(၁) ပစ္စုပ္ပန္နဝါရော

(က) အနုလောမပုဂ္ဂလော

၈၈. (က) ယဿ ဒုက္ခသစ္စံ နိရုဇ္ဈတိ တဿ သမုဒယသစ္စံ နိရုဇ္ဈတီတိ?

သဗ္ဗေသံ စဝန္တာနံ ပဝတ္တေ တဏှာဝိပ္ပယုတ္တစိတ္တဿ ဘင်္ဂက္ခဏေ တေသံ ဒုက္ခသစ္စံ နိရုဇ္ဈတိ၊ နော စ တေသံ သမုဒယသစ္စံ နိရုဇ္ဈတိ. တဏှာယ ဘင်္ဂက္ခဏေ တေသံ ဒုက္ခသစ္စဉ္စ နိရုဇ္ဈတိ သမုဒယသစ္စဉ္စ နိရုဇ္ဈတိ.

(ခ) ယဿ ဝါ ပန သမုဒယသစ္စံ နိရုဇ္ဈတိ တဿ ဒုက္ခသစ္စံ နိရုဇ္ဈတီတိ? အာမန္တာ.

(က) ယဿ ဒုက္ခသစ္စံ နိရုဇ္ဈတိ တဿ မဂ္ဂသစ္စံ နိရုဇ္ဈတီတိ?

သဗ္ဗေသံ စဝန္တာနံ ပဝတ္တေ မဂ္ဂဝိပ္ပယုတ္တစိတ္တဿ ဘင်္ဂက္ခဏေ တေသံ ဒုက္ခသစ္စံ နိရုဇ္ဈတိ၊ နော စ တေသံ မဂ္ဂသစ္စံ နိရုဇ္ဈတိ. ပဉ္စဝေါကာရေ မဂ္ဂဿ ဘင်္ဂက္ခဏေ တေသံ ဒုက္ခသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈတိ.

(ခ) ယဿ ဝါ ပန မဂ္ဂသစ္စံ နိရုဇ္ဈတိ တဿ ဒုက္ခသစ္စံ နိရုဇ္ဈတီတိ?

အရူပေ မဂ္ဂဿ ဘင်္ဂက္ခဏေ တေသံ မဂ္ဂသစ္စံ နိရုဇ္ဈတိ၊ နော စ တေသံ ဒုက္ခသစ္စံ နိရုဇ္ဈတိ. ပဉ္စဝေါကာရေ မဂ္ဂဿ ဘင်္ဂက္ခဏေ တေသံ မဂ္ဂသစ္စဉ္စ နိရုဇ္ဈတိ ဒုက္ခသစ္စဉ္စ နိရုဇ္ဈတိ.

၈၉. (က) ယဿ သမုဒယသစ္စံ နိရုဇ္ဈတိ တဿ မဂ္ဂသစ္စံ နိရုဇ္ဈတီတိ? နော.

(ခ) ယဿ ဝါ ပန မဂ္ဂသစ္စံ နိရုဇ္ဈတိ တဿ သမုဒယသစ္စံ နိရုဇ္ဈတီတိ? နော.

(ခ) အနုလောမဩကာသော

၉၀. ယတ္ထ ဒုက္ခသစ္စံ နိရုဇ္ဈတိ တတ္ထ သမုဒယသစ္စံ နိရုဇ္ဈတီတိ?

အသညသတ္တေ တတ္ထ ဒုက္ခသစ္စံ နိရုဇ္ဈတိ။ပေ။.

(ယတ္ထကံ ဥပ္ပါဒေပိ နိရောဓေပိ ဥပ္ပါဒနိရောဓေပိ သဒိသံ၊ နတ္ထိ နာနာကရဏံ).

(ဂ) အနုလောမပုဂ္ဂလောကာသာ

၉၁. ယဿ ယတ္ထ ဒုက္ခသစ္စံ နိရုဇ္ဈတိ။ပေ။.

(ယဿယတ္ထကမ္ပိ သဒိသံ ဝိတ္ထာရေတဗ္ဗံ).

(ဃ) ပစ္စနီကပုဂ္ဂလော

၉၂. (က) ယဿ ဒုက္ခသစ္စံ န နိရုဇ္ဈတိ တဿ သမုဒယသစ္စံ န နိရုဇ္ဈတီတိ? အာမန္တာ.

(ခ) ယဿ ဝါ ပန သမုဒယသစ္စံ န နိရုဇ္ဈတိ တဿ ဒုက္ခသစ္စံ န နိရုဇ္ဈတီတိ?

သဗ္ဗေသံ စဝန္တာနံ ပဝတ္တေ တဏှာဝိပ္ပယုတ္တစိတ္တဿ ဘင်္ဂက္ခဏေ တေသံ သမုဒယသစ္စံ န နိရုဇ္ဈတိ၊ နော စ တေသံ ဒုက္ခသစ္စံ န နိရုဇ္ဈတိ. သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ သမုဒယသစ္စဉ္စ န နိရုဇ္ဈတိ ဒုက္ခသစ္စဉ္စ န နိရုဇ္ဈတိ.

(က) ယဿ ဒုက္ခသစ္စံ န နိရုဇ္ဈတိ တဿ မဂ္ဂသစ္စံ န နိရုဇ္ဈတီတိ?

အရူပေ မဂ္ဂဿ ဘင်္ဂက္ခဏေ တေသံ ဒုက္ခသစ္စံ န နိရုဇ္ဈတိ၊ နော စ တေသံ မဂ္ဂသစ္စံ န နိရုဇ္ဈတိ. သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ ဖလဿ ဘင်္ဂက္ခဏေ တေသံ ဒုက္ခသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈတိ.

(ခ) ယဿ ဝါ ပန မဂ္ဂသစ္စံ န နိရုဇ္ဈတိ တဿ ဒုက္ခသစ္စံ န နိရုဇ္ဈတီတိ?

သဗ္ဗေသံ စဝန္တာနံ ပဝတ္တေ မဂ္ဂဝိပ္ပယုတ္တစိတ္တဿ ဘင်္ဂက္ခဏေ တေသံ မဂ္ဂသစ္စံ န နိရုဇ္ဈတိ၊ နော စ တေသံ ဒုက္ခသစ္စံ န နိရုဇ္ဈတိ. သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ ဖလဿ ဘင်္ဂက္ခဏေ တေသံ မဂ္ဂသစ္စဉ္စ န နိရုဇ္ဈတိ ဒုက္ခသစ္စဉ္စ န နိရုဇ္ဈတိ.

၉၃. (က) ယဿ သမုဒယသစ္စံ န နိရုဇ္ဈတိ တဿ မဂ္ဂသစ္စံ န နိရုဇ္ဈတီတိ?

မဂ္ဂဿ ဘင်္ဂက္ခဏေ တေသံ သမုဒယသစ္စံ န နိရုဇ္ဈတိ၊ နော စ တေသံ မဂ္ဂသစ္စံ န နိရုဇ္ဈတိ. သဗ္ဗေသံ စိတ္တဿ ဥပ္ပါဒက္ခဏေ တဏှာဝိပ္ပယုတ္တမဂ္ဂဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ သမုဒယသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈတိ.

(ခ) ယဿ ဝါ ပန မဂ္ဂသစ္စံ န နိရုဇ္ဈတိ တဿ သမုဒယသစ္စံ န နိရုဇ္ဈတီတိ?

တဏှာယ ဘင်္ဂက္ခဏေ တေသံ မဂ္ဂသစ္စံ န နိရုဇ္ဈတိ၊ နော စ တေသံ သမုဒယသစ္စံ န နိရုဇ္ဈတိ. သဗ္ဗေသံ စိတ္တဿ ဥပ္ပါဒက္ခဏေ မဂ္ဂဝိပ္ပယုတ္တတဏှာဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ မဂ္ဂသစ္စဉ္စ န နိရုဇ္ဈတိ သမုဒယသစ္စဉ္စ န နိရုဇ္ဈတိ.

(င) ပစ္စနီကဩကာသော

၉၄. ယတ္ထ ဒုက္ခသစ္စံ န နိရုဇ္ဈတိ။ပေ။.

(စ) ပစ္စနီကပုဂ္ဂလောကာသာ

၉၅. ယဿ ယတ္ထ ဒုက္ခသစ္စံ န နိရုဇ္ဈတိ။ပေ။.

(ယဿကမ္ပိ [ယဿကမ္ပိ ယတ္ထကမ္ပိ (သီ. သျာ.)] ယဿယတ္ထကမ္ပိ သဒိသံ၊ ယဿယတ္ထကေပိ နိရောဓသမာပန္နာနန္တိ စေတံ န ကာတဗ္ဗံ).