၁. ကိမတ္ထိယသုတ္တဝဏ္ဏနာ

၁. ဒသကနိပါတဿ ပဌမေ ကုသလာနိ သီလာနီတိ အနဝဇ္ဇသီလာနိ. အမင်္ကုဘာဝဿ အဝိပ္ပဋိသာရဿ အတ္ထာယ သံဝတ္တန္တီတိ အဝိပ္ပဋိသာရတ္ထာနိ. သော နေသံ အာနိသံသောတိ အဝိပ္ပဋိသာရာနိသံသာနိ. ယထာဘူတဉာဏဒဿနတ္ထောတိအာဒီသု ယထာဘူတဉာဏဒဿနံ နာမ တရုဏဝိပဿနာ၊ နိဗ္ဗိဒါ နာမ ဗလဝဝိပဿနာ၊ ဝိရာဂေါ နာမ မဂ္ဂေါ၊ ဝိမုတ္တိ နာမ အရဟတ္တဖလံ၊ ဉာဏဒဿနံ နာမ ပစ္စဝေက္ခဏဉာဏံ. အဂ္ဂါယ ပရေန္တီတိ အရဟတ္တတ္ထာယ ဂစ္ဆန္တိ.