၅၇. စေတသိကဒုကံ

၅၅. နစေတသိကံ ဓမ္မံ ပဋိစ္စ နစေတသိကော ဓမ္မော ဥပ္ပဇ္ဇတိ ဟေတုပစ္စယာ. နစေတသိကံ ဓမ္မံ ပဋိစ္စ နအစေတသိကော ဓမ္မော ဥပ္ပဇ္ဇတိ ဟေတုပစ္စယာ. နစေတသိကံ ဓမ္မံ ပဋိစ္စ နစေတသိကော စ နအစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

နအစေတသိကံ ဓမ္မံ ပဋိစ္စ နအစေတသိကော ဓမ္မော ဥပ္ပဇ္ဇတိ ဟေတုပစ္စယာ. နအစေတသိကံ ဓမ္မံ ပဋိစ္စ နစေတသိကော ဓမ္မော ဥပ္ပဇ္ဇတိ ဟေတုပစ္စယာ. နအစေတသိကံ ဓမ္မံ ပဋိစ္စ နစေတသိကော စ နအစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

နစေတသိကဉ္စ နအစေတသိကဉ္စ ဓမ္မံ ပဋိစ္စ နစေတသိကော ဓမ္မော ဥပ္ပဇ္ဇတိ ဟေတုပစ္စယာ. နစေတသိကဉ္စ နအစေတသိကဉ္စ ဓမ္မံ ပဋိစ္စ နအစေတသိကော ဓမ္မော ဥပ္ပဇ္ဇတိ ဟေတုပစ္စယာ. နစေတသိကဉ္စ နအစေတသိကဉ္စ ဓမ္မံ ပဋိစ္စ နစေတသိကော စ နအစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

ဟေတုယာ နဝ။ပေ။ အဝိဂတေ နဝ. (သဗ္ဗတ္ထ ဝိတ္ထာရော.)