၄. ဓမ္မညူသုတ္တဝဏ္ဏနာ

၆၈. စတုတ္ထေ ကာလံ ဇာနာတီတိ ယုတ္တပ္ပတ္တကာလံ ဇာနာတိ. အယံ ကာလော ဥဒ္ဒေသဿာတိ အယံ ဗုဒ္ဓဝစနံ ဥဂ္ဂဏှနကာလော. ပရိပုစ္ဆာယာတိ အတ္ထာနတ္ထံ ကာရဏာကာရဏံ ပရိပုစ္ဆာယ. ယောဂဿာတိ ယောဂေ ကမ္မံ ပက္ခိပနဿ. ပဋိသလ္လာနဿာတိ နိလီယနဿ ဧကီဘာဝဿ. ဓမ္မာနုဓမ္မပ္ပဋိပန္နောတိ နဝန္နံ လောကုတ္တရဓမ္မာနံ အနုရူပဓမ္မံ ပုဗ္ဗဘာဂပဋိပဒံ ပဋိပန္နော. ဧဝံ ခေါ၊ ဘိက္ခဝေ၊ ဘိက္ခု ပုဂ္ဂလပရောပရညူ ဟောတီတိ ဧဝံ ဘိက္ခု ပုဂ္ဂလာနံ ပရောပရံ တိက္ခမုဒုဘာဝံ ဇာနနသမတ္ထော နာမ ဟောတိ.