၁၀၀-၈၃. သရဏဒုက-ပိဋ္ဌိဒုကံ

၈၆. နသရဏံ နဒဿနေန ပဟာတဗ္ဗံ ဓမ္မံ ပဋိစ္စ သရဏော ဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.

နအရဏံ နနဒဿနေန ပဟာတဗ္ဗံ ဓမ္မံ ပဋိစ္စ အရဏော နဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ. (သံခိတ္တံ.)

၈၇. နသရဏံ နသဥတ္တရံ ဓမ္မံ ပဋိစ္စ အရဏော သဥတ္တရော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.

(သဟဇာတဝါရမ္ပိ ပစ္စယဝါရမ္ပိ နိဿယဝါရမ္ပိ သံသဋ္ဌဝါရမ္ပိ သမ္ပယုတ္တဝါရမ္ပိ ပဋိစ္စဝါရသဒိသံ.)

ပဉှာဝါရော

ဟေတု-အာရမ္မဏပစ္စယာ

၈၈. နသရဏော နသဥတ္တရော ဓမ္မော အရဏဿ သဥတ္တရဿ ဓမ္မဿ ဟေတုပစ္စယေန ပစ္စယော. ဧကံ.

နသရဏော နသဥတ္တရော ဓမ္မော အရဏဿ သဥတ္တရဿ ဓမ္မဿ အာရမ္မဏပစ္စယေန ပစ္စယော. ဧကံ. ဟေတုယာ ဧကံ.

ပစ္စနီယုဒ္ဓါရော

၈၉. နသရဏော နသဥတ္တရော ဓမ္မော အရဏဿ သဥတ္တရဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပစ္ဆာဇာတပစ္စယေန ပစ္စယော။ (သံခိတ္တံ.) နဟေတုယာ ဧကံ၊ နအာရမ္မဏေ ဧကံ.

ဟေတုပစ္စယာ နအာရမ္မဏေ ဧကံ. (သံခိတ္တံ.)

နဟေတုပစ္စယာ အာရမ္မဏေ ဧကံ. (သံခိတ္တံ.)

(ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ.)

အနုတ္တရပဒံ

ဟေတု-အနန္တရပစ္စယာ

၉၀. နသရဏံ နအနုတ္တရံ ဓမ္မံ ပစ္စယာ အရဏော အနုတ္တရော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ။ပေ။ အဝိဂတေ ဧကံ.

၉၁. နသရဏော နအနုတ္တရော ဓမ္မော အရဏဿ အနုတ္တရဿ ဓမ္မဿ အနန္တရပစ္စယေန ပစ္စယော. အနန္တရေ ဧကံ၊ သမနန္တရေ ဧကံ၊ ဥပနိဿယေ ဒွေ၊ ပုရေဇာတေ ဧကံ၊ အာသေဝနေ ဧကံ၊ ဝိပ္ပယုတ္တေ ဧကံ၊ အတ္ထိယာ ဧကံ၊ နတ္ထိယာ ဧကံ၊ ဝိဂတေ ဧကံ၊ အဝိဂတေ ဧကံ.

ပစ္စနီယုဒ္ဓါရော

၉၂. နသရဏော နအနုတ္တရော ဓမ္မော အရဏဿ အနုတ္တရဿ ဓမ္မဿ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော.

နအရဏော နအနုတ္တရော ဓမ္မော အရဏဿ အနုတ္တရဿ ဓမ္မဿ ဥပနိဿယပစ္စယေန ပစ္စယော. နဟေတုယာ ဒွေ၊ နအာရမ္မဏေ ဒွေ။ပေ။ နဥပနိဿယေ ဧကံ၊ နပုရေဇာတေ ဒွေ။ပေ။ နောအဝိဂတေ ဒွေ.

ဥပနိဿယပစ္စယာ နဟေတုယာ ဒွေ. (သံခိတ္တံ.)

နဟေတုပစ္စယာ ဥပနိဿယေ ဒွေ၊ ပုရေဇာတေ ဧကံ။ပေ။ အတ္ထိယာ ဧကံ။ပေ။ အဝိဂတေ ဧကံ. (သံခိတ္တံ.)

(ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ.)

အနုလောမဒုကတိကပဋ္ဌာနတော ပဋ္ဌာယ ယာဝ ပရိယောသာနာ တိံသမတ္တေဟိ ဘာဏဝါရေဟိ ပဋ္ဌာနံ.

ဓမ္မပစ္စနီယာနုလောမေ ဒုကဒုကပဋ္ဌာနံ နိဋ္ဌိတံ.

ပစ္စနီယာနုလောမပဋ္ဌာနံ နိဋ္ဌိတံ.

ပဋ္ဌာနပကရဏံ နိဋ္ဌိတံ.