၂၂-၃-၆. သနိဒဿနတ္တိက-ဟေတုသမ္ပယုတ္တာဒိဒုကာနိ

၅၉. နသနိဒဿနသပ္ပဋိဃံ နဟေတုသမ္ပယုတ္တံ ဓမ္မံ ပဋိစ္စ အနိဒဿနအပ္ပဋိဃော ဟေတုသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.

နသနိဒဿနသပ္ပဋိဃံ နဟေတုဝိပ္ပယုတ္တံ ဓမ္မံ ပဋိစ္စ သနိဒဿနသပ္ပဋိဃော ဟေတုဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ ဧကဝီသ.

၆၀. နသနိဒဿနသပ္ပဋိဃံ နဟေတုဉ္စေဝ နအဟေတုကဉ္စ ဓမ္မံ ပဋိစ္စ အနိဒဿနအပ္ပဋိဃော ဟေတု စေဝ သဟေတုကော စ ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.

နသနိဒဿနသပ္ပဋိဃံ နအဟေတုကဉ္စေဝ နန စ ဟေတုံ ဓမ္မံ ပဋိစ္စ အနိဒဿနအပ္ပဋိဃော သဟေတုကော စေဝ န စ ဟေတု ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.

၆၁. နသနိဒဿနသပ္ပဋိဃံ နဟေတုဉ္စေဝ နဟေတုဝိပ္ပယုတ္တဉ္စ ဓမ္မံ ပဋိစ္စ အနိဒဿနအပ္ပဋိဃော ဟေတု စေဝ ဟေတုသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.

နသနိဒဿနသပ္ပဋိဃံ နဟေတုဝိပ္ပယုတ္တဉ္စေဝ နန စ ဟေတုံ ဓမ္မံ ပဋိစ္စ အနိဒဿနအပ္ပဋိဃော ဟေတုသမ္ပယုတ္တော စေဝ န စ ဟေတု ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.

၆၂. နသနိဒဿနသပ္ပဋိဃံ နဟေတုံ နသဟေတုကံ ဓမ္မံ ပဋိစ္စ အနိဒဿနအပ္ပဋိဃော နဟေတု သဟေတုကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.

နသနိဒဿနသပ္ပဋိဃံ နဟေတုံ နအဟေတုကံ ဓမ္မံ ပဋိစ္စ သနိဒဿနသပ္ပဋိဃော နဟေတု အဟေတုကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ ဧကဝီသ.