(၁) ပစ္စုပ္ပန္နဝါရော

(က) အနုလောမပုဂ္ဂလော

၁၈. (က) ယဿ စက္ခုဓာတု ဥပ္ပဇ္ဇတိ တဿ သောတဓာတု ဥပ္ပဇ္ဇတီတိ?

သစက္ခုကာနံ အသောတကာနံ ဥပပဇ္ဇန္တာနံ တေသံ စက္ခုဓာတု ဥပ္ပဇ္ဇတိ၊ နော စ တေသံ သောတဓာတု ဥပ္ပဇ္ဇတိ. သစက္ခုကာနံ သသောတကာနံ ဥပပဇ္ဇန္တာနံ တေသံ စက္ခုဓာတု စ ဥပ္ပဇ္ဇတိ သောတဓာတု စ ဥပ္ပဇ္ဇတိ.

(ခ) ယဿ ဝါ ပန သောတဓာတု ဥပ္ပဇ္ဇတိ တဿ စက္ခုဓာတု ဥပ္ပဇ္ဇတီတိ?

သသောတကာနံ အစက္ခုကာနံ ဥပပဇ္ဇန္တာနံ တေသံ သောတဓာတု ဥပ္ပဇ္ဇတိ၊ နော စ တေသံ စက္ခုဓာတု ဥပ္ပဇ္ဇတိ. သသောတကာနံ သစက္ခုကာနံ ဥပပဇ္ဇန္တာနံ တေသံ သောတဓာတု စ ဥပ္ပဇ္ဇတိ စက္ခုဓာတု စ ဥပ္ပဇ္ဇတိ.

(က) ယဿ စက္ခုဓာတု ဥပ္ပဇ္ဇတိ တဿ ဃာနဓာတု ဥပ္ပဇ္ဇတီတိ?

သစက္ခုကာနံ အဃာနကာနံ ဥပပဇ္ဇန္တာနံ တေသံ စက္ခုဓာတု ဥပ္ပဇ္ဇတိ၊ နော စ တေသံ ဃာနဓာတု ဥပ္ပဇ္ဇတိ. သစက္ခုကာနံ သဃာနကာနံ ဥပပဇ္ဇန္တာနံ တေသံ စက္ခုဓာတု စ ဥပ္ပဇ္ဇတိ ဃာနဓာတု စ ဥပ္ပဇ္ဇတိ.

(ခ) ယဿ ဝါ ပန ဃာနဓာတု ဥပ္ပဇ္ဇတိ တဿ စက္ခုဓာတု ဥပ္ပဇ္ဇတီတိ?

သဃာနကာနံ အစက္ခုကာနံ ဥပပဇ္ဇန္တာနံ တေသံ ဃာနဓာတု ဥပ္ပဇ္ဇတိ၊ နော စ တေသံ စက္ခုဓာတု ဥပ္ပဇ္ဇတိ. သဃာနကာနံ သစက္ခုကာနံ ဥပပဇ္ဇန္တာနံ တေသံ ဃာနဓာတု စ ဥပ္ပဇ္ဇတိ စက္ခုဓာတု စ ဥပ္ပဇ္ဇတိ.

(က) ယဿ စက္ခုဓာတု ဥပ္ပဇ္ဇတိ တဿ ရူပဓာတု ဥပ္ပဇ္ဇတီတိ? အာမန္တာ.

(ခ) ယဿ ဝါ ပန ရူပဓာတု ဥပ္ပဇ္ဇတိ တဿ စက္ခုဓာတု ဥပ္ပဇ္ဇတီတိ?

သရူပကာနံ အစက္ခုကာနံ ဥပပဇ္ဇန္တာနံ တေသံ ရူပဓာတု ဥပ္ပဇ္ဇတိ၊ နော စ တေသံ စက္ခုဓာတု ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ ရူပဓာတု စ ဥပ္ပဇ္ဇတိ စက္ခုဓာတု စ ဥပ္ပဇ္ဇတိ.

(က) ယဿ စက္ခုဓာတု ဥပ္ပဇ္ဇတိ တဿ မနောဝိညာဏဓာတု ဥပ္ပဇ္ဇတီတိ? အာမန္တာ.

(ခ) ယဿ ဝါ ပန မနောဝိညာဏဓာတု ဥပ္ပဇ္ဇတိ တဿ စက္ခုဓာတု ဥပ္ပဇ္ဇတီတိ?

သစိတ္တကာနံ အစက္ခုကာနံ ဥပပဇ္ဇန္တာနံ တေသံ မနောဝိညာဏဓာတု ဥပ္ပဇ္ဇတိ၊ နော စ တေသံ စက္ခုဓာတု ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ မနောဝိညာဏဓာတု စ ဥပ္ပဇ္ဇတိ စက္ခုဓာတု စ ဥပ္ပဇ္ဇတိ.

(က) ယဿ စက္ခုဓာတု ဥပ္ပဇ္ဇတိ တဿ ဓမ္မဓာတု ဥပ္ပဇ္ဇတီတိ? အာမန္တာ.

(ခ) ယဿ ဝါ ပန ဓမ္မဓာတု ဥပ္ပဇ္ဇတိ တဿ စက္ခုဓာတု ဥပ္ပဇ္ဇတီတိ?

အစက္ခုကာနံ ဥပပဇ္ဇန္တာနံ တေသံ ဓမ္မဓာတု ဥပ္ပဇ္ဇတိ၊ နော စ တေသံ စက္ခုဓာတု ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ ဓမ္မဓာတု စ ဥပ္ပဇ္ဇတိ စက္ခုဓာတု စ ဥပ္ပဇ္ဇတိ.

(ယထာ အာယတနယမကံ ဝိဘတ္တံ ဧဝံ ဓာတုယမကမ္ပိ ဝိဘဇိတဗ္ဗံ၊ သဒိသံ ကာတဗ္ဗံ).