(၃) အနာဂတဝါရော

(က) အနုလောမပုဂ္ဂလော

၆၂. (က) ယဿ ရူပက္ခန္ဓော ဥပ္ပဇ္ဇိဿတိ တဿ ဝေဒနာက္ခန္ဓော ဥပ္ပဇ္ဇိဿတီတိ? အာမန္တာ.

(ခ) ယဿ ဝါ ပန ဝေဒနာက္ခန္ဓော ဥပ္ပဇ္ဇိဿတိ တဿ ရူပက္ခန္ဓော ဥပ္ပဇ္ဇိဿတီတိ?

ယေ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဝေဒနာက္ခန္ဓော ဥပ္ပဇ္ဇိဿတိ၊ နော စ တေသံ ရူပက္ခန္ဓော ဥပ္ပဇ္ဇိဿတိ. ဣတရေသံ တေသံ ဝေဒနာက္ခန္ဓော စ ဥပ္ပဇ္ဇိဿတိ ရူပက္ခန္ဓော စ ဥပ္ပဇ္ဇိဿတိ.

(ခ) အနုလောမဩကာသော

၆၃. (က) ယတ္ထ ရူပက္ခန္ဓော ဥပ္ပဇ္ဇိဿတိ တတ္ထ ဝေဒနာက္ခန္ဓော ဥပ္ပဇ္ဇိဿတီတိ?

အသညသတ္တေ တတ္ထ ရူပက္ခန္ဓော ဥပ္ပဇ္ဇိဿတိ၊ နော စ တတ္ထ ဝေဒနာက္ခန္ဓော ဥပ္ပဇ္ဇိဿတိ. ပဉ္စဝေါကာရေ တတ္ထ ရူပက္ခန္ဓော စ ဥပ္ပဇ္ဇိဿတိ ဝေဒနာက္ခန္ဓော စ ဥပ္ပဇ္ဇိဿတိ.

(ခ) ယတ္ထ ဝါ ပန ဝေဒနာက္ခန္ဓော ဥပ္ပဇ္ဇိဿတိ တတ္ထ ရူပက္ခန္ဓော ဥပ္ပဇ္ဇိဿတီတိ?

အရူပေ တတ္ထ ဝေဒနာက္ခန္ဓော ဥပ္ပဇ္ဇိဿတိ၊ နော စ တတ္ထ ရူပက္ခန္ဓော ဥပ္ပဇ္ဇိဿတိ. ပဉ္စဝေါကာရေ တတ္ထ ဝေဒနာက္ခန္ဓော စ ဥပ္ပဇ္ဇိဿတိ ရူပက္ခန္ဓော စ ဥပ္ပဇ္ဇိဿတိ.

(ဂ) အနုလောမပုဂ္ဂလောကာသာ

၆၄. (က) ယဿ ယတ္ထ ရူပက္ခန္ဓော ဥပ္ပဇ္ဇိဿတိ တဿ တတ္ထ ဝေဒနာက္ခန္ဓော ဥပ္ပဇ္ဇိဿတီတိ?

အသညသတ္တာနံ တေသံ တတ္ထ ရူပက္ခန္ဓော ဥပ္ပဇ္ဇိဿတိ၊ နော စ တေသံ တတ္ထ ဝေဒနာက္ခန္ဓော ဥပ္ပဇ္ဇိဿတိ. ပဉ္စဝေါကာရာနံ တေသံ တတ္ထ ရူပက္ခန္ဓော စ ဥပ္ပဇ္ဇိဿတိ ဝေဒနာက္ခန္ဓော စ ဥပ္ပဇ္ဇိဿတိ.

(ခ) ယဿ ဝါ ပန ယတ္ထ ဝေဒနာက္ခန္ဓော ဥပ္ပဇ္ဇိဿတိ တဿ တတ္ထ ရူပက္ခန္ဓော ဥပ္ပဇ္ဇိဿတီတိ?

အရူပါနံ တေသံ တတ္ထ ဝေဒနာက္ခန္ဓော ဥပ္ပဇ္ဇိဿတိ၊ နော စ တေသံ တတ္ထ ရူပက္ခန္ဓော ဥပ္ပဇ္ဇိဿတိ. ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ ဥပ္ပဇ္ဇိဿတိ ရူပက္ခန္ဓော စ ဥပ္ပဇ္ဇိဿတိ.

(ဃ) ပစ္စနီကပုဂ္ဂလော

၆၅. (က) ယဿ ရူပက္ခန္ဓော နုပ္ပဇ္ဇိဿတိ တဿ ဝေဒနာက္ခန္ဓော နုပ္ပဇ္ဇိဿတီတိ?

ယေ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ရူပက္ခန္ဓော နုပ္ပဇ္ဇိဿတိ၊ နော စ တေသံ ဝေဒနာက္ခန္ဓော နုပ္ပဇ္ဇိဿတိ. ပစ္ဆိမဘဝိကာနံ တေသံ ရူပက္ခန္ဓော စ နုပ္ပဇ္ဇိဿတိ ဝေဒနာက္ခန္ဓော စ နုပ္ပဇ္ဇိဿတိ.

(ခ) ယဿ ဝါ ပန ဝေဒနာက္ခန္ဓော နုပ္ပဇ္ဇိဿတိ တဿ ရူပက္ခန္ဓော နုပ္ပဇ္ဇိဿတီတိ? အာမန္တာ.

(င) ပစ္စနီကဩကာသော

၆၆. (က) ယတ္ထ ရူပက္ခန္ဓော နုပ္ပဇ္ဇိဿတိ တတ္ထ ဝေဒနာက္ခန္ဓော နုပ္ပဇ္ဇိဿတီတိ? ဥပ္ပဇ္ဇိဿတိ.

(ခ) ယတ္ထ ဝါ ပန ဝေဒနာက္ခန္ဓော နုပ္ပဇ္ဇိဿတိ တတ္ထ ရူပက္ခန္ဓော နုပ္ပဇ္ဇိဿတီတိ? ဥပ္ပဇ္ဇိဿတိ.

(စ) ပစ္စနီကပုဂ္ဂလောကာသာ

၆၇. (က) ယဿ ယတ္ထ ရူပက္ခန္ဓော နုပ္ပဇ္ဇိဿတိ တဿ တတ္ထ ဝေဒနာက္ခန္ဓော နုပ္ပဇ္ဇိဿတီတိ?

အရူပါနံ တေသံ တတ္ထ ရူပက္ခန္ဓော နုပ္ပဇ္ဇိဿတိ၊ နော စ တေသံ တတ္ထ ဝေဒနာက္ခန္ဓော နုပ္ပဇ္ဇိဿတိ. ပစ္ဆိမဘဝိကာနံ တေသံ တတ္ထ ရူပက္ခန္ဓော စ နုပ္ပဇ္ဇိဿတိ ဝေဒနာက္ခန္ဓော စ နုပ္ပဇ္ဇိဿတိ.

(ခ) ယဿ ဝါ ပန ယတ္ထ ဝေဒနာက္ခန္ဓော နုပ္ပဇ္ဇိဿတိ တဿ တတ္ထ ရူပက္ခန္ဓော နုပ္ပဇ္ဇိဿတီတိ?

အသညသတ္တာနံ တေသံ တတ္ထ ဝေဒနာက္ခန္ဓော နုပ္ပဇ္ဇိဿတိ၊ နော စ တေသံ တတ္ထ ရူပက္ခန္ဓော နုပ္ပဇ္ဇိဿတိ. ပစ္ဆိမဘဝိကာနံ တေသံ တတ္ထ ဝေဒနာက္ခန္ဓော စ နုပ္ပဇ္ဇိဿတိ ရူပက္ခန္ဓော စ နုပ္ပဇ္ဇိဿတိ.