(၅) ပစ္စုပ္ပန္နာနာဂတဝါရော

(က) အနုလောမပုဂ္ဂလော

၁၅၄. (က) ယဿ ဒုက္ခသစ္စံ ဥပ္ပဇ္ဇတိ တဿ သမုဒယသစ္စံ နိရုဇ္ဈိဿတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ ဒုက္ခသစ္စံ ဥပ္ပဇ္ဇတိ၊ နော စ တေသံ သမုဒယသစ္စံ နိရုဇ္ဈိဿတိ. ဣတရေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စဉ္စ ဥပ္ပဇ္ဇတိ သမုဒယသစ္စဉ္စ နိရုဇ္ဈိဿတိ.

(ခ) ယဿ ဝါ ပန သမုဒယသစ္စံ နိရုဇ္ဈိဿတိ တဿ ဒုက္ခသစ္စံ ဥပ္ပဇ္ဇတီတိ?

သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ သမုဒယသစ္စံ နိရုဇ္ဈိဿတိ၊ နော စ တေသံ ဒုက္ခသစ္စံ ဥပ္ပဇ္ဇတိ. သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ သမုဒယသစ္စဉ္စ နိရုဇ္ဈိဿတိ ဒုက္ခသစ္စဉ္စ ဥပ္ပဇ္ဇတိ.

(က) ယဿ ဒုက္ခသစ္စံ ဥပ္ပဇ္ဇတိ တဿ မဂ္ဂသစ္စံ နိရုဇ္ဈိဿတီတိ?

အရဟန္တာနံ စိတ္တဿ ဥပ္ပါဒက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စံ ဥပ္ပဇ္ဇတိ၊ နော စ တေသံ မဂ္ဂသစ္စံ နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စဉ္စ ဥပ္ပဇ္ဇတိ မဂ္ဂသစ္စဉ္စ နိရုဇ္ဈိဿတိ.

(ခ) ယဿ ဝါ ပန မဂ္ဂသစ္စံ နိရုဇ္ဈိဿတိ တဿ ဒုက္ခသစ္စံ ဥပ္ပဇ္ဇတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ မဂ္ဂသစ္စံ နိရုဇ္ဈိဿတိ၊ နော စ တေသံ ဒုက္ခသစ္စံ ဥပ္ပဇ္ဇတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ မဂ္ဂသစ္စဉ္စ နိရုဇ္ဈိဿတိ ဒုက္ခသစ္စဉ္စ ဥပ္ပဇ္ဇတိ.

၁၅၅. (က) ယဿ သမုဒယသစ္စံ ဥပ္ပဇ္ဇတိ တဿ မဂ္ဂသစ္စံ နိရုဇ္ဈိဿတီတိ?

ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ သမုဒယသစ္စံ ဥပ္ပဇ္ဇတိ၊ နော စ တေသံ မဂ္ဂသစ္စံ နိရုဇ္ဈိဿတိ. ယေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ သမုဒယသစ္စဉ္စ ဥပ္ပဇ္ဇတိ မဂ္ဂသစ္စဉ္စ နိရုဇ္ဈိဿတိ.

(ခ) ယဿ ဝါ ပန မဂ္ဂသစ္စံ နိရုဇ္ဈိဿတိ တဿ သမုဒယသစ္စံ ဥပ္ပဇ္ဇတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ အသညသတ္တာနံ တေသံ မဂ္ဂသစ္စံ နိရုဇ္ဈိဿတိ၊ နော စ တေသံ သမုဒယသစ္စံ ဥပ္ပဇ္ဇတိ. ယေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ မဂ္ဂသစ္စဉ္စ နိရုဇ္ဈိဿတိ သမုဒယသစ္စဉ္စ ဥပ္ပဇ္ဇတိ.

(ခ) အနုလောမဩကာသော

၁၅၆. ယတ္ထ ဒုက္ခသစ္စံ ဥပ္ပဇ္ဇတိ။ပေ။.

(ဂ) အနုလောမပုဂ္ဂလောကာသာ

၁၅၇. (က) ယဿ ယတ္ထ ဒုက္ခသစ္စံ ဥပ္ပဇ္ဇတိ တဿ တတ္ထ သမုဒယသစ္စံ နိရုဇ္ဈိဿတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စံ။ပေ။ ဣတရေသံ စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ ဒုက္ခသစ္စံ။ပေ။.

(ခ) ယဿ ဝါ ပန ယတ္ထ သမုဒယသစ္စံ နိရုဇ္ဈိဿတိ တဿ တတ္ထ ဒုက္ခသစ္စံ ဥပ္ပဇ္ဇတီတိ?

စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ သမုဒယသစ္စံ နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ ဥပ္ပဇ္ဇတိ. စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ သမုဒယသစ္စဉ္စ နိရုဇ္ဈိဿတိ ဒုက္ခသစ္စဉ္စ ဥပ္ပဇ္ဇတိ.

(က) ယဿ ယတ္ထ ဒုက္ခသစ္စံ ဥပ္ပဇ္ဇတိ တဿ တတ္ထ မဂ္ဂသစ္စံ နိရုဇ္ဈိဿတီတိ?

အရဟန္တာနံ စိတ္တဿ ဥပ္ပါဒက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စံ ဥပ္ပဇ္ဇတိ၊ နော စ တေသံ တတ္ထ မဂ္ဂသစ္စံ နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ ဒုက္ခသစ္စဉ္စ ဥပ္ပဇ္ဇတိ မဂ္ဂသစ္စဉ္စ နိရုဇ္ဈိဿတိ.

(ခ) ယဿ ဝါ ပန ယတ္ထ မဂ္ဂသစ္စံ နိရုဇ္ဈိဿတိ တဿ တတ္ထ ဒုက္ခသစ္စံ ဥပ္ပဇ္ဇတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ မဂ္ဂသစ္စံ နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ ဥပ္ပဇ္ဇတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ မဂ္ဂသစ္စဉ္စ နိရုဇ္ဈိဿတိ ဒုက္ခသစ္စဉ္စ ဥပ္ပဇ္ဇတိ.

၁၅၈. (က) ယဿ ယတ္ထ သမုဒယသစ္စံ ဥပ္ပဇ္ဇတိ တဿ တတ္ထ မဂ္ဂသစ္စံ နိရုဇ္ဈိဿတီတိ?

အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ တတ္ထ သမုဒယသစ္စံ ဥပ္ပဇ္ဇတိ၊ နော စ တေသံ တတ္ထ မဂ္ဂသစ္စံ နိရုဇ္ဈိဿတိ. ယေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ တတ္ထ သမုဒယသစ္စဉ္စ ဥပ္ပဇ္ဇတိ မဂ္ဂသစ္စဉ္စ နိရုဇ္ဈိဿတိ.

(ခ) ယဿ ဝါ ပန ယတ္ထ မဂ္ဂသစ္စံ နိရုဇ္ဈိဿတိ တဿ တတ္ထ သမုဒယသစ္စံ ဥပ္ပဇ္ဇတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ မဂ္ဂသစ္စံ နိရုဇ္ဈိဿတိ၊ နော စ တေသံ တတ္ထ သမုဒယသစ္စံ ဥပ္ပဇ္ဇတိ. ယေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ တတ္ထ မဂ္ဂသစ္စဉ္စ နိရုဇ္ဈိဿတိ သမုဒယသစ္စဉ္စ ဥပ္ပဇ္ဇတိ.

(ဃ) ပစ္စနီကပုဂ္ဂလော

၁၅၉. (က) ယဿ ဒုက္ခသစ္စံ နုပ္ပဇ္ဇတိ တဿ သမုဒယသစ္စံ န နိရုဇ္ဈိဿတီတိ?

သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စံ နုပ္ပဇ္ဇတိ၊ နော စ တေသံ သမုဒယသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စဉ္စ နုပ္ပဇ္ဇတိ သမုဒယသစ္စဉ္စ န နိရုဇ္ဈိဿတိ.

(ခ) ယဿ ဝါ ပန သမုဒယသစ္စံ န နိရုဇ္ဈိဿတိ တဿ ဒုက္ခသစ္စံ နုပ္ပဇ္ဇတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ သမုဒယသစ္စံ န နိရုဇ္ဈိဿတိ၊ နော စ တေသံ ဒုက္ခသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ တေသံ သမုဒယသစ္စဉ္စ န နိရုဇ္ဈိဿတိ ဒုက္ခသစ္စဉ္စ နုပ္ပဇ္ဇတိ.

(က) ယဿ ဒုက္ခသစ္စံ နုပ္ပဇ္ဇတိ တဿ မဂ္ဂသစ္စံ န နိရုဇ္ဈိဿတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ အဂ္ဂဖလဿ ဥပ္ပါဒက္ခဏေ တေသံ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ န နိရုဇ္ဈိဿတိ.

(ခ) ယဿ ဝါ ပန မဂ္ဂသစ္စံ န နိရုဇ္ဈိဿတိ တဿ ဒုက္ခသစ္စံ နုပ္ပဇ္ဇတီတိ?

အရဟန္တာနံ စိတ္တဿ ဥပ္ပါဒက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ မဂ္ဂသစ္စံ န နိရုဇ္ဈိဿတိ၊ နော စ တေသံ ဒုက္ခသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ အဂ္ဂဖလဿ ဥပ္ပါဒက္ခဏေ တေသံ မဂ္ဂသစ္စဉ္စ န နိရုဇ္ဈိဿတိ ဒုက္ခသစ္စဉ္စ နုပ္ပဇ္ဇတိ.

၁၆၀. (က) ယဿ သမုဒယသစ္စံ နုပ္ပဇ္ဇတိ တဿ မဂ္ဂသစ္စံ န နိရုဇ္ဈိဿတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ အသညသတ္တာနံ တေသံ သမုဒယသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ န နိရုဇ္ဈိဿတိ.

(ခ) ယဿ ဝါ ပန မဂ္ဂသစ္စံ န နိရုဇ္ဈိဿတိ တဿ သမုဒယသစ္စံ နုပ္ပဇ္ဇတီတိ?

ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ မဂ္ဂသစ္စံ န နိရုဇ္ဈိဿတိ၊ နော စ တေသံ သမုဒယသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ မဂ္ဂသစ္စဉ္စ န နိရုဇ္ဈိဿတိ သမုဒယသစ္စဉ္စ နုပ္ပဇ္ဇတိ.

(င) ပစ္စနီကဩကာသော

၁၆၁. ယတ္ထ ဒုက္ခသစ္စံ နုပ္ပဇ္ဇတိ။ပေ။.

(စ) ပစ္စနီကပုဂ္ဂလောကာသာ

၁၆၂. (က) ယဿ ယတ္ထ ဒုက္ခသစ္စံ နုပ္ပဇ္ဇတိ တဿ တတ္ထ သမုဒယသစ္စံ န နိရုဇ္ဈိဿတီတိ?

စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ ဒုက္ခသစ္စံ နုပ္ပဇ္ဇတိ၊ နော စ တေသံ တတ္ထ သမုဒယသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ အသညသတ္တာ စဝန္တာနံ တေသံ တတ္ထ ဒုက္ခသစ္စဉ္စ နုပ္ပဇ္ဇတိ သမုဒယသစ္စဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ သမုဒယသစ္စံ န နိရုဇ္ဈိဿတိ တဿ တတ္ထ ဒုက္ခသစ္စံ နုပ္ပဇ္ဇတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ သမုဒယသစ္စံ န နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ အသညသတ္တာ စဝန္တာနံ တေသံ တတ္ထ သမုဒယသစ္စဉ္စ န နိရုဇ္ဈိဿတိ ဒုက္ခသစ္စဉ္စ နုပ္ပဇ္ဇတိ.

(က) ယဿ ယတ္ထ ဒုက္ခသစ္စံ နုပ္ပဇ္ဇတိ တဿ တတ္ထ မဂ္ဂသစ္စံ န နိရုဇ္ဈိဿတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ ဒုက္ခသစ္စံ နုပ္ပဇ္ဇတိ၊ နော စ တေသံ တတ္ထ မဂ္ဂသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ အဂ္ဂဖလဿ ဥပ္ပါဒက္ခဏေ အသညသတ္တာ [အပါယာ အသညသတ္တာ (သျာ.)] စဝန္တာနံ တေသံ တတ္ထ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိဿတိ တဿ တတ္ထ ဒုက္ခသစ္စံ နုပ္ပဇ္ဇတီတိ?

အရဟန္တာနံ စိတ္တဿ ဥပ္ပါဒက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ [အပါယံ အသညသတ္တံ (သျာ.)] ဥပပဇ္ဇန္တာနံ တေသံ တတ္ထ မဂ္ဂသစ္စံ န နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ အဂ္ဂဖလဿ ဥပ္ပါဒက္ခဏေ အသညသတ္တာ စဝန္တာနံ တေသံ တတ္ထ မဂ္ဂသစ္စဉ္စ န နိရုဇ္ဈိဿတိ ဒုက္ခသစ္စဉ္စ နုပ္ပဇ္ဇတိ.

၁၆၃. (က) ယဿ ယတ္ထ သမုဒယသစ္စံ နုပ္ပဇ္ဇတိ တဿ တတ္ထ မဂ္ဂသစ္စံ န နိရုဇ္ဈိဿတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ သမုဒယသစ္စံ နုပ္ပဇ္ဇတိ၊ နော စ တေသံ တတ္ထ မဂ္ဂသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိဿတိ တဿ တတ္ထ သမုဒယသစ္စံ နုပ္ပဇ္ဇတီတိ?

အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ တတ္ထ မဂ္ဂသစ္စံ န နိရုဇ္ဈိဿတိ၊ နော စ တေသံ တတ္ထ သမုဒယသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ မဂ္ဂသစ္စဉ္စ န နိရုဇ္ဈိဿတိ သမုဒယသစ္စဉ္စ နုပ္ပဇ္ဇတိ.