၃. သုဒ္ဓိန္ဒြိယဝါရော

(က) အနုလောမံ

၁၄၀. (က) စက္ခု ဣန္ဒြိယန္တိ? အာမန္တာ.

(ခ) ဣန္ဒြိယာ စက္ခုန္ဒြိယန္တိ?

စက္ခုန္ဒြိယံ ဣန္ဒြိယဉ္စေဝ စက္ခုန္ဒြိယဉ္စ. အဝသေသာ ဣန္ဒြိယာ န စက္ခုန္ဒြိယံ.

(က) သောတံ ဣန္ဒြိယန္တိ?

ယံ သောတံ ဣန္ဒြိယံ တံ သောတဉ္စေဝ ဣန္ဒြိယဉ္စ. အဝသေသံ သောတံ န ဣန္ဒြိယံ.

(ခ) ဣန္ဒြိယာ သောတိန္ဒြိယန္တိ? သောတိန္ဒြိယံ ဣန္ဒြိယဉ္စေဝ သောတိန္ဒြိယဉ္စ. အဝသေသာ ဣန္ဒြိယာ န သောတိန္ဒြိယံ.

(က) ဃာနံ ဣန္ဒြိယန္တိ? အာမန္တာ.

(ခ) ဣန္ဒြိယာ ဃာနိန္ဒြိယန္တိ?

ဃာနိန္ဒြိယံ ဣန္ဒြိယဉ္စေဝ ဃာနိန္ဒြိယဉ္စ. အဝသေသာ ဣန္ဒြိယာ န ဃာနိန္ဒြိယံ.

(က) ဇိဝှါ ဣန္ဒြိယန္တိ? အာမန္တာ.

(ခ) ဣန္ဒြိယာ ဇိဝှိန္ဒြိယန္တိ?

ဇိဝှိန္ဒြိယံ ဣန္ဒြိယဉ္စေဝ ဇိဝှိန္ဒြိယဉ္စ. အဝသေသာ ဣန္ဒြိယာ န ဇိဝှိန္ဒြိယံ.

(က) ကာယော ဣန္ဒြိယန္တိ?

ယော ကာယော ဣန္ဒြိယံ သော ကာယော စေဝ ဣန္ဒြိယဉ္စ. အဝသေသော ကာယော န ဣန္ဒြိယာ.

(ခ) ဣန္ဒြိယာ ကာယိန္ဒြိယန္တိ?

ကာယိန္ဒြိယံ ဣန္ဒြိယဉ္စေဝ ကာယိန္ဒြိယဉ္စ. အဝသေသာ ဣန္ဒြိယာ န ကာယိန္ဒြိယံ.

(က) မနော ဣန္ဒြိယန္တိ? အာမန္တာ.

(ခ) ဣန္ဒြိယာ မနိန္ဒြိယန္တိ?

မနိန္ဒြိယံ ဣန္ဒြိယဉ္စေဝ မနိန္ဒြိယဉ္စ. အဝသေသာ ဣန္ဒြိယာ န မနိန္ဒြိယံ.

(က) ဣတ္ထီ ဣန္ဒြိယန္တိ? နော.

(ခ) ဣန္ဒြိယာ ဣတ္ထိန္ဒြိယန္တိ?

ဣတ္ထိန္ဒြိယံ ဣန္ဒြိယဉ္စေဝ ဣတ္ထိန္ဒြိယဉ္စ. အဝသေသာ ဣန္ဒြိယာ န ဣတ္ထိန္ဒြိယံ.

(က) ပုရိသော ဣန္ဒြိယန္တိ? နော.

(ခ) ဣန္ဒြိယာ ပုရိသိန္ဒြိယန္တိ?

ပုရိသိန္ဒြိယံ ဣန္ဒြိယဉ္စေဝ ပုရိသိန္ဒြိယဉ္စ. အဝသေသာ ဣန္ဒြိယာ န ပုရိသိန္ဒြိယံ.

(က) ဇီဝိတံ ဣန္ဒြိယန္တိ? အာမန္တာ.

(ခ) ဣန္ဒြိယာ ဇီဝိတိန္ဒြိယန္တိ?

ဇီဝိတိန္ဒြိယံ ဣန္ဒြိယဉ္စေဝ ဇီဝိတိန္ဒြိယဉ္စ. အဝသေသာ ဣန္ဒြိယာ န ဇီဝိတိန္ဒြိယံ.

(က) သုခံ ဣန္ဒြိယန္တိ? အာမန္တာ.

(ခ) ဣန္ဒြိယာ သုခိန္ဒြိယန္တိ?

သုခိန္ဒြိယံ ဣန္ဒြိယဉ္စေဝ သုခိန္ဒြိယဉ္စ. အဝသေသာ ဣန္ဒြိယာ န သုခိန္ဒြိယံ.

(က) ဒုက္ခံ ဣန္ဒြိယန္တိ? အာမန္တာ.

(ခ) ဣန္ဒြိယာ ဒုက္ခိန္ဒြိယန္တိ?

ဒုက္ခိန္ဒြိယံ ဣန္ဒြိယဉ္စေဝ ဒုက္ခိန္ဒြိယဉ္စ. အဝသေသာ ဣန္ဒြိယာ န ဒုက္ခိန္ဒြိယံ.

(က) သောမနဿံ ဣန္ဒြိယန္တိ? အာမန္တာ.

(ခ) ဣန္ဒြိယာ သောမနဿိန္ဒြိယန္တိ?

သောမနဿိန္ဒြိယံ ဣန္ဒြိယဉ္စေဝ သောမနဿိန္ဒြိယဉ္စ. အဝသေသာ ဣန္ဒြိယာ န သောမနဿိန္ဒြိယံ.

(က) ဒေါမနဿံ ဣန္ဒြိယန္တိ? အာမန္တာ.

(က) ဣန္ဒြိယာ ဒေါမနဿိန္ဒြိယန္တိ?

ဒေါမနဿိန္ဒြိယံ ဣန္ဒြိယဉ္စေဝ ဒေါမနဿိန္ဒြိယဉ္စ. အဝသေသာ ဣန္ဒြိယာ န ဒေါမနဿိန္ဒြိယံ.

(က) ဥပေက္ခာ ဣန္ဒြိယန္တိ?

ယာ ဥပေက္ခာ ဣန္ဒြိယံ သာ ဥပေက္ခာ စေဝ ဣန္ဒြိယဉ္စ. အဝသေသာ ဥပေက္ခာ န ဣန္ဒြိယံ.

(ခ) ဣန္ဒြိယာ ဥပေက္ခိန္ဒြိယန္တိ?

ဥပေက္ခိန္ဒြိယံ ဣန္ဒြိယဉ္စေဝ ဥပေက္ခိန္ဒြိယဉ္စ. အဝသေသာ ဣန္ဒြိယာ န ဥပေက္ခိန္ဒြိယံ.

(က) သဒ္ဓါ ဣန္ဒြိယန္တိ? အာမန္တာ.

(ခ) ဣန္ဒြိယာ သဒ္ဓိန္ဒြိယန္တိ?

သဒ္ဓိန္ဒြိယံ ဣန္ဒြိယဉ္စေဝ သဒ္ဓိန္ဒြိယဉ္စ. အဝသေသာ ဣန္ဒြိယာ န သဒ္ဓိန္ဒြိယံ.

(က) ဝီရိယံ ဣန္ဒြိယန္တိ? အာမန္တာ.

(ခ) ဣန္ဒြိယာ ဝီရိယိန္ဒြိယန္တိ?

ဝီရိယိန္ဒြိယံ ဣန္ဒြိယဉ္စေဝ ဝီရိယိန္ဒြိယဉ္စ. အဝသေသာ ဣန္ဒြိယာ န ဝီရိယိန္ဒြိယံ.

(က) သတိ ဣန္ဒြိယန္တိ? အာမန္တာ.

(ခ) ဣန္ဒြိယာ သတိန္ဒြိယန္တိ?

သတိန္ဒြိယံ ဣန္ဒြိယဉ္စေဝ သတိန္ဒြိယဉ္စ. အဝသေသာ ဣန္ဒြိယာ န သတိန္ဒြိယံ.

(က) သမာဓိ ဣန္ဒြိယန္တိ? အာမန္တာ.

(ခ) ဣန္ဒြိယာ သမာဓိန္ဒြိယန္တိ?

သမာဓိန္ဒြိယံ ဣန္ဒြိယဉ္စေဝ သမာဓိန္ဒြိယဉ္စ. အဝသေသာ ဣန္ဒြိယာ န သမာဓိန္ဒြိယံ.

(က) ပညာ ဣန္ဒြိယန္တိ? အာမန္တာ.

(ခ) ဣန္ဒြိယာ ပညိန္ဒြိယန္တိ?

ပညိန္ဒြိယံ ဣန္ဒြိယဉ္စေဝ ပညိန္ဒြိယဉ္စ. အဝသေသာ ဣန္ဒြိယာ န ပညိန္ဒြိယံ.

(က) အနညာတညဿာမီတိ ဣန္ဒြိယန္တိ? အာမန္တာ.

(ခ) ဣန္ဒြိယာ အနညာတညဿာမီတိန္ဒြိယန္တိ?

အနညာတညဿာမီတိန္ဒြိယံ ဣန္ဒြိယဉ္စေဝ အနညာတညဿာမီတိန္ဒြိယဉ္စ. အဝသေသာ ဣန္ဒြိယာ န အနညာတညဿာမီတိန္ဒြိယံ.

(က) အညံ ဣန္ဒြိယန္တိ? အာမန္တာ.

(ခ) ဣန္ဒြိယာ အညိန္ဒြိယန္တိ?

အညိန္ဒြိယံ ဣန္ဒြိယဉ္စေဝ အညိန္ဒြိယဉ္စ. အဝသေသာ ဣန္ဒြိယာ န အညိန္ဒြိယံ.

(က) အညာတာဝီ ဣန္ဒြိယန္တိ? အာမန္တာ.

(ခ) ဣန္ဒြိယာ အညာတာဝိန္ဒြိယန္တိ?

အညာတာဝိန္ဒြိယံ ဣန္ဒြိယဉ္စေဝ အညာတာဝိန္ဒြိယဉ္စ. အဝသေသာ ဣန္ဒြိယာ န အညာတာဝိန္ဒြိယံ.

(ခ) ပစ္စနီကံ

၁၄၁. (က) န စက္ခု န ဣန္ဒြိယန္တိ?

စက္ခုံ ဌပေတွာ အဝသေသာ ဣန္ဒြိယာ န စက္ခု၊ ဣန္ဒြိယာ. စက္ခုဉ္စ ဣန္ဒြိယေ စ ဌပေတွာ အဝသေသာ န စေဝ စက္ခု န စ ဣန္ဒြိယာ.

(ခ) န ဣန္ဒြိယာ န စက္ခုန္ဒြိယန္တိ? အာမန္တာ.

(က) န သောတံ န ဣန္ဒြိယန္တိ?

သောတံ ဌပေတွာ အဝသေသာ ဣန္ဒြိယာ န သောတံ၊ ဣန္ဒြိယာ. သောတဉ္စ ဣန္ဒြိယေ စ ဌပေတွာ အဝသေသာ န စေဝ သောတံ န စ ဣန္ဒြိယာ.

(ခ) န ဣန္ဒြိယာ န သောတိန္ဒြိယန္တိ? အာမန္တာ.

(က) န ဃာနံ န ဣန္ဒြိယန္တိ?

ဃာနံ ဌပေတွာ အဝသေသာ ဣန္ဒြိယာ န ဃာနံ၊ ဣန္ဒြိယာ. ဃာနဉ္စ ဣန္ဒြိယေ စ ဌပေတွာ အဝသေသာ န စေဝ ဃာနံ န စ ဣန္ဒြိယာ.

(ခ) န ဣန္ဒြိယာ န ဃာနိန္ဒြိယန္တိ? အာမန္တာ.

(က) န ဇိဝှါ န ဣန္ဒြိယန္တိ?

ဇိဝှံ ဌပေတွာ အဝသေသာ ဣန္ဒြိယာ န ဇိဝှါ၊ ဣန္ဒြိယာ. ဇိဝှဉ္စ ဣန္ဒြိယေ စ ဌပေတွာ အဝသေသာ န စေဝ ဇိဝှါ န စ ဣန္ဒြိယာ.

(ခ) န ဣန္ဒြိယာ န ဇိဝှိန္ဒြိယန္တိ? အာမန္တာ.

(က) န ကာယော န ဣန္ဒြိယန္တိ? အာမန္တာ.

(ခ) န ဣန္ဒြိယာ န ကာယိန္ဒြိယန္တိ? အာမန္တာ.

(က) န မနော န ဣန္ဒြိယန္တိ?

မနံ ဌပေတွာ အဝသေသာ ဣန္ဒြိယာ န မနော၊ ဣန္ဒြိယာ. မနဉ္စ ဣန္ဒြိယေ စ ဌပေတွာ အဝသေသာ န စေဝ မနော န စ ဣန္ဒြိယာ.

(ခ) န ဣန္ဒြိယာ န မနိန္ဒြိယန္တိ? အာမန္တာ.

(က) န ဣတ္ထီ န ဣန္ဒြိယန္တိ?

ဣတ္ထိံ ဌပေတွာ အဝသေသာ ဣန္ဒြိယာ န ဣတ္ထီ၊ ဣန္ဒြိယာ. ဣတ္ထိဉ္စ ဣန္ဒြိယေ စ ဌပေတွာ အဝသေသာ န စေဝ ဣတ္ထီ န စ ဣန္ဒြိယာ.

(ခ) န ဣန္ဒြိယာ န ဣတ္ထိန္ဒြိယန္တိ? အာမန္တာ.

(က) န ပုရိသော န ဣန္ဒြိယန္တိ?

ပုရိသံ ဌပေတွာ အဝသေသာ ဣန္ဒြိယာ န ပုရိသော၊ ဣန္ဒြိယာ. ပုရိသဉ္စ ဣန္ဒြိယေ စ ဌပေတွာ အဝသေသာ န စေဝ ပုရိသော န စ ဣန္ဒြိယာ.

(ခ) န ဣန္ဒြိယာ န ပုရိသိန္ဒြိယန္တိ? အာမန္တာ.

(က) န ဇီဝိတံ န ဣန္ဒြိယန္တိ?

ဇီဝိတံ ဌပေတွာ အဝသေသာ ဣန္ဒြိယာ န ဇီဝိတံ၊ ဣန္ဒြိယာ. ဇီဝိတဉ္စ ဣန္ဒြိယေ စ ဌပေတွာ အဝသေသာ န စေဝ ဇီဝိတံ န စ ဣန္ဒြိယာ.

(ခ) န ဣန္ဒြိယာ န ဇီဝိတိန္ဒြိယန္တိ? အာမန္တာ.

(က) န သုခံ န ဣန္ဒြိယန္တိ?

သုခံ ဌပေတွာ အဝသေသာ ဣန္ဒြိယာ န သုခံ၊ ဣန္ဒြိယာ. သုခဉ္စ ဣန္ဒြိယေ စ ဌပေတွာ အဝသေသာ န စေဝ သုခံ န စ ဣန္ဒြိယာ.

(ခ) န ဣန္ဒြိယာ န သုခိန္ဒြိယန္တိ? အာမန္တာ.

(က) န ဒုက္ခံ န ဣန္ဒြိယန္တိ?

ဒုက္ခံ ဌပေတွာ အဝသေသာ ဣန္ဒြိယာ န ဒုက္ခံ၊ ဣန္ဒြိယာ. ဒုက္ခဉ္စ ဣန္ဒြိယေ စ ဌပေတွာ အဝသေသာ န စေဝ ဒုက္ခံ န စ ဣန္ဒြိယာ.

(ခ) န ဣန္ဒြိယာ န ဒုက္ခိန္ဒြိယန္တိ? အာမန္တာ.

(က) န သောမနဿံ န ဣန္ဒြိယန္တိ?

သောမနဿံ ဌပေတွာ အဝသေသာ ဣန္ဒြိယာ န သောမနဿံ၊ ဣန္ဒြိယာ. သောမနဿဉ္စ ဣန္ဒြိယေ စ ဌပေတွာ အဝသေသာ န စေဝ သောမနဿံ န စ ဣန္ဒြိယာ.

(ခ) န ဣန္ဒြိယာ န သောမနဿိန္ဒြိယန္တိ? အာမန္တာ.

(က) န ဒေါမနဿံ န ဣန္ဒြိယန္တိ?

ဒေါမနဿံ ဌပေတွာ အဝသေသာ ဣန္ဒြိယာ န ဒေါမနဿံ၊ ဣန္ဒြိယာ. ဒေါမနဿဉ္စ ဣန္ဒြိယေ စ ဌပေတွာ အဝသေသာ န စေဝ ဒေါမနဿံ န စ ဣန္ဒြိယာ.

(ခ) န ဣန္ဒြိယာ န ဒေါမနဿိန္ဒြိယန္တိ? အာမန္တာ.

(က) န ဥပေက္ခာ န ဣန္ဒြိယန္တိ?

ဥပေက္ခံ ဌပေတွာ အဝသေသာ ဣန္ဒြိယာ န ဥပေက္ခာ၊ ဣန္ဒြိယာ. ဥပေက္ခဉ္စ ဣန္ဒြိယေ စ ဌပေတွာ အဝသေသာ န စေဝ ဥပေက္ခာ န စ ဣန္ဒြိယာ.

(ခ) န ဣန္ဒြိယာ န ဥပေက္ခိန္ဒြိယန္တိ? အာမန္တာ.

(က) န သဒ္ဓါ န ဣန္ဒြိယန္တိ?

သဒ္ဓံ ဌပေတွာ အဝသေသာ ဣန္ဒြိယာ န သဒ္ဓါ၊ ဣန္ဒြိယာ. သဒ္ဓဉ္စ ဣန္ဒြိယေ စ ဌပေတွာ အဝသေသာ န စေဝ သဒ္ဓါ န စ ဣန္ဒြိယာ.

(ခ) န ဣန္ဒြိယာ န သဒ္ဓိန္ဒြိယန္တိ? အာမန္တာ.

(က) န ဝီရိယံ န ဣန္ဒြိယန္တိ?

ဝီရိယံ ဌပေတွာ အဝသေသာ ဣန္ဒြိယာ န ဝီရိယံ၊ ဣန္ဒြိယာ. ဝီရိယဉ္စ ဣန္ဒြိယေ စ ဌပေတွာ အဝသေသာ န စေဝ ဝီရိယံ န စ ဣန္ဒြိယာ.

(ခ) န ဣန္ဒြိယာ န ဝီရိယိန္ဒြိယန္တိ? အာမန္တာ.

(က) န သတိ န ဣန္ဒြိယန္တိ?

သတိံ ဌပေတွာ အဝသေသာ ဣန္ဒြိယာ န သတိ၊ ဣန္ဒြိယာ. သတိဉ္စ ဣန္ဒြိယေ စ ဌပေတွာ အဝသေသာ န စေဝ သတိ န စ ဣန္ဒြိယာ.

(ခ) န ဣန္ဒြိယာ န သတိန္ဒြိယန္တိ? အာမန္တာ.

(က) န သမာဓိ န ဣန္ဒြိယန္တိ?

သမာဓိံ ဌပေတွာ အဝသေသာ ဣန္ဒြိယာ န သမာဓိ၊ ဣန္ဒြိယာ. သမာဓိဉ္စ ဣန္ဒြိယေ စ ဌပေတွာ အဝသေသာ န စေဝ သမာဓိ န စ ဣန္ဒြိယာ.

(ခ) န ဣန္ဒြိယာ န သမာဓိန္ဒြိယန္တိ? အာမန္တာ.

(က) န ပညာ န ဣန္ဒြိယန္တိ?

ပညံ ဌပေတွာ အဝသေသာ ဣန္ဒြိယာ န ပညာ၊ ဣန္ဒြိယာ. ပညဉ္စ ဣန္ဒြိယေ စ ဌပေတွာ အဝသေသာ န စေဝ ပညာ န စ ဣန္ဒြိယာ.

(ခ) န ဣန္ဒြိယာ န ပညိန္ဒြိယန္တိ? အာမန္တာ.

(က) န အနညာတညဿာမီတိ န ဣန္ဒြိယန္တိ?

အနညာတညဿာမီတိံ ဌပေတွာ အဝသေသာ ဣန္ဒြိယာ န အနညာတညဿာမီတိ၊ ဣန္ဒြိယာ. အနညာတညဿာမီတိဉ္စ ဣန္ဒြိယေ စ ဌပေတွာ အဝသေသာ န စေဝ အနညာတညဿာမီတိ န စ ဣန္ဒြိယာ.

(ခ) န ဣန္ဒြိယာ န အနညာတညဿာမီတိန္ဒြိယန္တိ? အာမန္တာ.

(က) န အညံ န ဣန္ဒြိယန္တိ?

အညံ ဌပေတွာ အဝသေသာ ဣန္ဒြိယာ န အညံ၊ ဣန္ဒြိယာ. အညဉ္စ ဣန္ဒြိယေ စ ဌပေတွာ အဝသေသာ န စေဝ အညံ န စ ဣန္ဒြိယာ.

(ခ) န ဣန္ဒြိယာ န အညိန္ဒြိယန္တိ? အာမန္တာ.

(က) န အညာတာဝီ န ဣန္ဒြိယန္တိ?

အညာတာဝိံ ဌပေတွာ အဝသေသာ ဣန္ဒြိယာ န အညာတာဝီ၊ ဣန္ဒြိယာ. အညာတာဝိဉ္စ ဣန္ဒြိယေ စ ဌပေတွာ အဝသေသာ န စေဝ အညာတာဝီ န စ ဣန္ဒြိယာ.

(ခ) န ဣန္ဒြိယာ န အညာတာဝိန္ဒြိယန္တိ? အာမန္တာ.