၁-၇. ပဋိစ္စဝါရာဒိ

၃၃. အာသဝဝိပ္ပယုတ္တံ နသာသဝံ ဓမ္မံ ပဋိစ္စ အာသဝဝိပ္ပယုတ္တော နသာသဝေါ ဓမ္မော ဥပ္ပဇ္ဇတိ ဟေတုပစ္စယာ. အာသဝဝိပ္ပယုတ္တံ နသာသဝံ ဓမ္မံ ပဋိစ္စ အာသဝဝိပ္ပယုတ္တော နအနာသဝေါ ဓမ္မော ဥပ္ပဇ္ဇတိ ဟေတုပစ္စယာ. အာသဝဝိပ္ပယုတ္တံ နသာသဝံ ဓမ္မံ ပဋိစ္စ အာသဝဝိပ္ပယုတ္တော နသာသဝေါ စ အာသဝဝိပ္ပယုတ္တော နအနာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အာသဝဝိပ္ပယုတ္တံ နအနာသဝံ ဓမ္မံ ပဋိစ္စ အာသဝဝိပ္ပယုတ္တော နအနာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)

အာသဝဝိပ္ပယုတ္တံ နသာသဝဉ္စ အာသဝဝိပ္ပယုတ္တံ နအနာသဝဉ္စ ဓမ္မံ ပဋိစ္စ အာသဝဝိပ္ပယုတ္တော နအနာသဝေါ ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

ဟေတုယာ ပဉ္စ၊ အာရမ္မဏေ ဒွေ။ပေ။ အဝိဂတေ ပဉ္စ. (သဗ္ဗတ္ထ ဝိတ္ထာရော.)

အာသဝဂေါစ္ဆကံ နိဋ္ဌိတံ.