(၆) အတီတာနာဂတဝါရော
(က) အနုလောမပုဂ္ဂလော
၁၄၃. (က) ယဿ ရူပက္ခန္ဓော နိရုဇ္ဈိတ္ထ တဿ ဝေဒနာက္ခန္ဓော နိရုဇ္ဈိဿတီတိ?
ပရိနိဗ္ဗန္တာနံ တေသံ ရူပက္ခန္ဓော နိရုဇ္ဈိတ္ထ၊ နော စ တေသံ ဝေဒနာက္ခန္ဓော နိရုဇ္ဈိဿတိ. ဣတရေသံ တေသံ ရူပက္ခန္ဓော စ နိရုဇ္ဈိတ္ထ ဝေဒနာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန ဝေဒနာက္ခန္ဓော နိရုဇ္ဈိဿတိ တဿ ရူပက္ခန္ဓော နိရုဇ္ဈိတ္ထာတိ? အာမန္တာ.
၁၄၄. (က) ယဿ ဝေဒနာက္ခန္ဓော နိရုဇ္ဈိတ္ထ တဿ သညာက္ခန္ဓော နိရုဇ္ဈိဿတီတိ?
ပရိနိဗ္ဗန္တာနံ တေသံ ဝေဒနာက္ခန္ဓော နိရုဇ္ဈိတ္ထ၊ နော စ တေသံ သညာက္ခန္ဓော နိရုဇ္ဈိဿတိ. ဣတရေသံ တေသံ ဝေဒနာက္ခန္ဓော စ နိရုဇ္ဈိတ္ထ သညာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန သညာက္ခန္ဓော နိရုဇ္ဈိဿတိ တဿ ဝေဒနာက္ခန္ဓော နိရုဇ္ဈိတ္ထာတိ? အာမန္တာ.
(ခ) အနုလောမဩကာသော
၁၄၅. ယတ္ထ ရူပက္ခန္ဓော နိရုဇ္ဈိတ္ထ။ပေ။.
(ဂ) အနုလောမပုဂ္ဂလောကာသာ
၁၄၆. (က) ယဿ ယတ္ထ ရူပက္ခန္ဓော နိရုဇ္ဈိတ္ထ တဿ တတ္ထ ဝေဒနာက္ခန္ဓော နိရုဇ္ဈိဿတီတိ?
ပဉ္စဝေါကာရေ ပရိနိဗ္ဗန္တာနံ အသညသတ္တာနံ တေသံ တတ္ထ ရူပက္ခန္ဓော နိရုဇ္ဈိတ္ထ၊ နော စ တေသံ တတ္ထ ဝေဒနာက္ခန္ဓော နိရုဇ္ဈိဿတိ. ဣတရေသံ ပဉ္စဝေါကာရာနံ တေသံ တတ္ထ ရူပက္ခန္ဓော စ နိရုဇ္ဈိတ္ထ ဝေဒနာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန ယတ္ထ ဝေဒနာက္ခန္ဓော နိရုဇ္ဈိဿတိ တဿ တတ္ထ ရူပက္ခန္ဓော နိရုဇ္ဈိတ္ထာတိ?
သုဒ္ဓါဝါသံ ဥပပဇ္ဇန္တာနံ အရူပါနံ တေသံ တတ္ထ ဝေဒနာက္ခန္ဓော နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော နိရုဇ္ဈိတ္ထ. ဣတရေသံ ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ နိရုဇ္ဈိတ္ထ.
၁၄၇. (က) ယဿ ယတ္ထ ဝေဒနာက္ခန္ဓော နိရုဇ္ဈိတ္ထ တဿ တတ္ထ သညာက္ခန္ဓော နိရုဇ္ဈိဿတီတိ?
ပရိနိဗ္ဗန္တာနံ တေသံ တတ္ထ ဝေဒနာက္ခန္ဓော နိရုဇ္ဈိတ္ထ၊ နော စ တေသံ တတ္ထ သညာက္ခန္ဓော နိရုဇ္ဈိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ နိရုဇ္ဈိတ္ထ သညာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန ယတ္ထ သညာက္ခန္ဓော နိရုဇ္ဈိဿတိ တဿ တတ္ထ ဝေဒနာက္ခန္ဓော နိရုဇ္ဈိတ္ထာတိ?
သုဒ္ဓါဝါသံ ဥပပဇ္ဇန္တာနံ တေသံ တတ္ထ သညာက္ခန္ဓော နိရုဇ္ဈိဿတိ၊ နော စ တေသံ တတ္ထ ဝေဒနာက္ခန္ဓော နိရုဇ္ဈိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ သညာက္ခန္ဓော စ နိရုဇ္ဈိဿတိ ဝေဒနာက္ခန္ဓော စ နိရုဇ္ဈိတ္ထ.
(ဃ) ပစ္စနီကပုဂ္ဂလော
၁၄၈. (က) ယဿ ရူပက္ခန္ဓော န နိရုဇ္ဈိတ္ထ တဿ ဝေဒနာက္ခန္ဓော န နိရုဇ္ဈိဿတီတိ? နတ္ထိ.
(ခ) ယဿ ဝါ ပန ဝေဒနာက္ခန္ဓော န နိရုဇ္ဈိဿတိ တဿ ရူပက္ခန္ဓော န နိရုဇ္ဈိတ္ထာတိ? နိရုဇ္ဈိတ္ထ.
၁၄၉. (က) ယဿ ဝေဒနာက္ခန္ဓော န နိရုဇ္ဈိတ္ထ တဿ သညာက္ခန္ဓော န နိရုဇ္ဈိဿတီတိ? နတ္ထိ.
(ခ) ယဿ ဝါ ပန သညာက္ခန္ဓော န နိရုဇ္ဈိဿတိ တဿ ဝေဒနာက္ခန္ဓော န နိရုဇ္ဈိတ္ထာတိ? နိရုဇ္ဈိတ္ထ.
(င) ပစ္စနီကဩကာသော
၁၅၀. ယတ္ထ ရူပက္ခန္ဓော န နိရုဇ္ဈိတ္ထ။ပေ။.
(စ) ပစ္စနီကပုဂ္ဂလောကာသာ
၁၅၁. (က) ယဿ ယတ္ထ ရူပက္ခန္ဓော န နိရုဇ္ဈိတ္ထ တဿ တတ္ထ ဝေဒနာက္ခန္ဓော န နိရုဇ္ဈိဿတီတိ?
သုဒ္ဓါဝါသံ ဥပပဇ္ဇန္တာနံ အရူပါနံ တေသံ တတ္ထ ရူပက္ခန္ဓော န နိရုဇ္ဈိတ္ထ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈိဿတိ. သုဒ္ဓါဝါသေ ပရိနိဗ္ဗန္တာနံ အရူပေ ပရိနိဗ္ဗန္တာနံ တေသံ တတ္ထ ရူပက္ခန္ဓော စ န နိရုဇ္ဈိတ္ထ၊ ဝေဒနာက္ခန္ဓော စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဝေဒနာက္ခန္ဓော န နိရုဇ္ဈိဿတိ တဿ တတ္ထ ရူပက္ခန္ဓော န နိရုဇ္ဈိတ္ထာတိ?
ပဉ္စဝေါကာရေ ပရိနိဗ္ဗန္တာနံ အသညသတ္တာနံ တေသံ တတ္ထ ဝေဒနာက္ခန္ဓော န နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော န နိရုဇ္ဈိတ္ထ. သုဒ္ဓါဝါသေ ပရိနိဗ္ဗန္တာနံ အရူပေ ပရိနိဗ္ဗန္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈိဿတိ ရူပက္ခန္ဓော စ န နိရုဇ္ဈိတ္ထ.
၁၅၂. (က) ယဿ ယတ္ထ ဝေဒနာက္ခန္ဓော န နိရုဇ္ဈိတ္ထ တဿ တတ္ထ သညာက္ခန္ဓော န နိရုဇ္ဈိဿတီတိ?
သုဒ္ဓါဝါသံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော န နိရုဇ္ဈိတ္ထ၊ နော စ တေသံ တတ္ထ သညာက္ခန္ဓော န နိရုဇ္ဈိဿတိ. သုဒ္ဓါဝါသေ ပရိနိဗ္ဗန္တာနံ အသညသတ္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈိတ္ထ သညာက္ခန္ဓော စ န နိရုဇ္ဈိဿတိ.
(ခ) ယဿ ဝါ ပန ယတ္ထ သညာက္ခန္ဓော န နိရုဇ္ဈိဿတိ တဿ တတ္ထ ဝေဒနာက္ခန္ဓော န နိရုဇ္ဈိတ္ထာတိ?
ပရိနိဗ္ဗန္တာနံ တေသံ တတ္ထ သညာက္ခန္ဓော န နိရုဇ္ဈိဿတိ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈိတ္ထ. သုဒ္ဓါဝါသေ ပရိနိဗ္ဗန္တာနံ အသညသတ္တာနံ တေသံ တတ္ထ သညာက္ခန္ဓော စ န နိရုဇ္ဈိဿတိ ဝေဒနာက္ခန္ဓော စ န နိရုဇ္ဈိတ္ထ.
နိရောဓဝါရော.