(၁) ပစ္စုပ္ပန္နဝါရော
(က) အနုလောမပုဂ္ဂလော
၂၇. (က) ယဿ ဒုက္ခသစ္စံ ဥပ္ပဇ္ဇတိ တဿ သမုဒယသစ္စံ ဥပ္ပဇ္ဇတီတိ?
သဗ္ဗေသံ ဥပပဇ္ဇန္တာနံ ပဝတ္တေ တဏှာဝိပ္ပယုတ္တစိတ္တဿ ဥပ္ပါဒက္ခဏေ တေသံ ဒုက္ခသစ္စံ ဥပ္ပဇ္ဇတိ၊ နော စ တေသံ သမုဒယသစ္စံ ဥပ္ပဇ္ဇတိ. တဏှာယ ဥပ္ပါဒက္ခဏေ တေသံ ဒုက္ခသစ္စဉ္စ ဥပ္ပဇ္ဇတိ သမုဒယသစ္စဉ္စ ဥပ္ပဇ္ဇတိ.
(ခ) ယဿ ဝါ ပန သမုဒယသစ္စံ ဥပ္ပဇ္ဇတိ တဿ ဒုက္ခသစ္စံ ဥပ္ပဇ္ဇတီတိ? အာမန္တာ.
(က) ယဿ ဒုက္ခသစ္စံ ဥပ္ပဇ္ဇတိ တဿ မဂ္ဂသစ္စံ ဥပ္ပဇ္ဇတီတိ?
သဗ္ဗေသံ ဥပပဇ္ဇန္တာနံ ပဝတ္တေ မဂ္ဂဝိပ္ပယုတ္တစိတ္တဿ ဥပ္ပါဒက္ခဏေ တေသံ ဒုက္ခသစ္စံ ဥပ္ပဇ္ဇတိ၊ နော စ တေသံ မဂ္ဂသစ္စံ ဥပ္ပဇ္ဇတိ. ပဉ္စဝေါကာရေ မဂ္ဂဿ ဥပ္ပါဒက္ခဏေ တေသံ ဒုက္ခသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇတိ.
(ခ) ယဿ ဝါ ပန မဂ္ဂသစ္စံ ဥပ္ပဇ္ဇတိ တဿ ဒုက္ခသစ္စံ ဥပ္ပဇ္ဇတီတိ?
အရူပေ မဂ္ဂဿ ဥပ္ပါဒက္ခဏေ တေသံ မဂ္ဂသစ္စံ ဥပ္ပဇ္ဇတိ၊ နော စ တေသံ ဒုက္ခသစ္စံ ဥပ္ပဇ္ဇတိ. ပဉ္စဝေါကာရေ မဂ္ဂဿ ဥပ္ပါဒက္ခဏေ တေသံ မဂ္ဂသစ္စဉ္စ ဥပ္ပဇ္ဇတိ ဒုက္ခသစ္စဉ္စ ဥပ္ပဇ္ဇတိ.
၂၈. (က) ယဿ သမုဒယသစ္စံ ဥပ္ပဇ္ဇတိ တဿ မဂ္ဂသစ္စံ ဥပ္ပဇ္ဇတီတိ? နော.
(ခ) ယဿ ဝါ ပန မဂ္ဂသစ္စံ ဥပ္ပဇ္ဇတိ တဿ သမုဒယသစ္စံ ဥပ္ပဇ္ဇတီတိ? နော.
(ခ) အနုလောမဩကာသော
၂၉. (က) ယတ္ထ ဒုက္ခသစ္စံ ဥပ္ပဇ္ဇတိ တတ္ထ သမုဒယသစ္စံ ဥပ္ပဇ္ဇတီတိ?
အသညသတ္တေ တတ္ထ ဒုက္ခသစ္စံ ဥပ္ပဇ္ဇတိ၊ နော စ တတ္ထ သမုဒယသစ္စံ ဥပ္ပဇ္ဇတိ. စတုဝေါကာရေ ပဉ္စဝေါကာရေ တတ္ထ ဒုက္ခသစ္စဉ္စ ဥပ္ပဇ္ဇတိ သမုဒယသစ္စဉ္စ ဥပ္ပဇ္ဇတိ.
(ခ) ယတ္ထ ဝါ ပန။ပေ။? အာမန္တာ.
(က) ယတ္ထ ဒုက္ခသစ္စံ ဥပ္ပဇ္ဇတိ တတ္ထ မဂ္ဂသစ္စံ ဥပ္ပဇ္ဇတီတိ?
အပါယေ အသညသတ္တေ တတ္ထ ဒုက္ခသစ္စံ ဥပ္ပဇ္ဇတိ၊ နော စ တတ္ထ မဂ္ဂသစ္စံ ဥပ္ပဇ္ဇတိ. အဝသေသေ စတုဝေါကာရေ ပဉ္စဝေါကာရေ တတ္ထ ဒုက္ခသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇတိ.
(ခ) ယတ္ထ ဝါ ပန မဂ္ဂသစ္စံ ဥပ္ပဇ္ဇတိ တတ္ထ ဒုက္ခသစ္စံ ဥပ္ပဇ္ဇတီတိ? အာမန္တာ.
၃၀. (က) ယတ္ထ သမုဒယသစ္စံ ဥပ္ပဇ္ဇတိ တတ္ထ မဂ္ဂသစ္စံ ဥပ္ပဇ္ဇတီတိ?
အပါယေ တတ္ထ သမုဒယသစ္စံ ဥပ္ပဇ္ဇတိ၊ နော စ တတ္ထ မဂ္ဂသစ္စံ ဥပ္ပဇ္ဇတိ. အဝသေသေ စတုဝေါကာရေ ပဉ္စဝေါကာရေ တတ္ထ သမုဒယသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇတိ.
(ခ) ယတ္ထ ဝါ ပန။ပေ။? အာမန္တာ.
(ဂ) အနုလောမပုဂ္ဂလောကာသာ
၃၁. ယဿ ယတ္ထ ဒုက္ခသစ္စံ ဥပ္ပဇ္ဇတိ တဿ တတ္ထ သမုဒယသစ္စံ ဥပ္ပဇ္ဇတီတိ?။ပေ။.
(ယဿကမ္ပိ ယဿယတ္ထကမ္ပိ သဒိသံ ဝိတ္ထာရေတဗ္ဗံ).
(ဃ) ပစ္စနီကပုဂ္ဂလော
၃၂. (က) ယဿ ဒုက္ခသစ္စံ နုပ္ပဇ္ဇတိ တဿ သမုဒယသစ္စံ နုပ္ပဇ္ဇတီတိ? အာမန္တာ.
(ခ) ယဿ ဝါ ပန သမုဒယသစ္စံ နုပ္ပဇ္ဇတိ တဿ ဒုက္ခသစ္စံ နုပ္ပဇ္ဇတီတိ?
သဗ္ဗေသံ ဥပပဇ္ဇန္တာနံ ပဝတ္တေ တဏှာဝိပ္ပယုတ္တစိတ္တဿ ဥပ္ပါဒက္ခဏေ တေသံ သမုဒယသစ္စံ နုပ္ပဇ္ဇတိ၊ နော စ တေသံ ဒုက္ခသစ္စံ နုပ္ပဇ္ဇတိ. သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ သမုဒယသစ္စဉ္စ နုပ္ပဇ္ဇတိ ဒုက္ခသစ္စဉ္စ နုပ္ပဇ္ဇတိ.
(က) ယဿ ဒုက္ခသစ္စံ နုပ္ပဇ္ဇတိ တဿ မဂ္ဂသစ္စံ နုပ္ပဇ္ဇတီတိ?
အရူပေ မဂ္ဂဿ ဥပ္ပါဒက္ခဏေ တေသံ ဒုက္ခသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ နုပ္ပဇ္ဇတိ. သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ ဖလဿ ဥပ္ပါဒက္ခဏေ တေသံ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇတိ.
(ခ) ယဿ ဝါ ပန မဂ္ဂသစ္စံ နုပ္ပဇ္ဇတိ တဿ ဒုက္ခသစ္စံ နုပ္ပဇ္ဇတီတိ?
သဗ္ဗေသံ ဥပပဇ္ဇန္တာနံ ပဝတ္တေ မဂ္ဂဝိပ္ပယုတ္တစိတ္တဿ ဥပ္ပါဒက္ခဏေ တေသံ မဂ္ဂသစ္စံ နုပ္ပဇ္ဇတိ၊ နော စ တေသံ ဒုက္ခသစ္စံ နုပ္ပဇ္ဇတိ. သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ ဖလဿ ဥပ္ပါဒက္ခဏေ တေသံ မဂ္ဂသစ္စဉ္စ နုပ္ပဇ္ဇတိ ဒုက္ခသစ္စဉ္စ နုပ္ပဇ္ဇတိ.
၃၃. (က) ယဿ သမုဒယသစ္စံ နုပ္ပဇ္ဇတိ တဿ မဂ္ဂသစ္စံ နုပ္ပဇ္ဇတီတိ?
မဂ္ဂဿ ဥပ္ပါဒက္ခဏေ တေသံ သမုဒယသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ တဏှာဝိပ္ပယုတ္တမဂ္ဂဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇတိ.
(ခ) ယဿ ဝါ ပန မဂ္ဂသစ္စံ နုပ္ပဇ္ဇတိ တဿ သမုဒယသစ္စံ နုပ္ပဇ္ဇတီတိ?
တဏှာယ ဥပ္ပါဒက္ခဏေ တေသံ မဂ္ဂသစ္စံ နုပ္ပဇ္ဇတိ၊ နော စ တေသံ သမုဒယသစ္စံ နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ မဂ္ဂဝိပ္ပယုတ္တတဏှာဝိပ္ပယုတ္တစိတ္တဿ [တဏှာဝိပ္ပယုတ္တမဂ္ဂဝိပ္ပယုတ္တစိတ္တဿ (သီ.) ဧဝံ ပုဂ္ဂလောကာသေပိ နိရောဓဝါရေပိ] ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ မဂ္ဂသစ္စဉ္စ နုပ္ပဇ္ဇတိ သမုဒယသစ္စဉ္စ နုပ္ပဇ္ဇတိ.
(င) ပစ္စနီကဩကာသော
၃၄. (က) ယတ္ထ ဒုက္ခသစ္စံ နုပ္ပဇ္ဇတိ တတ္ထ သမုဒယသစ္စံ နုပ္ပဇ္ဇတီတိ? နတ္ထိ.
(ခ) ယတ္ထ ဝါ ပန သမုဒယသစ္စံ နုပ္ပဇ္ဇတိ တတ္ထ ဒုက္ခသစ္စံ နုပ္ပဇ္ဇတီတိ? ဥပ္ပဇ္ဇတိ.
(က) ယတ္ထ ဒုက္ခသစ္စံ နုပ္ပဇ္ဇတိ တတ္ထ မဂ္ဂသစ္စံ နုပ္ပဇ္ဇတီတိ? နတ္ထိ.
(ခ) ယတ္ထ ဝါ ပန မဂ္ဂသစ္စံ နုပ္ပဇ္ဇတိ တတ္ထ ဒုက္ခသစ္စံ နုပ္ပဇ္ဇတီတိ? ဥပ္ပဇ္ဇတိ.
၃၅. (က) ယတ္ထ သမုဒယသစ္စံ နုပ္ပဇ္ဇတိ တတ္ထ မဂ္ဂသစ္စံ နုပ္ပဇ္ဇတီတိ? အာမန္တာ.
(ခ) ယတ္ထ ဝါ ပန မဂ္ဂသစ္စံ နုပ္ပဇ္ဇတိ တတ္ထ သမုဒယသစ္စံ နုပ္ပဇ္ဇတီတိ?
အပါယေ တတ္ထ မဂ္ဂသစ္စံ နုပ္ပဇ္ဇတိ၊ နော စ တတ္ထ သမုဒယသစ္စံ နုပ္ပဇ္ဇတိ. အသညသတ္တေ တတ္ထ မဂ္ဂသစ္စဉ္စ နုပ္ပဇ္ဇတိ သမုဒယသစ္စဉ္စ နုပ္ပဇ္ဇတိ.
(စ) ပစ္စနီကပုဂ္ဂလောကာသာ
၃၆. (က) ယဿ ယတ္ထ ဒုက္ခသစ္စံ နုပ္ပဇ္ဇတိ တဿ တတ္ထ သမုဒယသစ္စံ နုပ္ပဇ္ဇတီတိ? အာမန္တာ.
(ခ) ယဿ ဝါ ပန ယတ္ထ သမုဒယသစ္စံ နုပ္ပဇ္ဇတိ တဿ တတ္ထ ဒုက္ခသစ္စံ နုပ္ပဇ္ဇတီတိ?
သဗ္ဗေသံ ဥပပဇ္ဇန္တာနံ ပဝတ္တေ တဏှာဝိပ္ပယုတ္တစိတ္တဿ ဥပ္ပါဒက္ခဏေ တေသံ တတ္ထ သမုဒယသစ္စံ နုပ္ပဇ္ဇတိ၊ နော စ တေသံ တတ္ထ ဒုက္ခသစ္စံ နုပ္ပဇ္ဇတိ. သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ သမုဒယသစ္စဉ္စ နုပ္ပဇ္ဇတိ ဒုက္ခသစ္စဉ္စ နုပ္ပဇ္ဇတိ.
(က) ယဿ ယတ္ထ ဒုက္ခသစ္စံ နုပ္ပဇ္ဇတိ တဿ တတ္ထ မဂ္ဂသစ္စံ နုပ္ပဇ္ဇတီတိ?
အရူပေ မဂ္ဂဿ ဥပ္ပါဒက္ခဏေ တေသံ တတ္ထ ဒုက္ခသစ္စံ နုပ္ပဇ္ဇတိ၊ နော စ တေသံ တတ္ထ မဂ္ဂသစ္စံ နုပ္ပဇ္ဇတိ. သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ ဖလဿ ဥပ္ပါဒက္ခဏေ တေသံ တတ္ထ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇတိ.
(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇတိ တဿ တတ္ထ ဒုက္ခသစ္စံ နုပ္ပဇ္ဇတီတိ?
သဗ္ဗေသံ ဥပပဇ္ဇန္တာနံ ပဝတ္တေ မဂ္ဂဝိပ္ပယုတ္တစိတ္တဿ ဥပ္ပါဒက္ခဏေ တေသံ တတ္ထ မဂ္ဂသစ္စံ နုပ္ပဇ္ဇတိ၊ နော စ တေသံ တတ္ထ ဒုက္ခသစ္စံ နုပ္ပဇ္ဇတိ. သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ ဖလဿ ဥပ္ပါဒက္ခဏေ တေသံ တတ္ထ မဂ္ဂသစ္စဉ္စ နုပ္ပဇ္ဇတိ ဒုက္ခသစ္စဉ္စ နုပ္ပဇ္ဇတိ.
၃၇. (က) ယဿ ယတ္ထ သမုဒယသစ္စံ နုပ္ပဇ္ဇတိ တဿ တတ္ထ မဂ္ဂသစ္စံ နုပ္ပဇ္ဇတီတိ?
မဂ္ဂဿ ဥပ္ပါဒက္ခဏေ တေသံ တတ္ထ သမုဒယသစ္စံ နုပ္ပဇ္ဇတိ၊ နော စ တေသံ တတ္ထ မဂ္ဂသစ္စံ နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ တဏှာဝိပ္ပယုတ္တမဂ္ဂဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇတိ.
(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇတိ တဿ တတ္ထ သမုဒယသစ္စံ နုပ္ပဇ္ဇတီတိ?
တဏှာယ ဥပ္ပါဒက္ခဏေ တေသံ တတ္ထ မဂ္ဂသစ္စံ နုပ္ပဇ္ဇတိ၊ နော စ တေသံ တတ္ထ သမုဒယသစ္စံ နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ မဂ္ဂဝိပ္ပယုတ္တတဏှာဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ မဂ္ဂသစ္စဉ္စ နုပ္ပဇ္ဇတိ သမုဒယသစ္စဉ္စ နုပ္ပဇ္ဇတိ.