၃. သုဒ္ဓသစ္စဝါရော
(က) အနုလောမံ
၂၀. (က) ဒုက္ခံ သစ္စန္တိ? အာမန္တာ.
(ခ) သစ္စာ ဒုက္ခသစ္စန္တိ?
ဒုက္ခသစ္စံ သစ္စဉ္စေဝ ဒုက္ခသစ္စဉ္စ. အဝသေသာ သစ္စာ န ဒုက္ခသစ္စံ.
သမုဒယော သစ္စန္တိ? အာမန္တာ။ပေ။.
နိရောဓော သစ္စန္တိ? အာမန္တာ။ပေ။.
(က) မဂ္ဂေါ သစ္စန္တိ? အာမန္တာ.
(ခ) သစ္စာ မဂ္ဂသစ္စန္တိ?
မဂ္ဂသစ္စံ သစ္စဉ္စေဝ မဂ္ဂသစ္စဉ္စ. အဝသေသာ သစ္စာ န မဂ္ဂသစ္စံ.
(ခ) ပစ္စနီကံ
၂၁. (က) န ဒုက္ခံ န သစ္စန္တိ?
ဒုက္ခံ ဌပေတွာ အဝသေသာ သစ္စာ န ဒုက္ခံ၊ သစ္စာ. ဒုက္ခဉ္စ သစ္စဉ္စ ဌပေတွာ အဝသေသံ န စေဝ ဒုက္ခံ န စ သစ္စာ.
(ခ) န သစ္စာ န ဒုက္ခသစ္စန္တိ? အာမန္တာ.
န သမုဒယော န သစ္စန္တိ?
သမုဒယံ ဌပေတွာ။ပေ။ နိရောဓံ ဌပေတွာ။ပေ။.
(က) န မဂ္ဂေါ န သစ္စန္တိ?
မဂ္ဂံ ဌပေတွာ အဝသေသာ သစ္စာ န မဂ္ဂေါ၊ သစ္စာ. မဂ္ဂဉ္စ သစ္စဉ္စ ဌပေတွာ အဝသေသာ န စေဝ မဂ္ဂေါ န စ သစ္စာ.
(ခ) န သစ္စာ န မဂ္ဂသစ္စန္တိ? အာမန္တာ.