၃. သုဒ္ဓဓမ္မဝါရော

(က) အနုလောမံ

၂၅. (က) ကုသလာ ဓမ္မာတိ? အာမန္တာ.

(ခ) ဓမ္မာ ကုသလာ ဓမ္မာတိ?

ကုသလာ ဓမ္မာ ဓမ္မာ စေဝ ကုသလာ ဓမ္မာ စ. အဝသေသာ ဓမ္မာ န ကုသလာ ဓမ္မာ.

(က) အကုသလာ ဓမ္မာတိ? အာမန္တာ.

(ခ) ဓမ္မာ အကုသလာ ဓမ္မာတိ?

အကုသလာ ဓမ္မာ ဓမ္မာ စေဝ အကုသလာ ဓမ္မာ စ. အဝသေသာ ဓမ္မာ န အကုသလာ ဓမ္မာ.

(က) အဗျာကတာ ဓမ္မာတိ? အာမန္တာ.

(ခ) ဓမ္မာ အဗျာကတာ ဓမ္မာတိ?

အဗျာကတာ ဓမ္မာ ဓမ္မာ စေဝ အဗျာကတာ ဓမ္မာ စ. အဝသေသာ ဓမ္မာ န အဗျာကတာ ဓမ္မာ.

(ခ) ပစ္စနီကံ

၂၆. (က) န ကုသလာ န ဓမ္မာတိ?

ကုသလံ ဌပေတွာ အဝသေသာ ဓမ္မာ န ကုသလာ၊ ဓမ္မာ. ကုသလဉ္စ ဓမ္မေ စ ဌပေတွာ အဝသေသာ န စေဝ ကုသလာ န စ ဓမ္မာ.

(ခ) န ဓမ္မာ န ကုသလာ ဓမ္မာတိ? အာမန္တာ.

(က) န အကုသလာ န ဓမ္မာတိ?

အကုသလံ ဌပေတွာ အဝသေသာ ဓမ္မာ န အကုသလာ၊ ဓမ္မာ. အကုသလဉ္စ ဓမ္မေ စ ဌပေတွာ အဝသေသာ န စေဝ အကုသလာ န စ ဓမ္မာ.

(ခ) န ဓမ္မာ န အကုသလာ ဓမ္မာတိ? အာမန္တာ.

(က) န အဗျာကတာ န ဓမ္မာတိ?

အဗျာကတံ ဌပေတွာ အဝသေသာ ဓမ္မာ န အဗျာကတာ၊ ဓမ္မာ. အဗျာကတဉ္စ ဓမ္မေ စ ဌပေတွာ အဝသေသာ န စေဝ အဗျာကတာ န စ ဓမ္မာ.

(ခ) န ဓမ္မာ န အဗျာကတာ ဓမ္မာတိ? အာမန္တာ.