၁၀၀-၄. သရဏဒုက-ဟေတုသဟေတုကဒုကာဒိ

၆၅. နသရဏံ နဟေတုဉ္စေဝ နအဟေတုကဉ္စ ဓမ္မံ ပဋိစ္စ အရဏော ဟေတု စေဝ သဟေတုကော စ ဓမ္မော ဥပ္ပဇ္ဇတိ ဟေတုပစ္စယာ. နအရဏံ နဟေတုဉ္စေဝ နအဟေတုကဉ္စ ဓမ္မံ ပဋိစ္စ သရဏော ဟေတု စေဝ သဟေတုကော စ ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဒွေ.

နသရဏံ နအဟေတုကဉ္စေဝ နနဟေတုဉ္စ ဓမ္မံ ပဋိစ္စ အရဏော သဟေတုကော စေဝ န စ ဟေတု ဓမ္မော ဥပ္ပဇ္ဇတိ ဟေတုပစ္စယာ. နအရဏံ နအဟေတုကဉ္စေဝ နနဟေတုဉ္စ ဓမ္မံ ပဋိစ္စ သရဏော သဟေတုကော စေဝ န စ ဟေတု ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဒွေ. (ဟေတုဟေတုသမ္ပယုတ္တဒုကံ သံခိတ္တံ.)