၁. ပဒသောဓနဝါရော

၂၆. (က) ရူပံ ရူပက္ခန္ဓောတိ?

ပိယရူပံ သာတရူပံ ရူပံ၊ န ရူပက္ခန္ဓော. ရူပက္ခန္ဓော ရူပဉ္စေဝ ရူပက္ခန္ဓော စ.

(ခ) ရူပက္ခန္ဓော ရူပန္တိ? အာမန္တာ.

(က) ဝေဒနာ ဝေဒနာက္ခန္ဓောတိ? အာမန္တာ.

(ခ) ဝေဒနာက္ခန္ဓော ဝေဒနာတိ? အာမန္တာ.

(က) သညာ သညာက္ခန္ဓောတိ?

ဒိဋ္ဌိသညာ သညာ၊ န သညာက္ခန္ဓော. သညာက္ခန္ဓော သညာ စေဝ သညာက္ခန္ဓော စ.

(ခ) သညာက္ခန္ဓော သညာတိ? အာမန္တာ.

(က) သင်္ခါရာ သင်္ခါရက္ခန္ဓောတိ?

သင်္ခါရက္ခန္ဓံ ဌပေတွာ အဝသေသာ သင်္ခါရာ [အဝသေသာ သင်္ခါရာ သင်္ခါရာ (သျာ.)]၊ န သင်္ခါရက္ခန္ဓော. သင်္ခါရက္ခန္ဓော သင်္ခါရာ စေဝ သင်္ခါရက္ခန္ဓော စ.

(ခ) သင်္ခါရက္ခန္ဓော သင်္ခါရာတိ? အာမန္တာ.

(က) ဝိညာဏံ ဝိညာဏက္ခန္ဓောတိ? အာမန္တာ.

(ခ) ဝိညာဏက္ခန္ဓော ဝိညာဏန္တိ? အာမန္တာ.

၂၇. (က) န ရူပံ န ရူပက္ခန္ဓောတိ? အာမန္တာ.

(ခ) န ရူပက္ခန္ဓော န ရူပန္တိ?

ပိယရူပံ သာတရူပံ န ရူပက္ခန္ဓော၊ ရူပံ. ရူပဉ္စ ရူပက္ခန္ဓဉ္စ ဌပေတွာ အဝသေသာ န စေဝ ရူပံ န စ ရူပက္ခန္ဓော.

(က) န ဝေဒနာ န ဝေဒနာက္ခန္ဓောတိ? အာမန္တာ.

(ခ) န ဝေဒနာက္ခန္ဓော န ဝေဒနာတိ? အာမန္တာ.

(က) န သညာ န သညာက္ခန္ဓောတိ? အာမန္တာ.

(ခ) န သညာက္ခန္ဓော န သညာတိ?

ဒိဋ္ဌိသညာ န သညာက္ခန္ဓော၊ သညာ. သညဉ္စ သညာက္ခန္ဓဉ္စ ဌပေတွာ အဝသေသာ န စေဝ သညာ န စ သညာက္ခန္ဓော.

(က) န သင်္ခါရာ န သင်္ခါရက္ခန္ဓောတိ? အာမန္တာ.

(ခ) န သင်္ခါရက္ခန္ဓော န သင်္ခါရာတိ?

သင်္ခါရက္ခန္ဓံ ဌပေတွာ အဝသေသာ န သင်္ခါရက္ခန္ဓော၊ သင်္ခါရာ. သင်္ခါရေ စ သင်္ခါရက္ခန္ဓဉ္စ ဌပေတွာ အဝသေသာ န စေဝ သင်္ခါရာ န စ သင်္ခါရက္ခန္ဓော.

(က) န ဝိညာဏံ န ဝိညာဏက္ခန္ဓောတိ? အာမန္တာ.

(ခ) န ဝိညာဏက္ခန္ဓော န ဝိညာဏန္တိ? အာမန္တာ.