၈. အဂ္ဂိက္ခန္ဓောပမသုတ္တဝဏ္ဏနာ

၇၂. အဋ္ဌမံ အတ္ထုပ္ပတ္တိယံ ကထိတံ. အတ္ထုပ္ပတ္တိ ပနဿ ဟေဋ္ဌာ စူဠစ္ဆရာသင်္ဃာတသုတ္တဝဏ္ဏနာယ (အ. နိ. အဋ္ဌ. ၁.၁.၅၁ အာဒယော) ဝိတ္ထာရိတာ ဧဝ. ပဿထ နောတိ ပဿထ နု. အာလိင်္ဂိတွာတိ ဥပဂူဟိတွာ. ဥပနိသီဒေယျာတိ သမီပေ နိဿာယ နိသီဒေယျ. ဥပနိပဇ္ဇေယျာတိ ဥပဂန္တွာ နိပဇ္ဇေယျ. အာရောစယာမီတိ အာစိက္ခာမိ. ပဋိဝေဒယာမီတိ ပဋိဝေဒေတွာ ဇာနာပေတွာ ကထေမိ. ဝါလရဇ္ဇုယာတိ အဿဝါလဂေါဝါလေဟိ ဝဋ္ဋိတရဇ္ဇုယာ. ပစ္စောရသ္မိန္တိ ဥရမဇ္ဈေ. ဖေဏုဒ္ဒေဟကန္တိ ဖေဏံ ဥဒ္ဒေဟိတွာ၊ ဥဿာဒေတွာတိ အတ္ထော. အတ္တတ္ထန္တိ အတ္တနော ဒိဋ္ဌဓမ္မိကသမ္ပရာယိကလောကိယလောကုတ္တရံ အတ္ထံ. ပရတ္ထောဘယတ္ထေသုပိ ဧသေဝ နယော. သေသမေတ္ထ ယံ ဝတ္တဗ္ဗံ သိယာ၊ တံ သဗ္ဗံ စူဠစ္ဆရာသင်္ဃာတသုတ္တဿ (အ. နိ. ၁.၅၁ အာဒယော) အတ္ထုပ္ပတ္တိယံ ကထိတမေဝ. ဣဒဉ္စ ပန သုတ္တံ ကထေတွာ သတ္ထာ စူဠစ္ဆရာသင်္ဃာတသုတ္တံ ကထေသိ. နဝမံ ဥတ္တာနတ္ထမေဝ.