၂၂-၄. သနိဒဿနတ္တိက-ဥပါဒိန္နတ္တိကံ

၅၁. နသနိဒဿနသပ္ပဋိဃော နဥပါဒိန္နုပါဒါနိယော ဓမ္မော အနိဒဿနအပ္ပဋိဃဿ ဥပါဒိန္နုပါဒါနိယဿ ဓမ္မဿ အာရမ္မဏပစ္စယေန ပစ္စယော။ အာရမ္မဏေ ဆ.

နသနိဒဿနသပ္ပဋိဃံ နအနုပါဒိန္နုပါဒါနိယံ ဓမ္မံ ပဋိစ္စ သနိဒဿနသပ္ပဋိဃော အနုပါဒိန္နုပါဒါနိယော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ ဧကဝီသ.

နသနိဒဿနသပ္ပဋိဃံ နအနုပါဒိန္နအနုပါဒါနိယံ ဓမ္မံ ပစ္စယာ အနိဒဿနအပ္ပဋိဃော အနုပါဒိန္နအနုပါဒါနိယော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.