(၁) ပစ္စုပ္ပန္နဝါရော
(က) အနုလောမပုဂ္ဂလော
၁၃၆. (က) ယဿ ဒုက္ခသစ္စံ ဥပ္ပဇ္ဇတိ တဿ သမုဒယသစ္စံ နိရုဇ္ဈတီတိ? နော.
(ခ) ယဿ ဝါ ပန သမုဒယသစ္စံ နိရုဇ္ဈတိ တဿ ဒုက္ခသစ္စံ ဥပ္ပဇ္ဇတီတိ? နော.
(က) ယဿ ဒုက္ခသစ္စံ ဥပ္ပဇ္ဇတိ တဿ မဂ္ဂသစ္စံ နိရုဇ္ဈတီတိ? နော.
(ခ) ယဿ ဝါ ပန မဂ္ဂသစ္စံ နိရုဇ္ဈတိ တဿ ဒုက္ခသစ္စံ ဥပ္ပဇ္ဇတီတိ? နော.
၁၃၇. (က) ယဿ သမုဒယသစ္စံ ဥပ္ပဇ္ဇတိ တဿ မဂ္ဂသစ္စံ နိရုဇ္ဈတီတိ? နော.
(ခ) ယဿ ဝါ ပန မဂ္ဂသစ္စံ နိရုဇ္ဈတိ တဿ သမုဒယသစ္စံ ဥပ္ပဇ္ဇတီတိ? နော.
(ခ) အနုလောမဩကာသော
၁၃၈. ယတ္ထ ဒုက္ခသစ္စံ ဥပ္ပဇ္ဇတိ တတ္ထ သမုဒယသစ္စံ နိရုဇ္ဈတီတိ?
အသညသတ္တေ တတ္ထ ဒုက္ခသစ္စံ ဥပ္ပဇ္ဇတိ၊ နော စ တတ္ထ သမုဒယသစ္စံ နိရုဇ္ဈတိ။ပေ။.
(ယတ္ထကံ ဥပ္ပါဒဝါရေပိ နိရောဓဝါရေပိ ဥပ္ပါဒနိရောဓဝါရေပိ သဒိသံ နတ္ထိ နာနာကရဏံ).
(ဂ) အနုလောမပုဂ္ဂလောကာသာ
၁၃၉. ယဿ ယတ္ထ ဒုက္ခသစ္စံ ဥပ္ပဇ္ဇတိ တဿ တတ္ထ သမုဒယသစ္စံ နိရုဇ္ဈတီတိ? နော.
(ယဿကမ္ပိ ယဿယတ္ထကမ္ပိ သဒိသံ).
(ဃ) ပစ္စနီကပုဂ္ဂလော
၁၄၀. (က) ယဿ ဒုက္ခသစ္စံ နုပ္ပဇ္ဇတိ တဿ သမုဒယသစ္စံ န နိရုဇ္ဈတီတိ?
တဏှာယ ဘင်္ဂက္ခဏေ တေသံ ဒုက္ခသစ္စံ နုပ္ပဇ္ဇတိ၊ နော စ တေသံ သမုဒယသစ္စံ န နိရုဇ္ဈတိ. သဗ္ဗေသံ စဝန္တာနံ ပဝတ္တေ တဏှာဝိပ္ပယုတ္တစိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စဉ္စ နုပ္ပဇ္ဇတိ သမုဒယသစ္စဉ္စ န နိရုဇ္ဈတိ.
(ခ) ယဿ ဝါ ပန သမုဒယသစ္စံ န နိရုဇ္ဈတိ တဿ ဒုက္ခသစ္စံ နုပ္ပဇ္ဇတီတိ?
သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ သမုဒယသစ္စံ န နိရုဇ္ဈတိ၊ နော စ တေသံ ဒုက္ခသစ္စံ နုပ္ပဇ္ဇတိ. သဗ္ဗေသံ စဝန္တာနံ ပဝတ္တေ တဏှာဝိပ္ပယုတ္တစိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ သမုဒယသစ္စဉ္စ န နိရုဇ္ဈတိ ဒုက္ခသစ္စဉ္စ နုပ္ပဇ္ဇတိ.
(က) ယဿ ဒုက္ခသစ္စံ နုပ္ပဇ္ဇတိ တဿ မဂ္ဂသစ္စံ န နိရုဇ္ဈတီတိ?
မဂ္ဂဿ ဘင်္ဂက္ခဏေ တေသံ ဒုက္ခသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ န နိရုဇ္ဈတိ. သဗ္ဗေသံ စဝန္တာနံ ပဝတ္တေ မဂ္ဂဝိပ္ပယုတ္တစိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ န နိရုဇ္ဈတိ.
(ခ) ယဿ ဝါ ပန မဂ္ဂသစ္စံ န နိရုဇ္ဈတိ တဿ ဒုက္ခသစ္စံ နုပ္ပဇ္ဇတီတိ?
သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ မဂ္ဂသစ္စံ န နိရုဇ္ဈတိ၊ နော စ တေသံ ဒုက္ခသစ္စံ နုပ္ပဇ္ဇတိ. သဗ္ဗေသံ စဝန္တာနံ ပဝတ္တေ မဂ္ဂဝိပ္ပယုတ္တစိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ မဂ္ဂသစ္စဉ္စ န နိရုဇ္ဈတိ ဒုက္ခသစ္စဉ္စ နုပ္ပဇ္ဇတိ.
၁၄၁. (က) ယဿ သမုဒယသစ္စံ နုပ္ပဇ္ဇတိ တဿ မဂ္ဂသစ္စံ န နိရုဇ္ဈတီတိ?
မဂ္ဂဿ ဘင်္ဂက္ခဏေ တေသံ သမုဒယသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ န နိရုဇ္ဈတိ. တဏှာဝိပ္ပယုတ္တစိတ္တဿ ဥပ္ပါဒက္ခဏေ မဂ္ဂဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ န နိရုဇ္ဈတိ.
(ခ) ယဿ ဝါ ပန မဂ္ဂသစ္စံ န နိရုဇ္ဈတိ တဿ သမုဒယသစ္စံ နုပ္ပဇ္ဇတီတိ?
တဏှာယ ဥပ္ပါဒက္ခဏေ တေသံ မဂ္ဂသစ္စံ န နိရုဇ္ဈတိ၊ နော စ တေသံ သမုဒယသစ္စံ နုပ္ပဇ္ဇတိ. မဂ္ဂဝိပ္ပယုတ္တစိတ္တဿ ဘင်္ဂက္ခဏေ တဏှာဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ မဂ္ဂသစ္စဉ္စ န နိရုဇ္ဈတိ သမုဒယသစ္စဉ္စ နုပ္ပဇ္ဇတိ.
(င) ပစ္စနီကဩကာသော
၁၄၂. ယတ္ထ ဒုက္ခသစ္စံ နုပ္ပဇ္ဇတိ။ပေ။.
(စ) ပစ္စနီကပုဂ္ဂလောကာသာ
၁၄၃. ယဿ ယတ္ထ ဒုက္ခသစ္စံ နုပ္ပဇ္ဇတိ။ပေ။.
(ယဿကမ္ပိ ယဿယတ္ထကမ္ပိ သဒိသံ၊ ယဿယတ္ထကေပိ နိရောဓသမာပန္နာနန္တိ န ကာတဗ္ဗံ).