၁. ပဒသောဓနဝါရော

(က) အနုလောမံ

၁၀. (က) ဒုက္ခံ ဒုက္ခသစ္စန္တိ? အာမန္တာ.

(ခ) ဒုက္ခသစ္စံ ဒုက္ခန္တိ?

ကာယိကံ ဒုက္ခံ စေတသိကံ ဒုက္ခံ ဌပေတွာ အဝသေသံ ဒုက္ခသစ္စံ [အဝသေသံ ဒုက္ခသစ္စံ ဒုက္ခသစ္စံ (သျာ.) ဧဝမုပရိပိ]၊ န ဒုက္ခံ. ကာယိကံ ဒုက္ခံ စေတသိကံ ဒုက္ခံ ဒုက္ခဉ္စေဝ ဒုက္ခသစ္စဉ္စ.

(က) သမုဒယော သမုဒယသစ္စန္တိ?

သမုဒယသစ္စံ ဌပေတွာ အဝသေသော သမုဒယော၊ န သမုဒယသစ္စံ. သမုဒယသစ္စံ သမုဒယော စေဝ သမုဒယသစ္စဉ္စ.

(ခ) သမုဒယသစ္စံ သမုဒယောတိ? အာမန္တာ.

(က) နိရောဓော နိရောဓသစ္စန္တိ?

နိရောဓသစ္စံ ဌပေတွာ အဝသေသော နိရောဓော၊ န နိရောဓသစ္စံ. နိရောဓသစ္စံ နိရောဓော စေဝ နိရောဓသစ္စဉ္စ.

(ခ) နိရောဓသစ္စံ နိရောဓောတိ? အာမန္တာ.

(က) မဂ္ဂေါ မဂ္ဂသစ္စန္တိ?

မဂ္ဂသစ္စံ ဌပေတွာ အဝသေသော မဂ္ဂေါ၊ န မဂ္ဂသစ္စံ. မဂ္ဂသစ္စံ မဂ္ဂေါ စေဝ မဂ္ဂသစ္စဉ္စ.

(ခ) မဂ္ဂသစ္စံ မဂ္ဂေါတိ? အာမန္တာ.

(ခ) ပစ္စနီကံ

၁၁. (က) န ဒုက္ခံ န ဒုက္ခသစ္စန္တိ?

ကာယိကံ ဒုက္ခံ စေတသိကံ ဒုက္ခံ ဌပေတွာ အဝသေသံ န ဒုက္ခံ [အဝသေသံ ဒုက္ခသစ္စံ န ဒုက္ခံ (သီ. သျာ. က.) ဧဝံ အဝသေသေသု တီသု သစ္စေသု] ဒုက္ခသစ္စံ. ဒုက္ခဉ္စ ဒုက္ခသစ္စဉ္စ ဌပေတွာ အဝသေသံ န စေဝ ဒုက္ခံ န စ ဒုက္ခသစ္စံ.

(ခ) န ဒုက္ခသစ္စံ န ဒုက္ခန္တိ? အာမန္တာ.

(က) န သမုဒယော န သမုဒယသစ္စန္တိ? အာမန္တာ.

(ခ) န သမုဒယသစ္စံ န သမုဒယောတိ?

သမုဒယသစ္စံ ဌပေတွာ အဝသေသော န သမုဒယသစ္စံ၊ သမုဒယော. သမုဒယဉ္စ သမုဒယသစ္စဉ္စ ဌပေတွာ အဝသေသော န စေဝ သမုဒယော န စ သမုဒယသစ္စံ.

(က) န နိရောဓော န နိရောဓသစ္စန္တိ? အာမန္တာ.

(ခ) န နိရောဓသစ္စံ န နိရောဓောတိ?

နိရောဓသစ္စံ ဌပေတွာ အဝသေသော န နိရောဓသစ္စံ၊ နိရောဓော. နိရောဓဉ္စ နိရောဓသစ္စဉ္စ ဌပေတွာ အဝသေသော န စေဝ နိရောဓော န စ နိရောဓသစ္စံ.

(က) န မဂ္ဂေါ န မဂ္ဂသစ္စန္တိ? အာမန္တာ.

(ခ) န မဂ္ဂသစ္စံ န မဂ္ဂေါတိ?

မဂ္ဂသစ္စံ ဌပေတွာ အဝသေသော န မဂ္ဂသစ္စံ၊ မဂ္ဂေါ. မဂ္ဂဉ္စ မဂ္ဂသစ္စဉ္စ ဌပေတွာ အဝသေသော န စေဝ မဂ္ဂေါ န စ မဂ္ဂသစ္စံ.