၁-၆. ပဋိစ္စဝါရာဒိ

ပစ္စယစတုက္ကံ

ဟေတု-အာရမ္မဏပစ္စယာ

၁၇. ဝိပါကံ ဓမ္မံ ပဋိစ္စ နဝိပါကော ဓမ္မော ဥပ္ပဇ္ဇတိ ဟေတုပစ္စယာ. ဝိပါကံ ဓမ္မံ ပဋိစ္စ နဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. ဝိပါကံ ဓမ္မံ ပဋိစ္စ နနေဝဝိပါကနဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. ဝိပါကံ ဓမ္မံ ပဋိစ္စ နဝိပါကဓမ္မဓမ္မော စ နနေဝဝိပါကနဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. ဝိပါကံ ဓမ္မံ ပဋိစ္စ နဝိပါကော စ နဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. (ပဉ္စ ပဉှာ.)

၁၈. ဝိပါကဓမ္မဓမ္မံ ပဋိစ္စ နဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. ဝိပါကဓမ္မဓမ္မံ ပဋိစ္စ နဝိပါကော ဓမ္မော ဥပ္ပဇ္ဇတိ ဟေတုပစ္စယာ. ဝိပါကဓမ္မဓမ္မံ ပဋိစ္စ နနေဝဝိပါကနဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. ဝိပါကဓမ္မဓမ္မံ ပဋိစ္စ နဝိပါကော စ နနေဝဝိပါကနဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. ဝိပါကဓမ္မဓမ္မံ ပဋိစ္စ နဝိပါကော စ နဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. (ပဉ္စ ပဉှာ.)

၁၉. နေဝဝိပါကနဝိပါကဓမ္မဓမ္မံ ပဋိစ္စ နနေဝဝိပါကနဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. နေဝဝိပါကနဝိပါကဓမ္မဓမ္မံ ပဋိစ္စ နဝိပါကော ဓမ္မော ဥပ္ပဇ္ဇတိ ဟေတုပစ္စယာ. နေဝဝိပါကနဝိပါကဓမ္မဓမ္မံ ပဋိစ္စ နဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. နေဝဝိပါကနဝိပါကဓမ္မဓမ္မံ ပဋိစ္စ နဝိပါကဓမ္မဓမ္မော စ နနေဝဝိပါကနဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. နေဝဝိပါကနဝိပါကဓမ္မဓမ္မံ ပဋိစ္စ နဝိပါကော စ နဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. (ပဉ္စ ပဉှာ.)

၂၀. ဝိပါကဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နဝိပါကော ဓမ္မော ဥပ္ပဇ္ဇတိ ဟေတုပစ္စယာ. ဝိပါကဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. ဝိပါကဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နနေဝဝိပါကနဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. ဝိပါကဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နဝိပါကဓမ္မဓမ္မော စ နနေဝဝိပါကနဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. ဝိပါကဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နဝိပါကော စ နဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. (၅)

ဝိပါကဓမ္မဓမ္မဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နဝိပါကော ဓမ္မော ဥပ္ပဇ္ဇတိ ဟေတုပစ္စယာ. ဝိပါကဓမ္မဓမ္မဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. ဝိပါကဓမ္မဓမ္မဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နဝိပါကော စ နဝိပါကဓမ္မဓမ္မော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

၂၁. ဝိပါကံ ဓမ္မံ ပဋိစ္စ နဝိပါကဓမ္မဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ.

ဝိပါကဓမ္မဓမ္မံ ပဋိစ္စ နဝိပါကော ဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ.

နေဝဝိပါကနဝိပါကဓမ္မဓမ္မံ ပဋိစ္စ နနေဝဝိပါကနဝိပါကဓမ္မဓမ္မော ဥပ္ပဇ္ဇတိ အာရမ္မဏပစ္စယာ။ (ပဉ္စ ပဉှာ).

ဝိပါကဉ္စ နေဝဝိပါကနဝိပါကဓမ္မဓမ္မဉ္စ ဓမ္မံ ပဋိစ္စ နဝိပါကဓမ္မဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ. (သံခိတ္တံ.)

၂၂. ဟေတုယာ တေဝီသ၊ အာရမ္မဏေ စုဒ္ဒသ။ပေ။ အဝိဂတေ တေဝီသ. (သံခိတ္တံ.)

နဟေတုယာ အဋ္ဌာရသ၊ နအာရမ္မဏေ ပန္နရသ.

(သဟဇာတဝါရမ္ပိ ပစ္စယဝါရမ္ပိ နိဿယဝါရမ္ပိ သံသဋ္ဌဝါရမ္ပိ သမ္ပယုတ္တဝါရမ္ပိ ဝိတ္ထာရေတဗ္ဗံ.)