၂. ဒုကဥဒ္ဒေသော

၈. ဒွေ ပုဂ္ဂလာ –

(၁) ကောဓနော စ၊ ဥပနာဟီ စ.

(၂) မက္ခီ စ၊ ပဠာသီ [ပလာသီ (သျာ. က.)] စ.

(၃) ဣဿုကီ စ၊ မစ္ဆရီ စ.

(၄) သဌော စ၊ မာယာဝီ စ.

(၅) အဟိရိကော စ၊ အနောတ္တပ္ပီ စ.

(၆) ဒုဗ္ဗစော စ၊ ပါပမိတ္တော စ.

(၇) ဣန္ဒြိယေသု အဂုတ္တဒွါရော စ၊ ဘောဇနေ အမတ္တညူ စ.

(၈) မုဋ္ဌဿတိ စ၊ အသမ္ပဇာနော စ.

(၉) သီလဝိပန္နော စ၊ ဒိဋ္ဌိဝိပန္နော စ.

(၁၀) အဇ္ဈတ္တသံယောဇနော စ၊ ဗဟိဒ္ဓါသံယောဇနော စ.

(၁၁) အက္ကောဓနော စ၊ အနုပနာဟီ စ.

(၁၂) အမက္ခီ စ၊ အပဠာသီ စ.

(၁၃) အနိဿုကီ စ၊ အမစ္ဆရီ စ.

(၁၄) အသဌော စ၊ အမာယာဝီ စ.

(၁၅) ဟိရိမာ စ၊ ဩတ္တပ္ပီ စ.

(၁၆) သုဝစော စ၊ ကလျာဏမိတ္တော စ.

(၁၇) ဣန္ဒြိယေသု ဂုတ္တဒွါရော စ၊ ဘောဇနေ မတ္တညူ စ.

(၁၈) ဥပဋ္ဌိတဿတိ စ၊ သမ္ပဇာနော စ.

(၁၉) သီလသမ္ပန္နော စ၊ ဒိဋ္ဌိသမ္ပန္နော စ.

(၂၀) ဒွေ ပုဂ္ဂလာ ဒုလ္လဘာ လောကသ္မိံ.

(၂၁) ဒွေ ပုဂ္ဂလာ ဒုတ္တပ္ပယာ.

(၂၂) ဒွေ ပုဂ္ဂလာ သုတပ္ပယာ.

(၂၃) ဒွိန္နံ ပုဂ္ဂလာနံ အာသဝါ ဝဍ္ဎန္တိ.

(၂၄) ဒွိန္နံ ပုဂ္ဂလာနံ အာသဝါ န ဝဍ္ဎန္တိ.

(၂၅) ဟီနာဓိမုတ္တော စ၊ ပဏီတာဓိမုတ္တော စ.

(၂၆) တိတ္တော စ၊ တပ္ပေတာ စ.

ဒုကံ.