အတ္ထာယ. နိဗ္ဗာနာယာတိ နိဗ္ဗာနဿ သစ္ဆိကရဏတ္ထာယ.