၁-၄-၆. ကုသလတ္တိက-ဟေတုသဟေတုကာဒိဒုကာနိ

၆. နကုသလံ နဟေတုဉ္စေဝ နအဟေတုကဉ္စ ဓမ္မံ ပဋိစ္စ အကုသလော ဟေတု စေဝ သဟေတုကော စ ဓမ္မော ဥပ္ပဇ္ဇတိ ဟေတုပစ္စယာ. နကုသလံ နဟေတုဉ္စေဝ နအဟေတုကဉ္စ ဓမ္မံ ပဋိစ္စ အဗျာကတော ဟေတု စေဝ သဟေတုကော စ ဓမ္မော ဥပ္ပဇ္ဇတိ ဟေတုပစ္စယာ. ဒွေ.

(နအကုသလေ ဒွေ၊ နအဗျာကတေ ဒွေ. ပဌမံ ဂဏိတကေန ဧကံ၊ ဒုတိယံ ဂဏိတကေန ဧကံ၊ တတိယံ ဂဏိတကေန ဧကံ၊ သဗ္ဗတ္ထ နဝ ပဉှာ.)

နကုသလံ နအဟေတုကဉ္စေဝ န စ ဟေတုံ ဓမ္မံ ပဋိစ္စ အကုသလော သဟေတုကော စေဝ န စ ဟေတု ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ နဝ.

၇. နကုသလံ နဟေတုဉ္စေဝ နဟေတုဝိပ္ပယုတ္တဉ္စ ဓမ္မံ ပဋိစ္စ အကုသလော ဟေတု စေဝ ဟေတုသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ နဝ.

နကုသလံ နဟေတုဝိပ္ပယုတ္တဉ္စေဝ နနဟေတုဉ္စ ဓမ္မံ ပဋိစ္စ အကုသလော ဟေတုသမ္ပယုတ္တော စေဝ န စ ဟေတု ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ နဝ.

၈. နကုသလံ နဟေတုံ နသဟေတုကံ ဓမ္မံ ပဋိစ္စ အဗျာကတော နဟေတု သဟေတုကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.

၉. နကုသလံ နဟေတုံ နအဟေတုကံ ဓမ္မံ ပဋိစ္စ အကုသလော နဟေတု အဟေတုကော ဓမ္မော ဥပ္ပဇ္ဇတိ ဟေတုပစ္စယာ. (၁)

နအကုသလံ နဟေတုံ နအဟေတုကံ ဓမ္မံ ပဋိစ္စ အဗျာကတော နဟေတု အဟေတုကော ဓမ္မော ဥပ္ပဇ္ဇတိ ဟေတုပစ္စယာ. (၁)

နအဗျာကတံ နဟေတုံ နအဟေတုကံ ဓမ္မံ ပဋိစ္စ အဗျာကတော နဟေတု အဟေတုကော ဓမ္မော ဥပ္ပဇ္ဇတိ ဟေတုပစ္စယာ. (၁) (ဂဏိတကေန တီဏိ ပဉှာ.)။ ဟေတုယာ ဆ.