၁. အဗျာကတသုတ္တဝဏ္ဏနာ

၅၄. ဆဋ္ဌဝဂ္ဂဿ ပဌမေ အဗျာကတဝတ္ထူသူတိ ဧကံသာဒိဝသေန အကထိတဝတ္ထူသု. တထာဂတောတိ သတ္တော. ဒိဋ္ဌိဂတမေတန္တိ မိစ္ဆာဒိဋ္ဌိမတ္တကမေတံ၊ န တာယ ဒိဋ္ဌိယာ ဂဟိတသတ္တော နာမ အတ္ထိ. ပဋိပဒန္တိ အရိယမဂ္ဂံ. န ဆမ္ဘတီတိ ဒိဋ္ဌိဝသေန န ကမ္ပတိ. သေသပဒေသုပိ ဧသေဝ နယော. တဏှာဂတန္တိ ဒိဋ္ဌိတဏှာ. သညာဂတာဒီသုပိ ဧသေဝ နယော. ဒိဋ္ဌိသညာ ဧဝ ဟေတ္ထ သညာဂတံ၊ ဒိဋ္ဌိနိဿိတမာနောယေဝ ဒိဋ္ဌိမညိတမေဝ ဝါ မညိတံ၊ ဒိဋ္ဌိပပဉ္စောဝ ပပဉ္စိတံ၊ ဒိဋ္ဌုပါဒါနမေဝ ဥပါဒါနံ၊ ဒိဋ္ဌိယာ ဝိရူပံ ပဋိသရဏဘာဝေါယေဝ ဝိပ္ပဋိသာရော နာမာတိ ဝေဒိတဗ္ဗော. ဧတ္ထ စ ဒိဋ္ဌိဂ္ဂဟဏေန ဒွါသဋ္ဌိ ဒိဋ္ဌိယော၊ ဒိဋ္ဌိနိရောဓဂါမိနိပဋိပဒါဂဟဏေန သောတာပတ္တိမဂ္ဂေါ ဂဟိတောတိ.